Ageu 1:1-15
1 Gobernaq Darïu ishkë watanöna gobernëkaptinmi, joqta killa qallanan junaq, Judächö gobernador Sealtielpa tsurin Zorobabelta+ y Jehozadacpa tsurin mandakoq sacerdöti Josuëta, willakoqnin Ageuwan*+ Teyta Jehovä kënö willatsirqan:
2 “Angelkunata mandaq Teyta Jehovämi këta nin: ‘Kë nacionchö nunakunaqa, “manam tiempuraqtsu Teyta Jehoväpa wayinta* rurar sïguinapaq”* niyanmi’”.+
3 Willakoqnin Ageuwanmi+ Teyta Jehoväqa yapë kënö willakurqan:
4 “Wayï ushakashqa këkaptinmi, qamkunaqa shumaq wayikunachö kawëkäyanki, ¿alliku kanan tiempuchö tsënö rurëkäyanki?+
5 Angelkunata mandaq Teyta Jehovämi këta nin: ‘Imata rurëkäyanqëkiman alli pensayë.
6 Qamkunaqa atskata mururpis, wallkallatam cosechayanki.+ Mikuyaptikipis manam pachëkikuna juntantsu. Upuyänëkipaq vïnupis wallkallam kapuyäshunki. Röpata vistikurpis manam qoñüyankitsu. Pägupaq trabajaq nunapis, uchkuyoq bolsamanmi pägunta churan’”.
7 “Angelkunata mandaq Teyta Jehovämi këta nin: ‘Imata rurëkäyanqëkiman alli pensayë’.
8 ‘Rurayanqëki wayiwan kushikunäpaq y alabashqa kanäpaq,+ qeruta aparkur jirkaman witsäyë+ y wayïta rurar ushayë’+ ninmi Teyta Jehovä”.
9 “‘Atskata shuyararpis wallkallatam chaskiyarqunki. Wayikikunaman apayaptikipis juk pükëllachömi ushakätsirqä.+ Tsëtaqa rurarqä, wayï ushakätsishqa këkaptin kikikikunapa wayikikunallaman yarpachakushqa kayaptikim, ninmi angelkunata mandaq Teyta Jehovä.+
10 Tsëmi ciëlupita shullyapis* shikwamurqantsu y chakrëkikunachö muruyanqëkipis allillaqa wayurqantsu.
11 Patsaman y jirkakunaman mana tamyatsimuptïmi, gränuykikuna, vïnuykikuna, aceitikikuna y ima plantakunapis karqantsu. Tsëmi qamkuna y animalnikikunapis sufriyarqëki, ardëllam* imëkata rurar trabajayarqëki’”.
12 Sealtielpa+ tsurin Zorobabel,+ Jehozadacpa+ tsurin mandakoq sacerdöti Josuë y wakin israelïtakunaqa, Jehovä Diosninkuna mandashqa kaptinmi willakoqnin Ageu willakunqanta y Jehovä Diosninkuna ninqanta cäsukuyarqan, y llapankunam Teyta Jehoväta alläpa respetayarqan.
13 Tsëpitanam Teyta Jehoväpa willakoqnin Ageuqa, Teyta Jehovä mandanqannölla llapan nunakunata willarqan: “‘Qamkunawanmi këkä’+ ninmi Teyta Jehovä”.
14 Tsënö nirmi Teyta Jehoväqa, Judächö gobernador Sealtielpa+ tsurin Zorobabelta, Jehozadacpa tsurin mandakoq sacerdöti Josuëta+ y wakin israelïtakunata yanaparqan,+ angelkunata mandaq Jehovä Diosninkunapa wayinta rurar sïguiyänampaq.+
15 Tsëqa pasarqan, gobernaq Darïu ishkë watanöna gobernëkaptin, joqta killa veinticuatru junaqmi.+
Nötakuna
^ Tsë jutiqa, “fiesta junaqchö yurishqa” ninanmi.
^ O “templunta”.
^ O “yapë ruranapaq”.
^ Kënöpis niyanmi: shullapis; shushalpis; shushapis.
^ Kënöpis niyanmi: yaptallam.
