Tïtu 2:1-15
2 Peru qamqa alli* yachatsikuykuna ninqannö yachatsikur sïgui.+
2 Mayorna ollqukunaqa, imëkachöpis controlakuyta yachaq, respetëpaq y alli juiciuyoqmi kayänan, y markäkoq o yärakoq kayanqanchö, kuyakoq kayanqanchö y alli tsarakoq kayanqanchömi alli këkäyänan.
3 Tsënölla mayorna warmikunapis Teyta Diosta respetar shumaq portakuyätsun, ama calumniakoq kayätsuntsu ni alläpa vïnuta upuyätsuntsu y allita yachatsikuyätsun,
4 tsënöpa mas jövin warmikunata consejayänampaq:* qowankunata o runankunata* y wamrankunata kuyayänampaq,
5 alli juiciuyoq kayänampaq, limpiu shonquyoq kayänampaq, wayinkunachö alli trabajayänampaq,* alli warmi kayänampaq y qowankunata o runankunata* respetar cäsuyänampaq,+ tsënöpa Diospa palabrampita mana allita mana parlayänampaq.
6 Tsënölla mas jövin ollqukunatapis alli juiciuyoq kayänampaq consejar sïgui,+
7 y qampis imëka allikunata rurëchö ejemplu kë. Poqu nunanö* alli kaqta* yachatsikuy,+
8 y wakinkuna mana parlayänampaqnö imëpis alli* kaqta parlë,+ tsënöpa noqantsikpita parlayänampaq imatapis mana tarir chikimaqnintsikkuna penqakuyänampaq.+
9 Sirwipakoqkunaqa imëkachöpis duëñunkunata respetakur cäsukuyätsun:+ kushitsita munar, mana allipa mana contestar
10 y mana suwapar,+ sinöqa imëkachöpis confiakuypaq karnin, tsënöpa salvamaqnintsik Teyta Dios yachatsikunqan imëkanöpa alabashqa kanampaq.+
11 Tukuyläya nunakunapaq salvacionta apamurmi, Teyta Dios alläpa alli kanqanta rikätsikushqa.+
12 Tsëqa yachatsimantsik Teyta Dios munanqampa contran kaqta y kë munduchö nunakuna mana alli munayanqanta melanänapaq,+ y kanan witsan* alli juiciuwan, allita rurar y shonqupita Teyta Diosta sirwir kawanapaqmi,+
13 kushishqa shuyaranqantsik cumplikänanta,+ y alläpa puëdeq Teyta Dios y salvamaqnintsik Jesucristupa chipapäkur rikakuyänanta shuyaranqantsikyaq.
14 Pëqa imëka mana alli rurëkunapita* libri kanapaqmi* noqantsikrëkur wanurqan,+ tsënöpa kuyë markan kanapaq y shonqupita imëka allikunata ruranapaq limpiu tikratsimänapaq.+
15 Autoridäta chaskishqa kar tsëkunapita parlar y jukkunata consejar y corregir sïgui.+ Ama pï nunapis despreciashuytsu.
Nötakuna
^ O “sänu; yanapakoq”.
^ O “juiciunman kutitsiyänampaq; yachatsiyänampaq”.
^ Kënöpis niyanmi: ollqunkunata.
^ O “wayinkunata alli cuidayänampaq”.
^ Kënöpis niyanmi: ollqunkunata.
^ O capazchi “Limpiu shonquwan”.
^ O “gänas gänaslla”.
^ O “sänu; yanapakoq”.
^ O “kanan witsan imëkapis imanö këkanqanchö”. Rikäri “Bibliachö palabrakunata entiendinapaq” neqta.
^ O “leypa contran rurëkunapita”.
^ Griëgu idiömachöqa “salvamänapaqmi; rantimänapaqmi” ninmi.
