Santiägu 5:1-20
5 Kananqa wiyayë rïcu kaqkuna, qamkunaman chämunampaq kaq sufrimientukunarëkur waqar llakikuyë.+
2 Llapan imëkëkikunam ismurishqa y röpëkikunatapis puyum usharishqa.+
3 Kayäpushunqëki örupis y plätapis mojusyärishqam, y mojusyashqa kanqanmi culpayoq kayanqëkita rikätsikunqa y ushakätsiyäshunki. Ushanan tiempuchöqa, imëka juntayanqëkipis ninanömi kanqa.+
4 Rikäyë, chakrëkikunata cosechaq peonkunata mana entregayanqëki pägum qayakur këkan, y yanapakuyta ashir segaqkuna qayakuyanqantam angelkunata mandaq Teyta Jehovä* wiyashqa.+
5 Qamkunaqa imëka jananchö y munayanqëkita rurarmi kë patsachö kawayarqunki. Wanutsiyäshunëki o wañutsiyäshunëki junaqpaqmi qamkunaqa mikur wirayëkäyanki.+
6 Qamkunaqa alli kaqta ruraqtam condenar wanutsiyarqunki. ¿Manaku pëqa contrëkikuna këkan?
7 Tsëmi wawqikuna y panikuna, Señor këkämunqanyaq pacienciayoq kayë.+ Rikäyë, murukoq nunaqa punta tamya y qepa tamya chämunqanyaqmi, patsachö shumaq wayunqanta pacienciawan shuyarar këkan.+
8 Señor këkämunampaq tiempuqa këllachönam këkan.+ Tsëmi qamkunapis pacienciayoq kayë,+ y alli tsarakur këkäyë.
9 Wawqikuna y panikuna, mana juzgashqa kayänëkipaq, ama juknikikuna juknikikunapita quejakur* kayëtsu.+ Rikäyë, Juezqa punkuchönam këkan.
10 Wawqikuna y panikuna, Teyta Jehoväpa* jutinchö willakoqkunapita+ mana allikunapa pasar alli tsarakuyta+ y pacienciayoq këta+ yachakuyë.
11 Rikäyë, alli tsarakoqkunaqa kushishqa* kayanqantam nintsik.+ Qamkunaqa Job alli tsarakunqantam wiyayarqunki,+ y ushananchö pëpaq Teyta Jehovä* imata ruranqanta musyarmi,+ Teyta Jehovä* alläpa kuyakoq y llakipäkoq* kanqanta musyayanki.+
12 Imapitapis masqa, wawqilläkuna y panilläkuna, amana ciëlupa o patsapa jutinchö o imapaqpis jurar kayënatsu. Tsëpa rantinqa, “awmi” niyanqëkiqa awmi katsun, y “manam”+ niyanqëkiqa manam katsun, tsënöpa mana juzgashqa kayänëkipaq.
13 ¿Qamkunachö pillapis sufrikanku? Tsëqa, Teyta Diosman mañakur këkätsun.+ ¿Pillapis kushishqaku këkan? Tsëqa, salmukunata cantatsun.+
14 ¿Qamkunachö pillapis qeshyëkanku? Tsëqa, anciänukunata* qayatsun,+ y pëkuna Teyta Jehoväpa* jutinchö aceitiwan llushir pëpaq mañakuyätsun.+
15 Markäkur o yärakur mañakuyanqanmi qeshyëkaqta* alliyätsinqa, y Jehovämi* sharkatsinqa. Y manam tsëllatsu, jutsata* rurashqa karqa, perdonashqam kanqa.
16 Tsëmi, juknikikuna juknikikuna jutsëkikunata* cläru willanakuyë,+ y alliyätsishqa kayänëkipaq juknikikuna juknikikunapaq mañakuyë. Allita ruraq nuna mañakunqanqa alläpa poderyoqmi.+
17 Elïasqa noqantsiknö sentimientuyoq nunam karqan. Tsënö kaptimpis, mana tamyanampaq llapan shonqunwan Teyta Diosman mañakuptinqa, kima wata joqta killam patsaman tamyarqantsu.+
18 Tsëpitanam yapë mañakurqan, y ciëlupita tamyamuptinmi patsachö imëka wayur qallëkurqan.+
19 Wawqilläkuna y panilläkuna, mëqëkipis rasumpa kaqpita rakikäkuriyaptiki, qamkunapita mëqëkipis kutitsiyämushuptikiqa,
20 alli musyayë mana allita ruranqanta dejanampaq pitapis yanapaq nunaqa,+ wanunampita o wañunqampita salvanqanta y mëtsika jutsata* ruranqampita perdonashqa kanampaq yanapanqanta.+
Nötakuna
^ O “pësakur; cölerakur”.
^ Kënöpis niyanmi: ankupäkoq; kuyapäkoq.
^ O “bendicishqa”.
^ O “cristiänukunata dirigeqkunata”.
^ O capazchi “kallpannaq këkaqta”.
^ Kënöpis niyanmi: pecäduta.
^ Kënöpis niyanmi: pecäduykikunata.
^ Kënöpis niyanmi: pecäduta.
