Daniel 6:1-28
6 Gobernanti Darïuqa, mandakunqan markakunachö yanapayänampaqmi cientu veinti nunakunata churarqan.+ Pëkunam kayänan karqan provinciakunachö gobernadorkunapa mandaqnin.
2 Pëkunata mandaqkunaqa kimam kayarqan, y jukqa Danielmi+ karqan. Provinciakunachö gobernadorkunata mandaqkunaqa,+ tsë kiman nunakunatam llapan rurayanqanta willayaq. Tsënöpa Darïupa qellëninta alli cuidayänampaq.
3 Wakin mandakoq mayinkunapita y provinciakunachö gobernadorkunata mandaqkunapitaqa, Danielmi imëkatapis mas yacharqan.+ Tsëmi gobernantiqa llapan nacionchö mandakunampaq churëta munarqan.
4 Tsënam mandakoq mayinkuna y provinciakunachö gobernadorkunata mandaqkunaqa imëkanöpa Danielta acusëta munayarqan. Peru Danielqa confiakuypaq karmi, gobernanti churanqan trabäjuchö llapantapis allita rurarqan y cumplirqan. Tsëmi imapitapis acusëta puëdiyarqantsu.
5 Tsënam kënö pensayarqan: “Danieltaqa manam imapitapis acusëta puëdishuntsu, peru Diosninta adoranqanwanmi sïqa trampaman ishkitsita puëdishun”.+
6 Tsëpitanam Danielpa mandakoq mayinkuna y provinciakunachö gobernadorkunapa mandaqninkunaqa ëwar gobernantita kënö niyarqan: “¡Teytë Darïu, imëyaqpis kawëkullë!
7 Palaciuchö trabajaq autoridäkuna, dirigentikuna, provinciakunachö gobernadorkunata mandaqkuna, palaciuchö mas mandakoq autoridäkuna y gobernadorkuna juntakëkurmi parlayarqö, juk diosman o juk nunaman mañakuyänampa rantin, treinta junaqpa llapan nunakuna qamllaman mañakayämunampaq. Tsëta mana cäsukoqkunataqa leonkuna këkanqan jatun uchkuman jitarkuyänampaq. Tsëta mandakunqëkita cumplitsinëkitam munayä.+
8 Kananqa teytë Darïu, medu nunakunapa y persa nunakunapa leynin ninqannö, tsë leyta qellqar firmëkullë+ ni pï mana cambianampaq”.+
9 Tsënam gobernanti Darïuqa tsë leyta qellqar firmarqan.
10 Peru Danielqa, gobernanti leyta firmanqanta musyëkurmi wayinta kutikurqan. Altuchö këkaq cuartumpa ventänankunaqa Jerusalen marka lädumanmi kicharëkarqan.+ Tsëchömi imëpis ruranqannö, qonqurikur Teyta Diosman mañakur alabarqan. Tsënömi cada junaq kima kutipa rurarqan.
11 Tsënam chikeqnin nunakuna illaqpita ëwar, Danielta tariyarqan Teyta Diosman mañakuykaqta y rogakuykaqta.
12 Tsëpitanam gobernantiman ëwar mandakunqan leyta yarpätsiyarqan kënö nir: “Teytë Darïu, treinta junaqkunapa qamllaman mañakayämunampa rantin juk diosman o juk nunaman mañakuyaptinqa, leonkuna këkanqan jatun uchkuman jitarkuyänampaqmi juk leyta qellqar firmarqëki”. Tsënam gobernantiqa nirqan: “Awmi, tsënömi kashqa y medu nunakunapa y persa nunakunapa leynin ninqannömi tsë firmanqä leytaqa ni pï cambiatsinqatsu”.+
13 Tsënö niptinnam gobernantita niyarqan: “Judäpita+ prësu apayämunqan Danielqa manam ni qamta ni firmanqëki leyta cäsukuntsu. Pëqa cada junaqmi kima kuti Diosninman mañakun”.+
