Daniel 11:1-45
-
Persiapa y Greciapa gobernantinkuna (1-4)
-
Sur läduchö y norti läduchö gobernantikuna (5-45)
-
Impuestuta cobrakoq nunam kanqa (20)
-
Acuerduta ruraq mandakoqtam wanutsiyanqa (22)
-
Alli següru markakunachö këkaq santukunatam adoranqa (38)
-
Sur läduchö gobernantim, norti läduchö gobernantiwan guërrata ruranqa (40)
-
Inti o rupay yarqamunan läduchö y norti läduchö pasanqanta willayaptinmi alläpa cöleranqa (44)
-
11 Media nacionpita Darïu+ juk watana gobernëkaptinmi, Miguel jutiyoq angelta yanaparqä.
2 Kanan willanqaqqa llapanmi cumplikanqa.
Persia nacionchömi kima gobernantikuna kanqa. Pëkunapa qepanmannam juk gobernanti mas* kanqa, tsë gobernantiqa wakin gobernantikunapita mas rïcum tikranqa. Tsëmi alläpa rïcuyar y puëdeq tikrar, llapan kapunqanta utilizanqa Greciachö gobernantita atacanampaq.+
3 Tsëpitanam juk gobernanti mas kanqa y puëdeq karmi munanqanta ruranqa.+
4 Tsënö gobernëkaptinmi, gobiernunqa patsapa chuskun lädunman rakikanqa.+ Tsëchöqa manam pëpa kastankunanatsu gobernayanqa, sinöqa jukkunanam. Peru manam pënötsu puëdeq kayanqa. Gobiernunqa ushakanqam y jukkunanam gobernayanqa.
5 Sur läduchömi juk mandakoq gobernanti tikrar puëdeq kanqa. Peru juk gobernantim mas puëdeq tikranqa, y punta gobernaqkunapitapis mas puëdeqmi kanqa.
6 Tiempu pasariptinnam tsë ishkan gobernantikunaqa yanapanakuyänampaq acuerduta rurayanqa. Sur läduchö gobernantipa warmi tsurinmi, norti läduchö gobernantiman ëwanqa acuerduta ruranampaq. Peru tsë warmiqa manam puëdeqnatsu kanqa, y kikin gobernantipis manam puëdeqnatsu kanqa. Warmipis, pushaqninkunapis, papänimpis y puëdeq kanampaq yanapaqnimpis jukpa poderninchömi kayanqa.
7 Tsënö këkaptinmi, tsë warmipa juk familian mëtsika soldädunkunawan ëwar norti läduchö gobernantita atacar vencinqa.
8 Y Egiptu nacionmanmi metalpita rurashqa* santunkunata, wakin santunkunata, pläta qellëpita y örupita rurashqa väleq cösasninkunata y mëtsika nunata prësu apanqa. Mëtsika watapam norti läduchö gobernantita witipanqatsu.
9 Tsënam norti läduchö gobernantiqa, sur läduchö gobernantiwan pelyaq ëwanqa, peru vencita mana puëdirmi markanman kutikunqa.
10 Tsënam tsurinkunaqa guërrapaq alistakur mëtsika soldädukunata qayatsiyanqa. Y juk kaqmi* yaku mirar imëkatapis apar ushakätseqnö, mëtsika soldädunkunawan mëtsëpa atacanqa. Peru vencita mana puëdirmi, palaciu wayinyaq pelyar pelyar kutimunqa.
11 Sur läduchö gobernantiqa alläpa cölerarmi, norti läduchö gobernantiwan pelyanqa. Tsë gobernantiqa,* mëtsika soldäduyoq këkaptimpis* vencinqam.
12 Mëtsikaqtam prësu apanqa. Y orgullösum tikranqa. Nunakunatam mëtsika milta ushakätsinqa, peru manam puëdeq kanqanta provechanqatsu.
13 Tsënam norti läduchö gobernantiqa, punta kanqampitapis mastaraq soldädukunata juntanqa. Tsëpita watakuna pasariptinmi, mëtsika soldädunkunawan y imëkankunawan pelyaq ëwanqa.
14 Tsë witsankunaqa mëtsikaqmi sur läduchö gobernantipa contran churakäyanqa.
Markëkichö ladronkunapa tsurinkunapis revelacionchö rikäyanqankuna cumplikänanta munarmi, wakinkuna rurayanqanta rikar contran churakäyanqa, peru manam pensayanqannötsu kanqa.
