Efesius 3:1-21
3 Tsëmi noqa Pablu, Cristu Jesusrëkur y qamkuna juk nacion nunakunapa biennikikunarëkur prësu këkä.+
2 Qamkunaqa següru musyayankichi, Teyta Dios alläpa alli kanqanta provechayänëkipaq qamkunata yanapayänaqpaq* carguta chaskishqa kanqäta.+
3 Qamkunaman qellqamur wallkallachö niyanqaqnöpis, tsë pakarëkaq sagrädu noticiataqa revelacionchömi chaskirqä.
4 Tsëmi qamkunaman qellqamunqäta leyirqa, Cristupita pakarëkaq sagrädu+ noticiata alli entiendinqäta cuentata qokuriyanki.
5 Kanan witsanchö akranqa apostolninkunata y willakoqninkunata santu espïritunwan revelanqannöqa, manam unë witsan nunakunata kë pakarëkaq noticiata musyatsirqantsu:+
6 Cristu Jesuswan juknölla kar y alli noticiakunata chaskiyanqanrëkur, juk nacion nunakuna herenciata chaskeq mayïkuna kayänampaq kaqta, tsë grüpullapita kayänäpaq kaqta+ y Dios änikunqanta noqakunawan juntu chaskiyänampaq kaqta.
7 Teyta Dios alläpa alli kaptinmi, noqaqa tsë sagrädu noticiata entiendiyänëkipaq yanapayäshoqniki* tikrarqä. Tsë debaldi qarëtaqa poderninwan yanapamaptinmi chaskirqä.+
8 Limpiu nunakunapita mas mana kaqlla këkarmi,+ Teyta Dios noqawan alläpa alli kaptin carguta chaskirqä,+ Cristupa mana yupëpaq bendicionninkunapita alli noticiakunata juk nacion nunakunata willanäpaq,
9 y imëkata kamaq Teyta Dios, mëtsika tiempupa pakarätsinqan sagrädu noticiata+ imanö musyatsikuykanqanta nunakunata willanäpaq.
10 Tsëqa karqan, congregacionchö kaqkunarëkur,+ gobiernukuna y ciëlu sitiukunachö autoridäkuna, Teyta Dios yachaq kanqanta imëkanöpa rikätsikunqanta musyatsiyänampaqmi.+
11 Tsëqa Señornintsik Cristu Jesuswan cumplinampaq, Teyta Dios imëyaqpis kanampaq patsätsinqan munëninmannömi këkan.+
12 Përëkurmi mana mantsakushpa parlëta puëdintsik, y Cristuman markäkurmi o yärakurmi mana mantsakushpa Teyta Diosman mañakuyta puëdintsik.+
13 Tsëmi qamkunarëkur imëka sufrimientuta pasëkanqäpita mana qelanäkuriyänëkipaq mañayaq. Tsëkunata pasanqäqa qamkuna alabashqa kayänëkipaqmi.+
14 Tsërëkurmi Teytapa puntanman qonqurikü.
15 Përëkurmi ciëluchöpis y patsachöpis familiakuna kan.
16 Alläpa puëdeq Teyta Dios kar santu espïritumpa poderninwan shonquykikunata fuerti tikratsinampaqmi pëman mañakü.+
17 Teyta Diosmanmi mañakü, markäkoq o yärakoq kayanqëkirëkur, shonquykikunachö Cristuta katsiyänëkipaq y jukkunata kuyayänëkipaq.+ Tsënöllam mañakü, firmi kayänëkipaq+ y creikuyanqëkichö alli patsakashqa kayänëkipaq,+
18 tsënöpa limpiu nunakunawan juntu, Teyta Diospa kaqkuna,* ima anchu, ima largu, ima jatun y ima ruri kanqanta entiendita puëdiyänëkipaq,
19 y imëkata musyëpitapis Cristu kuyakoq kanqan mas väleq kanqanta musyayänëkipaq,+ tsënöpa Teyta Dios qarakunqan imëka allikunata chaskiyänëkipaq.
20 Kananqa, noqantsikchö këkaq poderninwan,+ mañanqantsikpita y pensanqantsikpita mëtsika masta rurëta puëdeqta,+
21 awmi, Teyta Diosta, congregacionchö kaqkunarëkur y Cristu Jesusrëkur, llapan nunakuna imëyaqpis alabayätsun. Tsënö kallätsun.*
Nötakuna
^ Kënöpis niyanmi: yanapanäpaq.
^ Griëgu idiömachöqa “tsëkunapa sirweqnin” ninmi.
^ O “rasumpa kaqkuna”.
^ O “Amen”.
