Romänus 9:1-33
9 Cristurëkurmi rasumpa kaqta parlä; manam ulikütsu o llullakütsu, y santu espïritu pushaptinmi concienciä musyatsikun
2 alläpa llakikunqäta y shonqüchö imëpis sufrinqäta.
3 Noqaqa munämanmi wawqïkunarëkur y panïkunarëkur maldicishqa nunanö Cristupita rakishqa këta. Pëkunaqa wawqï cuenta kastäkunam kayan,
4 israelïta mayïkuna. Pëkunam tsurinö legitimashqa këta,+ väleqpaq churashqa këta, acuerdukunata,+ Leyta,+ Diosta sirwita+ y Teyta Dios änikunqankunata chaskiyashqa.+
5 Pëkunaqa unë awiluntsikkunapa kastankunam kayan,+ y tsë awiluntsikkunapitam Cristu shamurqan.+ Imëka janampa këkaq Teyta Dios, imëyaqpis alabashqa katsun. Tsënö kallätsun.*
6 Tsënö kaptimpis, tsëqa manam Diospa palabran mana cumplikashqa kanqantatsu rikätsikun. Awmi, manam Israelpa llapan kastankunatsu rasumpa “Israel”+ kayan.
7 Y manam Abrahanpa+ kastan kartsu llapankuna tsurikuna kayan, sinöqa kënö nir qellqarëkanqannömi: “Kastëkikunaqa Isaacpitam kanqa”.+
8 Awmi, manam Abrahanpa llapan kastankunatsu Diospa tsurinkuna kayan,+ sinöqa änikunqanrëkur Teyta Dios akranqan kaqkunam+ Abrahanpa kastankunaqa kayan.
9 Teyta Diosqa kënö nirmi änirqan: “Kënö witsanmi kutimushaq, y warmiki Säraqa wamrayoqnam kanqa”.+
10 Manam tsë kutillatsu tsënö rurarqan, sinöqa juk nunallapata, awmi unë awiluntsik Isaacpata Rebëca millishta qeshyaq tikraptimpis tsënömi änikurqan.+
11 Manaraq yuriyaptin y allita o mana allitapis manaraq rurashqa kayaptin, Teyta Dios pitapis akranqan ruranqampitatsu mana kanampaq, sinöqa akraqnimpita kanampaq
12 Rebëcata kënö nirqan: “Mayor kaqmi menor kaqta sirwinqa”.+
13 Kënö nir qellqarëkanqannö: “Jacobtam kuyarqä, peru Esaütaqa chikirqämi”.+
14 Tsëqa, ¿ima nishunraq? ¿Mana alli kaqtaku Teyta Dios ruran? ¡Manam tsënötsu!+
15 Pëqa Moisestam, “munanqä kaqtam kuyëpa tratashaq, y llakipëta* munanqä kaqtam llakipäshaq”+ nirqan.
16 Tsëmi kikin nuna munanqampitatsu ni kallpachakunqampitatsu, sinöqa llakipäkoq* Diospitam.+
17 Teyta Diospa Palabranchömi Egiptuchö gobernaqta* kënö nin: “Tsënö kaptimpis, alläpa puëdeq kanqäta rikänëkipaq y jutï mëtsëchö reqishqa kanampaqmi ushakätsirqoqraqtsu”.+
18 Tsënömi pëqa munanqan kaqta llakipan, y munanqan kaq chukru shonqu tikrananta permitin.+
19 Ninqäkunata wiyarqa capaz kënö pensëkäyanki: “Pï nunapis munanqampa contran churakëta mana puëdikaptinqa, ¿imanirtan nunakunata acusar këkan?”.
20 Peru ¿pitan qam kanki Teyta Diosta contestanëkipaq?+ ¿Mitupita rurashqatsuraq ruraqninta, “¿imanirtan këtanö ruramarqunki?”+ ninqa?
21 ¿Manaku mituwan imëkata ruraq nunaqa, tsë mitullapita+ especial junaqllachö utilizänampaq y imë hörapis utilizänampaq täzata rurëta puëdin?
22 Tsëqa, ¿ima nishwanraq Teyta Dios cölerashqa këkanqanta y poderninta rikätsikuyta munëkarpis, ushakäyänampaq rurashqa täzanö kaqkunata alläpa pacienciawan aguantanqampita?
23 Tsëtaqa rurarqan llakipashqa kayänampaq täzanö kaqkunata, alläpa puëdeq kanqanta musyatsinampaqmi.+ Pëqa väleqpaq churashqa kayänampaqmi, pëkunata puntallapitana alistarqan.
24 Awmi, pëqa noqantsiktam qayamarquntsik, manam judïu kaqkunallatatsu, sinöqa juk nacion nunakunatapis.+
25 Tsëqa Osëaschöpis kënö ninqannömi: “Mana sirwimaqnï kaqkunatam, ‘sirwimaqnïkunam kayanki’+ nishaq, y mana kuyayanqan warmitam ‘kuyë warmï’+ nishaq.
26 Y ‘manam sirwimaqnïkunanatsu kayanki’ ninqä sitiuchömi, ‘kawëkaq Teyta Diospa tsurinkuna’ niyäshunki”.+
27 Manam tsëllatsu, Isaïaspis Israelpaqmi kënö nin: “Israelpa kastankuna lamar kuchunchö arënanö mëtsikaq karnimpis wallkaqllam salvakuyanqa.+
28 Awmi, Teyta Jehoväqa* rasmi o sasmi kë patsachö nunakunata llapanta juzganqa”.+
29 Y Isaïas kënöpis willakunqannö: “Angelkunata mandaq Teyta Jehovä* wakin kastantsikkunallatapis mana salvashqa kaptinqa, Sodöma y Gomörra markakunachö nunakunanöchi ushakashwan karqan”.+
30 Tsëqa, ¿ima nishuntan? Juk nacion nunakunaqa, allita rurëta mana munëkarmi, allita ruraqnö rikashqa kayashqa,+ awmi markäkoq o yärakoq karmi, allita ruraqnö rikashqa kayashqa.+
31 Peru Israel nunakunaqa, ley ninqanta cäsukur alli kaqta ruraqnö rikashqa këta munarpis,* manam ley ninqanta cumpliyarqantsu.
32 ¿Imanir? Pëkunaqa manam markäkurtsu o yärakurtsu allita rikaqnö rikashqa këta ashiyarqan, sinöqa rurayanqankunawanmi. “Ishkitsikoq rumiwanmi” trompizayarqan;+
33 kënö nir qellqarëkanqannö: “¡Rikäyë! Sionchö cimientu kanampaqmi ishkitsikoq rumita y trompizatsikoq qaqata churëkä.+ Pëman markäkoqkunaqa o yärakoqkunaqa manam imëpis llakikuychötsu ushayanqa”.+
Nötakuna
^ O “Amen”.
^ Kënöpis niyanmi: ankupëta; kuyapëta.
^ Kënöpis niyanmi: ankupäkoq; kuyapäkoq.
^ Griëgu idiömachöqa “faraonta” ninmi.
^ O “alli kaqta ruranapaq yanapakoq leyta cumplita tïrarpis”.