15 Tsënam norti läduchö gobernantiqa, alli murallashqa markata atacanampaq murälla waqtampa allpata qotunqa y vencinqam. Sur läduchö gobernantipa soldädunkunata* y mas puëdeq soldädunkunatapis vencinqam. Manam defendikuyta puëdiyanqatsu.
16 Sur läduchö gobernantiwan pelyanampaq ëwaqqa munanqantam ruranqa, y manam ni pï imanëta puëdinqatsu. Shumaq Patsa+ niyanqantapis poderninchömi katsinqa y ushakätsita munarqa ushakätsinqam.
17 Llapan soldädunkunawanmi atacaq ëwanqa, tsënö këkarmi llapan yarpanqanta ruranampaq pëwan acuerduta ruranqa. Warmipa wawantam entreganqa, peru pëqa ushakätsinqam. Tsë warmipa wawanqa manam pë munanqanta ruranqantsu.
18 Tsënam pëqa* costa lädupa ëwanqa y mëtsika sitiukunapa dueñun tikranqa. Tsënö puëdeq tukur këkaptinmi soldädukunapa mandaqninqa contran churakar kikinta vencinqa, tsëmi alläpa penqakushqa quedanqa.
19 Tsënam alli murallashqa markakunaman cölerashqa kutinqa, peru tsëchömi ishkinqa y manam tariyanqatsu.
20 Tsë gobernantipa rantinnam, nacionnimpaq impuestuta cobrakoq nuna yëkunqa. Pëpis guërra mana këkaptinmi ichik tiempullachö wanunqa.
21 Tsë gobernantipa rantinnam, despreciayanqan nuna gobernaq yëkunqa. Gobernananta mana munëkäyaptimpis, mana pensayanqan höram imëkata engañakur gobernaq yëkunqa.
22 Imëkatapis ushakätseq yakunö këkäyaptinmi, contran churakaq soldädukunata ushakätsinqa, y acuerdupa+ Mandaqnintapis+ wanutsinqam.
23 Pëwan acuerduta rurashqa kayaptinmi, alli tukurnin engañanqa, y wallkalla grüpu nunakuna yanapaptinmi puëdeq tikranqa.
24 Mana willakurmi imëkayoq provinciakunaman ëwanqa, papänin y awilun mana ruranqantam ruranqa. Guërrachö ganar apanqan cösaskunata y wakin cösaskunatam nunakunata rakipunqa. Y alli murallashqa markakunata atacanampaqpis allim pensanqa, peru ichik tiempullapam kanqa.
25 Tsë gobernantiqa valorarkurmi mëtsika soldädunkunawan alistakunqa sur läduchö gobernantiman pelyaq ëwanampaq. Tsënam sur läduchö gobernantipis mëtsika y puëdeq soldädunkunawan guërrapaq alistakuyanqa. Peru pëqa,* contran tikrayaptinmi sur läduchö gobernantitaqa vencita puëdinqatsu.
26 Juntu mikuyanqan y upuyanqan nunakunallam contran tikrayanqa.
Llapan soldädunkunata vencirmi mëtsikaqta ushakätsiyanqa.
27 Tsëpitanam tsë ishkan gobernantikunaqa mana allikunata rurayänampaq pensayanqa. Y shonqunkunachö jukta rurayänampaq pensëkarmi, mësaman jamëkur alli tukur acuerduta rurayanqa. Peru ushakë chämunampaq manaraq tiempu kaptinmi, parlayanqannöqa imapis rurakanqatsu.+
28 Tsënam norti läduchö gobernantiqa nacionninman imëka riquëzata aparkur kutinqa, y sagrädu acuerdupa contranmi churakanqa. Pensanqanta rurarirmi markanman kutinqa.
29 Tsëpita tiempu pasariptinnam, sur läduchö gobernantiwan pelyanampaq yapë kutinqa, peru manam puntatanötsu vencinqa.
30 Kitimpita+ barcukuna ëwarmi venciyanqa, tsëmi penqakushqa quedanqa.
Tsënam cölerashqa kutirnin sagrädu acuerduta+ ushakätsita munanqa, y imëka munanqantam ruranqa. Sagrädu acuerduta dejareq kaqkunataqa yanapanqam.
