Daniel 8:1-27
8 Belsasar+ kima watapa gobernëkanqan witsanmi, noqa Daniel yapë revelacionta rikarqä.+
2 Elam provinciachö+ këkaq Süsa palaciuchömi këkarqä.+ Tsëchö këkarmi imëka suëñuychönö Ulai mayu* kuchunchöna këkarqä.
3 Rikarkunäpaqmi, ishkë waqrayoq+ carnëru+ mayu* kuchunchö këkänaq. Ishkan waqrankunam jatun karqan, peru jukninmi mas jatun karqan.+
4 Tsë carnëruqa inti o rupay jeqanan läduman, norti läduman y sur lädumanmi takakur këkarqan. Manam ni ima chukaru animalpis vencita puëdirqantsu, ni jukta maqaptin defendita puëdiyarqantsu.+ Munanqanta rurarmi puëdeq tikrarqan.
5 Tsëta rikarëkaptïmi inti o rupay jeqanan lädupita juk chïvu*+ entëru patsapa pasamur, patsata mana jaruyllapa shamurqan. Tsë chïvupaqa jukllëllam jatun waqran karqan.+
6 Y mayu* kuchunchö këkaq ishkë waqrayoq carnërumanmi, cölerashqa llapan kallpanwan maqaqnin cörripa ëwarqan.
7 Cölerashqa maqarmi ishkan waqranta pakirapurqan, tsëmi carnëruqa imanö defendikuytapis puëdirqantsu. Patsaman ishkitsirmi jarur usharqan y manam ni pï defendita puëdirqantsu.
8 Tsënam chïvuqa* mas puëdeq tikrarqan, tsënö këkaptinmi jatun waqran pakirqan. Tsë waqrapa rantinnam jatusaq chusku waqrakuna yurimurqan. Tsë waqrakunaqa chusku lädumanmi rikarëkarqan.+
9 Juk kaq waqrampitanam juk taksha waqra yarqamurqan. Tsë waqram sur läduman, inti o rupay yarqamunan läduman y Shumaq Patsa niyanqan läduman jatunyarqan.+
10 Jatunyarmi ciëluchö soldädukuna* kaqyaq charqan. Y wakin soldädukunata ishkitsimurmi patsachö jarur usharqan.
11 Hasta soldädukunapa Mandaqnintam mana kaqpaq churarqan, y manam munarqantsu qarëkunata cada junaq Mandakoqpaq rupatsiyänanta y templuntapis alli rurashqa këkaptinmi ushakäratsirqan.+
12 Y pëpa poderninchömi mëtsika soldädukuna kayarqan, tsëmi qarëkunata cada junaq rupatsita puëdiyarqannatsu. Tsë waqraqa rasumpa kaqtam mana kaqpaq churarqan, y ninqannömi imëkatapis rurarqan.
13 Y juk angeltam wiyarqä parlëkaqta, tsënam angel mayin kënö tapurqan: “¿Imëyaqraq ofendiyanqa y imëyaqraq qarëkunata cada junaq rupatsita puëdiyanqatsu?+ ¿Imëyaqraq templuta y soldädukunata jarur kayanqa?”.
14 Tsënam noqata nimarqan: “Tsëpaqqa dos mil trescientus junaqkunaraqmi* pasanan. Tsë pasariptinmi templuqa punta kanqannö kanqa”.
15 Tsëpitanam tsë rikanqä imapaq kanqanta entiendita munar pensëkaptï, juk nuna niraq puntäman yurirkamurqan.
16 Tsëpitanam wiyarqä Ulai+ mayu* chowpinchö* juk nunapa voznintanö y fuertipam, “Gabriel,+ tsë rikanqan imapaq kanqanta entiendïkatsi” nimurqan.+
17 Tsëmi lädüman Gabriel shamuptin, alläpa mantsakar patsamampis urkü chanqanyaq qonqurikurqä. Pëqa kënömi nimarqan: “Nunapa tsurin, llapan rikanqëkiqa ushanan tiempuchöraqmi pasakunqa”.+
18 Tsënö parlapëkämaptinmi, qonqurirëkanqächö punukarqä. Tsënam pëqa sharkatsimänampaq yatëkamarqan.+
19 Tsëpitam nimarqan: “Teyta Dios cölerar ushanan tiempuchö ruranampaq kaqkunata entienditsishqëki. Tsëqa dispuninqan tiempuchömi cumplikanqa.+
20 Ishkë waqrayoq carnëruta rikanqëkiqa Media y Persia nacionpa gobernantinkunam kayan.+
21 Y rikanqëki chïvuqa* Grecia nacionpa gobernantinmi.+ Y jatun waqranqa, puntata gobernaq kaqmi.+
22 Tsë jatun waqra pakiriptin chusku waqrakuna yarqamoqqa, tsë nacion chuskuman+ rakikänampaq kaqmi, peru manam punta kaq nacionnötsu puëdeq kanqa.
23 Pëkuna gobernayänan tiempu ushëkaptinnam, imëka jutsata* rurayaptin, mantsanëpaq gobernanti yurimunqa. Tsë gobernantiqa ni pï mana entiendinqankunatam entiendinqa.*
24 Puëdeqmi tikranqa, peru manam kikimpa poderninwantsu tsënö kanqa. Imëkata ruranqanmi alli yarqunqa y munanqanta rurarmi llapanta ushakätsinqa. Puëdeqkunatapis y Teyta Dios akranqankunatapis ushakätsinqam.+
25 Y musyaq tukurmi, munanqanta logranampaq engañakunqa. Orgullösu tikrarmi mëtsikaqta illaqpita wanutsinqa, y mandakoqkunapa Mandaqnintapis chikinqam. Tsënö këkarmi illaqpita ushakärinqa, peru manam nunatsu ushakätsinqa.
26 Imëka suëñuchönö junaqkunapaq* niyäshunqëkiqa rasumpam, y tsë llapanqa atska tiempu pasariptinraqmi cumplikanqa. Tsëmi pitapis willanëkitsu”.+
27 Tsë llapanta imëka suëñuchönö rikashqa karmi, noqa Daniel, kallpannaq tikrarqä y atska junaqkunapam qeshyarqä.+ Tsëpita alliyarmi gobernantipaq yapë trabajar qallëkurqä,+ peru suëñunqäman yarpachakurmi imanö këtapis puëdirqätsu.+
Nötakuna
^ Kënöpis niyanmi: riu.
^ Kënöpis niyanmi: riu.
^ Kënöpis niyanmi: orqu cabra.
^ Kënöpis niyanmi: riu.
^ Kënöpis niyanmi: orqu cabraqa.
^ “Ciëluchö soldädukuna” nirqa, Bibliachöqa parlëkan ciëluchö kaqkunapaqmi; estrëllakunapaq, angelkunapaq o nunakunapaq.
^ Hebreu idiömachöqa “tardikunaraq y qoyakunaraq” ninmi.
^ Kënöpis niyanmi: riu.
^ Kënöpis niyanmi: pullanninchö.
^ Kënöpis niyanmi: orqu cabraqa. Hebreu idiömachöqa “millwasapa chïvu” ninmi.
^ Kënöpis niyanmi: pecäduta.
^ O “alläpam ulikuyta o llullakuyta yachanqa”.
^ Hebreu idiömachöqa “tardikunapaq y qoyakunapaq” ninmi.
