Romänus 3:1-31
3 Tsëqa, ¿imachötan mas alli judïu kë? ¿Imachötan mas alli ishpakunantsikpa puntanchö señalashqa kë?
2 Imëkachömi mas alli. Puntataqa, judïukunatam Teyta Diosqa ninqankunata entregarqan.+
3 Tsëqa, ¿imatan pasanqa? Wakinkuna mana markäkushqa o yärakushqa kayaptinqa, ¿mana markäkuyanqantsuraq Teyta Dios confiakuypaq kanqanta ushakätsinqa?
4 ¡Manam tsënötsu! Llapan nunakuna ulikoq o llullakoq kayaptimpis,+ Teyta Diosqa imëpis rasumpa kaqllatam parlanqa,+ kënö nir qellqarëkanqannö: “Parlanqëki allita ruraq kanqëkita rikätsikunampaq, y juzguëkäyäshuptiki gananëkipaq”.+
5 Tsënö kaptimpis, mana allita ruranqantsik, Teyta Dios allita ruraq kanqanta masraq rikätsikuptinqa, ¿ima nishwanraq? ¿Cöleratseqninkunata castigarqa Teyta Dios mana allitaku rurëkan? (Nunakuna parlayanqannömi parlëkä).
6 ¡Manam tsënötsu! Juknöpaqa, ¿imanöraq Teyta Dios kë munduchö nunakunata juzganman?+
7 Peru noqa ulikunqä o llullakunqä, Teyta Dios rasumpa kaqllata parlanqanta masraq rikätsikuptin nunakuna pëta alabayaptinqa, ¿imanirtan Teyta Diosqa jutsata* ruraqtanö juzgaman?
8 ¿Imanirtan, “allikuna chämunampaq mana allikunata rurashun” nintsiktsu, wakinkuna mana tsënö ninqantsikpita tumpamanqantsiknö? Tsë nunakunaqa rasun kaqchömi juzgashqa kayanqa.+
9 Tsëqa, ¿wakinkunapita mas alliku këkantsik? ¡Manam tsënötsu! Qallananchö qamkunata cläru niyanqaqnömi,* llapankuna jutsapa* poderninchö këkäyan, judïukuna y griëgu nunakunapis.+
10 Kënö nirmi qellqarëkan: “Alli kaqllata ruraq nunaqa, manam jukllëllapis kantsu;+
11 imatapis alli entiendeq nunaqa manam kantsu, manam Teyta Diosta asheq nunaqa kantsu.
12 Llapankunam pëpita rakikäyashqa, llapankunam upa tikrayashqa, manam jukllëllapis alli kanqanta rikätsikuntsu”.+
13 “Ayata pampayänan uchkunömi shiminkunapis kicharëkan; qallunkunawanmi jukkunata engañayan”.+ “Parlayanqanqa vïbora niyanqan culebrapa venënunnömi, tsëmi imëka mana allikunaman chätsikun”.+
14 “Shiminwanqa maldicirlla y jukpa contran parlarllam këkan”.+
15 “Cörripa ëwarmi nuna mayinta wanutsin”.+
16 “Jukninkuna jukninkunam mana allita ruranakuyan y ushakätsinakuyan,
17 y manam yamë kawakuyta yachayantsu”.+
18 “Teyta Diostaqa manam ni ichikllapis mantsayantsu”.+
19 Musyantsikmi Ley llapan ninqankunaqa, Leyta reqeqkunapaq kanqanta, tsënöpa tsapäkuyta mana puëdiyänampaq y llapan nunakuna Teyta Diospa rikëninchö culpayoq kayänampaq.+
20 Leyqa jutsa* ima kanqantam cläru musyatsikun, tsëmi ley ninqanta ruranqampitaqa,+ pï nunapis Teyta Diospa rikënimpaq allita ruraqnötsu rikashqa kanqa.+
21 Peru kananqa ley ninqanta mana cuentaman churarmi,+ Teyta Diosqa allita ruraq kanqanta juknöpa rikätsikushqa, Leychö y Diospa Willakoqninkuna Qellqayanqanchö cläru ninqannöpis.+
22 Awmi, llapan markäkoq o yärakoq kaqkunam, Jesucristuman markäkur Teyta Diospa rikënimpaq allita ruraq kayan. Pëqa llapan nunakunatam igualpa rikan.+
23 Llapankuna jutsata* rurashqa karmi, Teyta Dios imanö kanqanta cläru rikätsikuyta puëdiyantsu.*+
24 Peru jutsapita* salvamänapaq Cristu Jesus wanushqa kaptinmi,+ Teyta Diosqa nunakunata alli ruraqtanö rikan.+ Tsëtaqa alläpa alli karmi Teyta Dios qaramarqantsik.+
25 Yawarninman markäkoq o yärakoq kaqkuna pëwan amishtayänampaqmi,+ Teyta Diosqa amishtatsikoq qarëtanö* pëta entregarqan.+ Tsëtaqa allita ruraq kanqanta rikätsikunampaqmi rurarqan. Pëqa pacienciayoqmi karqan y unë witsan rurayanqan jutsakunatam* perdonarqan.
26 Tsëtaqa kanan witsanchö allita ruraq kanqanta rikätsikunampaqmi rurarqan,+ tsënöpa Jesusman markäkoqkunata o yärakoqkunata allita ruraqtanö rikar, allita ruraq kanqanta rikätsikunampaq.+
27 Tsëqa, ¿pillapis alabakuyta puëdinku? Manam. ¿Ima leytan alabakunanta michan? ¿Ruranqankuna väleq kanqanta neq leyku?+ Manam, sinöqa markäkoq o yärakoq kanampaq neq leymi.
28 Noqantsikqa musyantsikmi, nunaqa markäkoq o yärakoq kar allita ruraqnö rikashqa kanqanta y manam ley ninqanta ruranqampitatsu.+
29 ¿Pëqa judïukunapa Diosninllaku?+ ¿Manaku juk nacion nunakunapapis Diosnin?+ Awmi, pëqa juk nacion nunakunapapis Diosninmi.+
30 Teyta Diosqa jukllëlla karmi,+ markäkoq o yärakoq kayanqanrëkur ishpakuyänampa puntanchö señalashqa kaqkunata alli kaqta ruraqtanö rikanqa,+ y markäkuyanqanrëkurmi ishpakuyänampa puntanchö mana señalashqa kaqkunatapis alli kaqta ruraqtanö rikanqa.+
31 Tsëqa, ¿markäkoq o yärakoq kanqantsikrëkurku leyta mana kaqpaq churantsik? ¡Manam tsënötsu! Tsëpa rantinqa, ley ninqantam väleqpaq churantsik.+
Nötakuna
^ Kënöpis niyanmi: pecäduta.
^ Kënöpis niyanmi: ninqänömi.
^ Kënöpis niyanmi: pecädupa.
^ Kënöpis niyanmi: pecädu.
^ Kënöpis niyanmi: pecäduta.
^ O “Diosnö perfectu këta puëdiyantsu”.
^ Kënöpis niyanmi: pecädupita.
^ Kënöpis niyanmi: pecädukunatam.
^ Rikäri “Bibliachö palabrakunata entiendinapaq” neqta.
