Apocalipsis 4:1-11
4 Tsëpitanam ciëluchö punku kicharëkaqta rikarqä, y puntata parlapämaqpa vozninqa trompëta waqaqnömi karqan, y kënömi nimarqan: “Këman witsämuy, pasanampaq kaqkunatam rikätsishqëki”.
2 Tsëpitaqa jinan höram santu espïritupa poderninchö karirqä. Y ciëluchömi gobernar täkunata, y tsë gobernar täkunachö juk tëkaqta rikarqä.+
3 Tsëchö tëkaqpa rikëninqa jaspi ruminö+ y sardiu ruminömi* karqan, y tsë gobernar täkunapa entëru lädunchömi esmeralda niraq turmanyë këkarqan.+
4 Tsë gobernar täkunapa entëru lädunchömi veinticuatru gobernar täkunakuna karqan, y tsëkunachömi veinticuatru gobernaqkuna tëkäyarqan.+ Pëkunaqa yuraq röpawan vistishqa, y peqankunachö o umankunachö örupita corönayoqmi kayarqan.
5 Gobernar täkunapitam tillapyanqan,+ parlayanqan y räyukuna yarqamoq;+ y tsë gobernar täkunapa puntanchömi qanchis chiwchikuna rawrëkäyarqan o lunyëkäyarqan. Tsëkunaqa Teyta Diospa qanchis espïritunkunatam rikätsikun.+
6 Gobernar täkunapa puntanchömi, cristal niraq vidriupita lamar këkarqan.+
Gobernar täkunapa chowpinchö* y entëru lädunchömi, puntapa y qepapa nawikunayoq junta chusku querubinkuna karqan.+
7 Punta kaq querubinqa leon niraqmi karqan,+ ishkë kaq querubinnam töru niraq karqan,+ kima kaq querubinnam+ nunanö cärayoq karqan y chusku kaq querubinnam+ volëkaq pichak*+ niraq karqan.
8 Tsë chusku querubinkunaqa joqta älayoqmi kayarqan, y tsë älankuna janampa y rurimpam nawikuna junta karqan.+ Y paqasta junaqtam seguïdu kënö niyan: “Limpiu, limpiu, limpium Llapanta Puëdeq, kashqa kaq y kanan këkaq y shamoq kaq+ Jehovä* Dios”.+
9 Gobernar täkunachö tëkaq imëyaqpis kawaqta,+ querubinkuna punta puntaman churayaptin, respetayaptin y agradecikuyaptinmi,
10 veinticuatru gobernaqkunaqa,+ gobernar täkunachö tëkaqpa puntanman qonqurikur imëyaqpis kawaqta adorayan. Corönankunata gobernar täkunapa puntanman jitëkurmi kënö niyan:
11 “Diosnïkuna Jehovä,* qammi llapan imëkata kamarqunki,+ y qam munaptikim* yuriyashqa y kamashqa kayashqa. Tsëmi qamlla derëchuyoq kanki punta puntaman churayäshunëkipaq,+ respetayäshunëkipaq+ y poderyoq+ kanëkipaq”.
Nötakuna
^ O “puka color alläpa shumaq ruminömi”.
^ Kënöpis niyanmi: pullanninchö.
^ Kënöpis niyanmi: anka; pichaka.
^ O “qam tsënö kananta munaptikim”.
