Efesius 4:1-32
4 Tsëmi noqa Señor-rëkur prësurëkaq,+ qayashqa kayanqëkimannö shumaq portakuyänëkipaq+ rogayaq:
2 imëpis humildi,+ yachanëpaq y pacienciayoq kayë;+ kuyakoq kar jukniki juknikikuna aguantanakuyë;+
3 llapan puëdiyanqëkita rurayë, juntu kanapaq yanapakoq yamë kë y santu espïritu yanapayäshuptiki imëpis juknölla kayänëkipaq.+
4 Juk cuerpulla+ y juk santu espïritullam kan,+ y qamkunapis äniyäshunqëkita shuyaräyänëkipaqmi+ akrashqa kayarqunki.
5 Juk Señorlla,+ juk creencialla y juk bautismullam kan.
6 Llapan nunakunapaqpis juk Dioslla y juk Teytallam kan. Pëqa llapantam gobernan, llapantsikwanmi imëkata ruran y podernimpis llapantsikchömi këkan.
7 Cristu qarëta imanö rakipämanqantsikchömi, Teyta Dios noqantsikwan alläpa alli kanqanta cada ünu rikarquntsik.+
8 Awmi, Teyta Diospa Palabranchömi kënö nin: “Altu sitiuta ëwakurmi nunakunata prësu apakurqan, y congregacionchö kaqkunatam nunakunata qarëtanö entregarqan”.+
9 Peru, ¿imatataq rikätsikun “altu sitiuta ëwakurmi” nirqa? ¿Manaku tsëqa puntata urämushqa kanqanta, awmi, kë patsaman urämushqa kanqanta rikätsikun?
10 Urämoq kaqllam, llapan imëkata cumplitsinampaq,+ ciëlupita mas altuman ëwarqan.+
11 Wakintam apostol kayänampaq churarqan,+ wakintanam Teyta Diospa willakoqnin kayänampaq,+ wakintanam alli noticiakunata willakuyänampaq,+ wakintanam Teyta Diospa sirweqninkunata cuidayänampaq* y yachatsikoq kayänampaq.+
12 Pëkunataqa churarqan, limpiu nunakunata corregiyänampaq,* wakinkunata sirwiyänampaq y alli kayänampaq Cristupa cuerpunnö kaqkunata yanapayänampaqmi.+
13 Pëkunaqa creikunqantsikchö juknölla kanapaq y Teyta Diospa Tsurinta alli reqinapaqmi yanapamantsik, tsënömi poqu nuna tikrashun+ y Cristu poqu kanqannö kashun.
14 Tsëmi ama wamranö kashunnatsu, y ama jukkunata engañaq nunakuna mana alli yachatsikuyanqanta cäsushuntsu,+ pëkunata cäsurqa, laqcheqsaq yaku wakman këman jitanqan y vientu wakman këman apanqan barcunömi kashun.
15 Tsëpa rantinqa, rasun kaqllata parlar, kuyakoq kanqantsikta rikätsikur y dirigimaqnintsik* Cristunö kanapaq llapanchö mas alli kanapaq kallpachakushun.+
16 Përëkurmi cuerpuchö kaqkunaqa juntu këkäyan,+ y cada ünum cuerputa wananqanchö* yanapan. Cuerpuchö kaqkuna rurayänampaq kaqta rurayanqanqa, entëru cuerpu mas alli kanampaq y mas kuyakoq kayänampaqmi yanapakun.+
17 Tsëmi Señorpa jutinchö qamkunata niyaq* y rogayaq,* juk nacion nunakunanö manana kawayänëkipaq,+ pëkunaqa mana imapaqpis väleqkunata pensarmi* kawakuyan.+
18 Pëkunaqa ampichönömi o tsakëchönömi* këkäyan y Teyta Diospita mana yachakuyta munar y chukru shonqu karmi, Teyta Diospita shamoq kawëta chaskiyantsu.
19 Ima alli o mana alli kanqanta manana musyarmi, mana penqakur mana allikunata rurar* kakuyan+ y imëkaläya melanëpaq rurëkunatam löcuyëpa rurayan.
20 Peru qamkunaqa manam Cristu tsënö kanqantatsu yachakuyarqunki.
21 Jesusqa rasumpa kaqllatam yachatsikurqan y pëpita wiyashqa kar y pëwan yachakushqa karqa, tsëkunata allim musyayanki.
22 Qamkunaqa unë imanö kayanqëkita dejayänëkipaq kaqtam yachakuyarqëki,+ tsëqa unë portakuyanqëkimannömi këkan y munayanqëkikuna engañayäshuptikim mas mana alliman chëkan.+
23 Jukläyana pensayänëkipaqmi* kallpachakur sïguiyänëki,+
24 y alli kaqta rurayanqëkita y mana dejakoq kayanqëkita rikätsikurmi, Teyta Dios munanqannö jukläyana portakuyänëki.+
25 Llapantsikmi juk cuerpunölla kar juknintsikpa juknintsikpa kantsik, tsëmi engañakuyta dejashqana karqa,+ nuna mayikikunawan rasun kaqllatana parlayë.+
26 Cölerashqa këkarqa, ama jutsata* rurayëtsu;+ ama cölerashqallaraq këkäyaptiki inti o rupay jeqarkutsuntsu.+
27 Ama Diablu controlayäshunëkita dejayëtsu.+
28 Suwakoq nunaqa amana suwakutsunnatsu, tsëpa rantinqa wanaqkunata* yanapëta puëdinampaq,+ honrädu trabäjuta rurar alli trabajatsun.+
29 Ama shimikikunawan llutankunata parlayëtsu.+ Sinöqa imatapis niyanqëkiqa alli kayänampaq wakinkunata yanapatsun y niyanqëkiqa wiyëkaqkunapa biennimpaq katsun.+
30 Ama Teyta Diospa santu espïritunta llakitsiyëtsu,+ tsëwanmi pagakur librayäshunëki+ junaqpaq sellashqa kayarqunki.+
31 Dejayëna rurayäshunqëkita yarparäkuyta,+ cölerakuyta, qayapänakur parlapänakuyta, llakitsinakur* parlapänakuyta+ y imëka mana alli rurëkunata.+
32 Tsëpa rantinqa, jukniki juknikikuna alli kayë, shumaq tratanakuyë y llakipänakuyë,*+ y Cristurëkur Teyta Dios imëkapita perdonayäshunqëkinölla, qamkunapis jukniki juknikikuna imëkapita perdonanakuyë.+
Nötakuna
^ Griëgu idiömachöqa “mitsikoq kayänampaq” ninmi. Tsënö nirqa, mitsikoqkuna ushankunata cuidayanqannölla, congregacionchö kaqkunata cuidayanqantam rikätsikun.
^ O “yachatsiyänampaq; alli kaqman kutitsiyänampaq”.
^ Griëgu idiömachöqa “peqantsik o umantsik” ninmi.
^ Kënöpis niyanmi: necesitanqanchö.
^ O “mana kaqkunata pensarmi”.
^ O “musyatsiyaq”.
^ Kënöpis niyanmi: nï.
^ Kënöpis niyanmi: tutapëchönömi.
^ Griëgu idiömachö: aselguëia. Rikäri “Bibliachö palabrakunata entiendinapaq” neqta.
^ O “Imanö pensayanqëkita cambiayänëkipaqmi”.
^ Kënöpis niyanmi: pecäduta.
^ Kënöpis niyanmi: necesitaqkunata.
^ O “insultanakur”.
^ Kënöpis niyanmi: ankupänakuyë; kuyapänakuyë.
