Santiägu 3:1-18
3 Wawqilläkuna, qamkunaqa allim musyayanki yachatsikoq kaqkunaqa wakimpita mas chukrupa juzgashqa kanapaq kaqta, tsëmi llapëkitsu yachatsikoq tikrayankiman.+
2 Llapantsikmi mëtsika kuti pantantsik.*+ Pï nunapis parlanqanchö mana pantarqa, jutsannaq* nunam y entëru cuerpuntam controlëta puëdin.
3 Cäsumänapaq cawallukunata frënuta amutsirqa, entëru cuerpuntam mëpapis apëta puëdintsik.
4 Barcukunatapis, mëtsikan këkäyaptin y fuerti vientu wakman këman apëkaptinmi, taksha timonlla mëpapis apan, y timonta tsaraq nunam ëwëta munanqanman apan.
5 Tsënöllam qallupis, cuerpuchö ichikllanlla këkar imëkapita alabakun. ¡Y rikäyë ichikllan ninallam mëtsika montikunata ushakäratsin!
6 Qallupis nina cuentam.+ Entëru cuerpuntsikchö kaqkunapitaqa, qallum imëka mana allikunata ruratsimantsik.+ Qalluqa entëru cuerputam mana limpiu tikratsin, y Gehënanömi* nunapa vïdanta ushakäratsin.
7 Tukuyläya chukaru animalkunata, pishqukunata, lätëpa pureq animalkunata y lamarchö animalkunatam, nunakunaqa manshuyätsita puëdiyan, y manshuyätsiyashqam.
8 Peru qallutaqa manam pï nunapis dominëta puëdintsu. Dominëta mana puëdina y alläpa mana allita ruraqmi, y wanutsikoq o wañutsikoq mëtsika venënuyoqmi.+
9 Tsëwanmi Teyta Jehoväta* alabantsik, peru tsëwanmi “Dios niraq” rurashqa nunakunatapis maldicintsik.+
10 Tsë shimillapitam bendicionpis y maldicionpis yarqun.
Wawqilläkuna y panilläkuna, manam allitsu tsënö pasanqanqa.+
11 Manam mishkeq yaku yarqamunqampitaqa, asqaq o ayaq yaku yarqamuntsu, ¿aw?
12 Wawqilläkuna y panilläkuna, hïgus plantaqa manam aceitünasta wayuntsu, ¿aw?,+ y manam üvas plantapis hïgusta wayuntsu, ¿aw? Tsënöllam anqaq o pochqoq yaku yarqamunqampitaqa, mishkeq yaku yarqamuntsu.
13 ¿Pitan qamkunachö yachaq y imatapis alli entiendeq nuna? Tsëqa alli portakunqanwan, yachaq nunakunanö imatapis ruranqanchö yachanëpaq kanqanta rikätsikutsun.
14 Peru shonquykikunachö pitapis alläpa envidië+ y contrakoq kë* kaptinqa,+ ama alabakur+ y rasumpa kaqpa contran ulikur o llullakur parlar puriyëtsu.
15 Tsëqa manam ciëlupita shamoq yachëtsu, sinöqa kë munduchö nunakunapita,+ jutsa* ruraq cuerpuntsik munanqampita y demoniukunapita shamoqmi.
16 Mëchöpis envidiakoq kë y contrakoq kë* kanqanchöqa, imatapis lluta rurë y imëka mana allikunapis kanqam.+
17 Peru ciëlupita shamoq yachëqa, puntataqa nunatam limpiuta tikratsin,+ tsëpitanam yamë këta+ ashinampaq, pensanqanllachö mana tsarakunampaq,+ cäsukuyta yachanampaq, alläpa llakipäkoq* kanampaq, imëka allikunata ruranampaq,+ llapankunata igualpa rikänampaq+ y ishkë cära mana kanampaq yanapan.+
18 Manam tsëllatsu, jukkunawan yamë këta asheqkunaqa*+ yamë kë kanampaq yanapakurmi alli kaqta rurayan.+
Nötakuna
^ O “mana allikunata rurantsik”.
^ Kënöpis niyanmi: pecädunnaq. O “perfectu”.
^ Rikäri “Bibliachö palabrakunata entiendinapaq” neqta.
^ O capazchi “imëkatapis ërayëpa munë”.
^ Kënöpis niyanmi: pecädu.
^ O capazchi “imëkatapis ërayëpa munë”.
^ Kënöpis niyanmi: ankupäkoq; kuyapäkoq.
^ O capazchi “yamë këta asheqkunawanqa”.