14 Tsënö niyaptinmi gobernantiqa alläpa llakipar* Danielta salvëta munarqan. Imëkanöpa salvëta munëkaptinmi tardiyarqan.
15 Tsënam Danielta chikeq nunakunaqa gobernantiman ëwar, “teytë Darïu, qamqa allim musyanki medu nunakunapa y persa nunakunapa leyninqa, gobernanti imatapis mandakuptin manana cambianapaq ninqanta” niyarqan.+
16 Tsënö niyaptinmi gobernantiqa leonkuna këkanqan jatun uchkuman Danielta jitarkuyänampaq mandakurqan.+ Y manaraq jitayaptinmi Danielta, “imëpis adoranqëki Diosnikim salvashunki” nirqan.
17 Danielta jitarkurnam jatun uchkuta rumiwan tsaparkuyarqan. Y gobernantiqa mandakunqan mana cambianampaqmi, kikimpa sortïjanwan y yanapaqnin autoridäkunapa sortïjanwan sellarkurqan.
18 Tsëpitanam gobernantiqa palaciunman llakishqa kutirqan. Tsë paqasqa manam mikurqantsu ni punuyta puëdirqantsu. Ni müsicatapis wiyëta* munarqantsu.
19 Patsa waräriptinnam leonkuna këkanqan uchkuman cörripa ëwarqan.
20 Chëkurnam alläpa llakishqa Danielta, “Kawëkaq Diosta sirweq Daniel, ¿imëpis sirwinqëki Diosniki leonkunapita salvashurqunkiku?” nir qayarqan.
21 Tsënam Danielqa kënö nimurqan: “¡Teytë Darïu, imëyaqpis kawëkullë!
22 Teyta Diosnïmi jutsannaq* kanqäta rikar, angelninta mandamushqa leonkunapa shiminta tsaparkunampaq,+ tsëmi imanayämashqatsu.+ Y manam qampa contrëkipis teytë Darïu, mana allikunataqa rurarqötsu”.
23 Gobernantiqa alläpa kushikurmi, leonkuna këkanqan jatun uchkupita Danielta sutayämunampaq mandakurqan. Diosninman confiakuptinmi Danieltaqa leonkuna ni ichikllapis ashpishqatsu kayänaq.+
24 Tsënam gobernantiqa mandakurqan Danielta acusaq nunakunata, warminkunata y tsurinkunata apar leonkuna këkanqan jatun uchkuman jitarkuyänampaq. Jitarkuyaptinllanam leonkunaqa mikukurkuyarqan y tullunkunatapis kachur ushakäratsiyarqan.+
25 Tsëpitanam gobernanti Darïuqa llapan markakunachö y nacionkunachö nunakunaman y imëka idiömata parlaqkunaman kënö nir cartakurqan:+ “¡Qamkunapaqmi salüduta apatsikamü!
26 Kananmi mandakü, mëtsë markachö karpis mandädüchö këkaq llapan nunakuna, Danielpa Diosninta respetayänampaq.*+ Pëpa Diosninqa imëyaqpis kawaq Diosmi. Pëllam imëyaqpis mandakoq kanqa y pëllam imëyaqpis gobernanqa.+
27 Pëmi sirweqninkunata imëka peligrupita tsapan+ y salvan, milagrukunatam ruran, y ciëluchö y patsachöpis espantëpaqkunata ruran.+ Pëmi Danieltapis leonkunapita salvashqa”.
28 Danielqa allim kawakurqan Darïu+ y Cïru gobernayanqan witsan. Cïruqa persa nunam karqan.+
Nötakuna
^ Kënöpis niyanmi: ankupar; kuyapar.
^ O capazchi “müsica tocaqkunaqa ëwayarqantsu”.
^ Kënöpis niyanmi: pecädunnaq.
^ Arameu idiömachöqa “mantsayänampaq” ninmi. Rikäri “Bibliachö palabrakunata entiendinapaq” neqta.