Deuteronomiu 21:1-23
-
Wanushqa nunata tarir imata rurayänampaq (1-9)
-
Prësu apëkäyanqan warmiwan casakuyta munar imata rurayänampaq (10-14)
-
Mayor kë derëchuta mëqan tsurita entregayänampaq (15-17)
-
Mana cäsukoq wamrakunawan imata rurayänampaq (18-21)
-
Qeruman warkushqa kaqkunaqa, Diospa rikënimpaqmi melanëpaq kayan (22, 23)
21 Teyta Jehovä entregayäshunqëki chakrachö wanushqa nunata tarirnin pï wanutsishqa kanqanta mana musyayaptikiqa,
2 markëkikunachö dirigeqkuna y juezkunam+ tsëta rikaq ëwayänan. Aya këkanqampita mëqan marka mas amänu kanqantam rikäyänan.
3 Y tsë mas amänun markachö dirigeqkunam, manaraq trabajashqa mallwa töruta akrayänan.
4 Yaku kanqan y mana muruyanqan pampaman apëkurmi, kunkanchö wirur* tsë töruta wanutsiyänan.+
5 Sacerdötikunam tsë sitiuman ëwayänan. Pëkunataqa Teyta Jehovämi akrashqa pëta sirwiyänampaq,+ y Teyta Jehoväpa jutinchö bendicionkunapaq parlayänampaq.+ Pëkunam pillapis nuna mayinta wanutsiptinqa, imanö arreglayänëkipaq niyäshunki.+
6 Aya këkanqampita mas amänun markachö dirigeqkunam, tsë wanutsiyanqan törupa jananchö makinkunata yakuwan awikuyänan.*+
7 Y kënömi niyänan: ‘Manam noqakunatsu kë nunata wanutsiyarqö, manam pï wanutsinqantapis rikäyarqötsu.
8 Teytäkuna Jehovä, ama kë nuna wanunqampita salvamunqëki sirwishoqnikikunata tumpëtsu*+ ni pëkunata castiguëtsu’.+ Tsënö rurarqa, manam tsë nuna wanunqampita culpayoqtsu kayanki.
9 Teyta Jehoväpa rikënimpaq alli kaqta rurarmi, pï nunapis wanunqampita culpayoqtsu kayanki.
10 Chikishoqnikikunawan pelyaq ëwar, Teyta Jehovä yanapayäshuptiki pëkunata vencir prësu apëkarnin,+
11 juk shumaq warmita rikar warmikikuna kananta munarqa,
12 puëdiyankim wayikikunaman apakuyta. Tsë warmiqa llapan aqtsantam rutukunan, shillunkunatam altsapäkunan
13 y vistirëkanqan röpatam cambiakunan. Papänimpaq y mamänimpaq juk killapa waqariptinmi,+ pëwan oqllanakuyta puëdinki. Tsënöpam warmi ollquna kayanki.
14 Peru tsë warmi mana gustayäshuptikiqa, libri ëwakunantam dejayänëki.+ Warmikikuna kashqa kaptinmi, tsë warmita rantikuyänëkitsu ni mana alli tratayänëkitsu.
15 Pï nunapis ishkë warmiyoq kaptin, mana kuyanqan* warmichö mayor tsurin yuriptinqa,+
16 tsë tsurintam mayor kë derëchunta entreganan. Manam kuyanqan warmichö tsurintatsu, mana kuyanqan warmichö mayor tsurimpa derëchunta entreganan.
17 Mana kuyanqan warmichö mayor tsurintam, mayor kë derëchunta entreganan. Punta tsurin kashqa kaptinmi, wakin tsurinkuna chaskiyanqampita juk kuti masta entreganan.+
18 Pï nunapa tsurimpis mana cäsukoq kar papäninta ni mamäninta mana respetaptin+ y corregiyaptimpis mana wiyakuptinqa,+
19 papäninwan mamäninmi markapa yëkunanchö dirigeqkunaman apayänan.
20 Y pëkunatam kënö niyänan: ‘Kë wamräkunaqa manam cäsuyämantsu ni respetayämantsu. Mikuyllapaqmi löcuyäkun+ y upyakurllam kakun’.+
21 Tsëpitanam ollqu mayinkuna rumiwan wanutsiyänan. Tsëta rikarmi israelïta mayikikunaqa mantsakurnin tsë mana alli rurëkunata rurayanqatsu.+
22 Pï nunatapis jutsata* ruranqampita wanutsir+ qeruman warkurqa,+
23 manam patsa waranqanyaq warkurëkaqta dejayänëkitsu.+ Tsëpa rantinqa, Teyta Jehovä entregayäshunqëki markakuna imëpis limpiu kanampaqmi, wanutsiyanqëki junaqlla pampayänëki.+ Qeruman warkushqa kaqkunaqa, Teyta Diospa rikënimpaqmi melanëpaq kayan.*+
Nötakuna
^ Kënöpis niyanmi: garrutir.
^ Kënöpis niyanmi: paqakuyänan; mayllakuyänan.
^ Kënöpis niyanmi: acusëtsu.
^ O “chikinqan”.
^ Kënöpis niyanmi: pecäduta.
^ O “Diospitam castïguta chaskiyan”.