31 Soldädunkunaqa* manam respetayanqatsu+ alli murallashqa markachö këkaq sagrädu templuta y manam permitiyanqatsu qarëkunata cada junaq rupatsiyänanta.+
Y imëkata ushakätseq melanëpaqtam tsëman churayanqa.+
32 Acuerdupa contran churakaqkunatam, mana cäsuyänampaq imëkanöpa creitsinqa. Peru Teyta Diosta sirweqkunaqa venciyanqam y pensayanqannömi imatapis rurayanqa.
33 Yachaq nunakunam+ mëtsikaq nunakunata yachatsiyanqa. Carcelatsir, espädawan y ninawan mantsatsir y imëkankunata apakurmi ichik tiempullapa mana alliman ishkitsiyanqa.
34 Mana alliman ishkitsiyaptinnam, ichik tiempupa yanapayanqa. Y mëtsikaqmi alli tukurnin pëkunaman juntakäyanqa.
35 Yachaq nunakunatam ushanan tiempuyaq mana alliman ishkitsiyanqa. Tsënöpam allina, limpiuna y yuraqätsishqana+ kayanqa. Tsëqa pasakunqa Teyta Dios dispunishqan tiempuchöraqmi.
36 Gobernantiqa* llapan munanqantam ruranqa. Y puëdeq tukurmi santukunapita mas puëdeq kanqanta pensanqa. Teyta Diospaqmi+ mana allikunata parlanqa. Tsënömi kanqa castïguta chaskinqan junaqyaq. Teyta Dios ninqanqa llapanmi cumplikanqa.
37 Manam papäninkunapa Teyta Diosninta, ni warmikuna munayanqanta, ni ima santutapis respetanqatsu. Pëllam llapampitapis mas puëdeq tukunqa.
38 Peru alli murallashqa markakunachö këkaq diostam adoranqa. Y papäninkuna mana reqiyanqan diosta adoranampaqmi öruta, pläta metalta, shumaq rumikunata y imëka väleq cösaskunata apanqa.
39 Juk nacion nunakuna adorayanqan diosman confiakurmi, alli murallashqa markakunata atacanqa. Y yanapaqnin nunakunatam churanqa wakin markakunachö mandakoq kayänampaq. Y pagayaptinmi chakrakunata rakinqa.
40 Ushanan tiempuchönam sur läduchö gobernantiqa, pelyata ashipanqa. Tsënam norti läduchö gobernantiqa guërrapaq cärrunkunawan, cawallunkuna montashqa soldädunkunawan y barcunkunawan pelyaq ëwanqa. Y imëkatapis ushakätseq mëtsika yakunömi atska nacionkunata ushakätsinqa.
41 Y Shumaq Patsa niyanqan markamampis atacaqmi yëkunqa.+ Y mëtsika nacionkunatam vencinqa. Edomchö y Moabchö täkoq* nunakuna y ammonïtakunachö mas puëdeq nunakunallam salvakuyanqa.
42 Wakin nacionkunaman y Egiptumampis pelyaqmi ëwanqa.
43 Egiptu nacionpa örunta, pläta metalninta y imëka väleq cösasninkunatam poderninchö katsinqa. Libiu y etïopi nunakunapis pë ruranqantam rurayanqa.
44 Peru inti o rupay yarqamunan läduchö y norti läduchö pasanqanta willayaptinmi, alläpa cölerashqa ëwanqa mëtsikaqta ushakätsinampaq.
45 Shumaq Patsa+ niyanqampa jirkanwan lamar tinkoqchömi campamentuta ruranqa,* peru ushakanqam y manam ni pï yanapanqatsu.
Nötakuna
^ Hebreu idiömachöqa “chusku kaq gobernanti” ninmi.
^ O “metalta chulluykatsir”.
^ Hebreu idiömachöqa “pëmi” ninmi.
^ Capazchi sur kaq gobernanti.
^ Capazchi norti kaq gobernanti.
^ Hebreu idiömachöqa “rikrankunata” ninmi.
^ Capazchi norti kaq gobernanti.
^ Capazchi norti kaq gobernanti.
^ Hebreu idiömachöqa “Rikrankunaqa” ninmi.
^ Capazchi norti kaq gobernanti.
^ Kënöpis niyanmi: täraq; päraq.
^ O “gobernantipa carpanta churanqa”.
