Zacarïas 9:1-17
9 Teyta Diosmi këta nin:
“Teyta Jehoväpa nawinkunaqa entëru patsachö nunakunata+y Israelchö llapan kastakunatam rikëkan.
Tsëmi Teyta Jehoväqa Hadracpita nunakunapa contran këkan,peru masqa Damascupita nunakunapa contranmi këkan.+
2 Tsënöllam lindërunchö këkaq Hamatpita+ nunakunapa,Tïrupita+ y Sidonpita+ yachaq tukoq+ nunakunapa contran këkan.
3 Tïrupita nunakunaqa markankunapaqmi jatusaq murällata rurayarqan.
Pëkunaqa mëtsika allpatanömi plätata juntayashqa,y mëtsika mitutanömi* öruta juntayashqa.+
4 Teyta Jehoväqa llapan imëkankunatam apakunqa,soldädunkunatam lamarchö ushakätsinqa+y markankunatapis ninawanmi ushakätsinqa.+
5 Tsëta rikarmi Asquelon markapita nunakunaqa alläpa mantsakäyanqa,y Gäza markapita nunakunapis alläpam yarpachakuyanqa.
Confiakuyanqan marka penqakuychö ushaptinmi, Ecron markapita nunakunapis llakikuyanqa.
Gäza markapita nunakunapaqa manam gobernaqninkuna kanqanatsu,y Asquelon markapis tsunyaqmi quedanqa.+
6 “Forastëru nunakunanam Asdod markachöpis kawayanqa,y orgullösu filisteu nunakunatam penqakatsishaq.+
7 Yawaryoq ëtsatam shiminkunapita ushakätsishaq,melanëpaq mikuykunatam kirunkunapita ushakätsishaq,y filisteu nunakunapita quedaqkunaqa noqapaqmi kayanqa”.
Pëkunaqa Judächö dirigeqkunanömi kayanqa,+y Ecron markapita nunakunanam jebuseu nunakunanö kayanqa.+
8 “Sirwimaqnïkuna imëkapa pasayanqantam rikarqö,tsëmi witsëpa urëpa pasaqkunapita defendinäpaqwayïpa lädunchö carpä* armashaq,+y manam ni mëqan mandakoq* tsëpa pasanqanatsu.+
9 Sionpita nunakuna* kushikur büllayë.
Jerusalenpita nunakuna* alläpa kushikuyë.
¡Rikäyë! Gobernaqnikikunam qamkuna kaqman shamuykan.+
Pëqa imëpis alli kaqtam ruran y salvaciontam apamun.
Pëqa humildim+ y ashnun montashqam shamun.
Awmi, china ashnupa wawanta montashqam shamun.+
10 Pëqa Efrainchö markakunapitam guërrapaq carrëtakunata ushakätsinqa,Jerusalenpitanam cawallukunata ushakätsinqa.
Pelyar utilizäyanqan flechakuyänantam ushakätsinqa,y mëtsë nacionpita nunakunatam yamë kawakuypita parlapanqa.+
Pëqa inti o rupay yarqamunan läduchö lamarpita inti jeqanan läduchö lamaryaqmi gobernanqa,Eufratis mayupita* qallëkur patsapa mas karu kuchunyaq.+
11 Yawarta utilizar acuerduta ruranqantsikpitamyakunnaq pözuchönö prësu këkaq tsurikikunata salvamushaq.+
12 Libri këta shuyarëkaq prësukuna, alli murallashqa markaman kutiyë.+
Kananmi qamkunata nï:*
‘Imëkata sufriyanqëkipitam ishkë kuti bendiciyashqëki.+
13 Judä nunakunam flechakunänö kayanqa,Efrain nunakunam flëchanö kayanqa,y griëgu nunakunapa contranmiSionpita nunakunata churashaq,y pelyëta yachaq nunapa espädantanömi tikratsishaq’”.*
14 Teyta Jehovä sirweqninkunawan këkanqantam cläru rikäyanqay flëchankunapis räyunöran ëwanqa.
Llapanta Gobernaq Teyta Jehoväqa, waqrata tocarmi+sur lädupita vientuntin tamyanöraq chikeqninkunawan pelyaq ëwanqa.
15 Angelkunata mandaq Teyta Jehovä defendiptinmisirweqninkunaqa rumiwan warakëkäyaptimpis chikeqninkunata venciyanqa.+
Vïnuta upushqanömi kushikur büllayanqa.
Pëkunaqa vïnuwan junta këkaq tazonnö,y altarpa esquïnanman jichayanqan yawarnömi kayanqa.+
16 Sirweqninkunaqa corönachö shumaq rumikunanömi markankunachö chipapäyanqa.
Tsëmi mitsikoq üshankunata salvaqnö,+Jehovä Diosqa sirweqninkunata tsë junaq salvanqa.+
17 ¡Pëkunaqa alläpa alli kanqanta,+y alläpa shumaq kanqantam rikäyanqa!
Mikuy y llullu vïnum jövinkunatay shipashkunata kallpayoqta tikratsinqa”.+
Nötakuna
^ Kënöpis niyanmi: leqitatanömi.
^ Kënöpis niyanmi: toldü.
^ O “capataz”.
^ O “Jerusalenpa warmi wamran”.
^ O “Sionpa warmi wamran”.
^ Kënöpis niyanmi: riupita.
^ Kënöpis niyanmi: niyaq.
^ Tsënö nirqa, capazchi Sionpita nunakunapaq parlëkan.
