Daniel 12:1-13
12 Tsë witsanmi mandakoq+ Miguel*+ marka mayikikunata yanapanqa. Kë patsachöqa imëpis mana kanqannömi sufrimientu kanqa. Tsënöqa manam kë patsachö nacionkuna kanqampita ni ima sufrimientupis kashqatsu. Tsë witsanqa libruchö jutinkuna+ apuntarëkaq marka mayikikunallam salvakuyanqa.+
2 Wanushqakunam o wañushqakunam* mëtsikaq kawariyämunqa, wakinmi imëyaqpis kawayänampaq y wakinnam imëyaqpis penqapashqa y despreciashqa kayänampaq.
3 Yachaq nunakunaqa ciëlunöraqmi atsikyäyanqa, y allita rurayänampaq yanapakoqkunam estrëllanöraq imëyaqpis chipapäyanqa.
4 Qamqa Daniel ushanan tiempuyaq tsë libruta segurarkuy+ y ama pitapis willëtsu. Mëtsikaqmi musyëta munar alli estudiayanqa y rasumpa kaq yachatsikuytaqa mëtsikaqmi musyayanqa”.+
5 Tsënam noqa Daniel, ishkaq angelkunata mayupa* kë tsimpanchö y wak tsimpanchö shëkaqta* rikarqä.+
6 Jukninmi, yaku jananchö shëkaq* lïnu röpayoq+ kaqta nirqan: “Ninqëkikunaqa espantakuypaqmi, peru ¿tsë llapankuna pasanampaqqa ëka tiemputan pishin?”.
7 Tsënam yaku jananchö shëkaq* lïnu röpayoq kaqqa, ishkan makinta ciëluman pallarkur* imëyaqpis kawaqpa jutinchö nirqan:+ “Tsëpaqqa juk wata, ishkë wata y pullan watam pishin.* Y Teyta Diospa rikëninchö limpiu këkaq nunakuna+ manana puëdiyaptinmi tsë llapan usharinqa”.
8 Peru noqaqa manam tsënö ninqanta entiendirqätsu,+ tsëmi, “¿teytë, tsëkuna ushariptinqa imaraq pasanqa?” nirqä.
9 Tsënam pëqa nimarqan: “Ëwakuy Daniel. Tsë wiyanqëkikunaqa ushanan tiempuchöraqmi musyakanqa y tsë tiempuyaqmi alli segurashqa kanan.+
10 Mëtsikaqmi limpiuna kawakuyanqa, allikunata rurayanqa y mas allina kawakuyanqa.+ Peru mana alli nunakunaqa mana allikunata rurarmi kakuyanqa y manam entiendiyanqatsu. Yachaq nunakunallam entiendiyanqa.+
11 Qarëkunata rupatsiyänanta+ michäkuyanqan junaqpita y ushakätsinampaq melanëpaq cösaskunata churayanqan junaqpitam,+ mil doscientus noventa junaqkuna pasanqa.
12 ¡Alkäbulla tsëta shuyaraq kaq y mil trescientus treinta y cincu junaqkunaman chaqqa, alläpam kushikunqa!
13 Peru qamqa wanukunqëkiyaq o wañukunqëkiyaq* Teyta Dios munanqannö kawakuy. Ushanan tiempuchömi kawarimunki herenciëki chaskinëkipaq”.+
Nötakuna
^ Tsë jutiqa, “¿pitan Diosnöqa?” ninanmi.
^ Hebreu idiömachöqa “allpachö punuykaqkunam” ninmi.
^ Kënöpis niyanmi: riupa.
^ Kënöpis niyanmi: ichirëkaqta.
^ Kënöpis niyanmi: ichirëkaq.
^ Kënöpis niyanmi: ichirëkaq.
^ Kënöpis niyanmi: joqarkur.
^ Tsënö nirqa, kima tiempu pullampaqmi parlëkan.
^ Hebreu idiömachöqa “jamarinqëkiyaq” ninmi.