Esdras 10:1-44
10 Esdrasqa israelïtakuna jutsata* rurayanqampitam lätakëkur waqarqan y Teyta Diostam perdonta mañakurqan.+ Tsënam ollqukuna, warmikuna y wamrakunapis lädunman ëwëkur alläpa waqayarqan.
2 Y Elampa+ kastan Jehielpa+ tsurin Secanïasmi Esdrasta kënö nirqan: “Noqakunam Teyta Diosnintsikta mana cäsur, kë amänu markakunachö warmikunawan casakuyarqö.+ Peru Teyta Diosqa israelïtakunata perdonanqaraqmi.
3 Peru tsëpaqqa, tsë warmikunapita rakikänapaq y wamrankunatawan qarqunapaq Teyta Diosnintsikta llapantsik änishun.+ Tsënöpam Jehovä Dios ninqanta cumplishun y mandakunqanta llapan shonqunkunawan respetaqkuna rurayanqannö rurashun.+ Ley ninqanta cumplishun.
4 Esdras, sharkuy, ¡valienti kë! Qammi kë asuntutaqa arreglanëki, juklla rurë. Noqakunaqa ninqëkitam rurayäshaq”.
5 Tsënam Esdrasqa sharkur sacerdötikunapa mandaqninkunata, levïtakunata y israelïtakunata nirqan änikuyanqanta cumpliyänampaq.+ Pëkunaqa parlayanqanta cumpliyänampaqmi änikuyarqan.
6 Tsëpitanam Esdrasqa templu puntanchö këkanqampita Eliasibpa tsurin Jehohananpa cuartunman ëwarqan. Tsë cuartuqa templuchömi karqan. Tsëman ëwarnimpis, markankunaman kutimoqkuna jutsata* rurayanqampita alläpa llakikurmi ni yakuta upurqantsu ni imatapis mikurqantsu.+
7 Tsëpitanam Babiloniachö prësu kayanqampita Judäman y Jerusalenman llapan kutimoqkunata, Jerusalen templuman qayatsiyarqan.
8 Y kima junaqta mana chäyaptinqa, markankunapita qarquyänampaq y imëkankunatapis quedatsikuyänampaqmi dirigentikuna y autoridäkuna nishqa kayarqan.+
9 Tsëmi Judäpa y Benjaminpa kastan ollqukunaqa, qayatsiyanqampita ishkë junaq pasariptin Jerusalenchö juntakäyarqan. Templupa patiunchömi llapankuna jamakuyarqan. Y alläpa jutsata* rurashqa karmi mantsakashqa y alläpa tamyaptin karkaryar këkäyarqan. Tsë junaqqa karqan isqun killapa veinti kaq junaqninmi.
10 Tsëpitanam sacerdöti Esdrasqa sharkur llapankunata nirqan: “Qamkunam Teyta Diosta mana cäsukur mana israelïta warmikunawan casakuyarqunki,+ tsënöpam mas jutsayoq* tikrayarqunki.
11 Kananqa jutsata* rurayanqëkipita unë kastëkikunapa Diosnin Jehoväta perdonta mañakuyë y mandakunqanta cäsukuyë. Amana tsë markakunachö täkoq* nunakunawan juntakuyënatsu y casakuyanqëki warmikunapita rakikäyë”.+
12 Tsënö niptinmi llapan nunakuna niyarqan: “Llapan niyämanqëkitam rurayäshaq.
13 Peru rikëkanqëkinöpis mëtsikaqmi këchö këkäyä y tamya witsanchömi këkantsik. Tsëmi alalaptin kë waqtachö këta puëdiyätsu. Mana wiyakoqmi kayarqö, tsëmi kë asuntutaqa juk ishkë junaqllachöqa arreglëta puëdishuntsu.
14 Këchö llapantsik kanantsikpa rantinqa, dirigentïkunalla quedakuyätsun.+ Y markäkunachö mana israelïta warmikunawan casakushqa kaqkunataqa, qayatsi citanqëki junaqchö shayämunampaq. Pëkunaqa dirigentïkunawan y jueznïkunawanmi shayämunan kë asuntuta arreglayänampaq. Tsënöpam Teyta Diosnintsik noqantsikwan cölerakunqanatsu”.
15 Tsënö niyaptimpis Asahelpa tsurin Jonatan y Ticväpa tsurin Jahzëya munayarqantsu. Y levïta Mesulamwan Sabetäipis pëkuna niyanqantam cäsuyarqan.+
16 Tsënö kaptimpis, Babiloniachö prësu kayanqampita markankunaman llapan kutimoqkunam parlayanqannö rurayarqan. Tsëmi sacerdöti Esdrasqa, familiankunachö llapan mandakoqkunawan juntakarqan pikuna jutsata* rurayashqa kayanqanta rikäyänampaq. Tsë mandakoqkunaqa llapampis padrunakushqa nunakunam kayarqan. Juntakäyanqan junaqqa, chunka kaq killapa punta kaq junaqninmi karqan.
17 Y qateqnin watapa qallanan killachömi, punta kaq junaqninchö, mana israelïta warmikunawan casakushqa ollqukunapa asuntunta arreglar ushayarqan.
18 Y tsëchömi musyakarqan, wakin sacerdötikunapis* mana israelïta warmikunawan casakushqa kayanqanta.+ Tsë casakoqkunaqa kayarqan Maasëya, Eliezer, Jarib y Guedalïasmi. Pëkunaqa kayarqan Jehozadacpa tsurin Jesüapa+ tsurinkuna y wawqinkunapa tsurinkunam.
19 Pëkunaqa tsë warminkunata qarquyänampaqmi änikuyarqan. Y jutsata* rurashqa karmi juk carnëruta pishtëkur Teyta Diospaq cada ünu rupatsiyänan karqan.+
20 Tsënöllam casakushqa kayänaq Imerpa+ tsurin Hananï y Zebadïas;
21 Harimpa+ tsurin Maasëya, Elïas, Semäya, Jehiel y Uzïas;
22 Pasjurpa+ tsurin Elioenäi, Maasëya, Ismael, Netanel, Jozabad y Eleasä.
23 Levïtakunapitam kayarqan Jozabad, Simeï, Queläya niyanqan Quelitä, Petahïas, Judä, y Eliezer;
24 cantaqkunapitanam karqan Eliasib; y punkuchö täpakoqkunapitanam kayarqan Salum, Tëlem y Urï.
25 Israelïtakunapitanam kayarqan Parospa+ tsurin Ramïas, Izïas, Malkïya, Mijamin, Eleazar, Malkïya y Benäya;
26 Elampa+ tsurin Matanïas, Zacarïas, Jehiel,+ Abdï, Jeremot y Elïas;
27 Zatüpa+ tsurin Elioenäi, Eliasib, Matanïas, Jeremot, Zabad y Azizä;
28 Bebäipa+ tsurin Jehohanan, Hananïas, Zabäi y Atläi;
29 Banïpa tsurin Mesulam, Maluc, Adaya, Jasub, Seal y Jeremot;
30 Pahat-Moabpa+ tsurin Adna, Kelal, Benäya, Maasëya, Matanïas, Bezalel, Binuï y Manases;
31 Harimpa+ tsurin Eliezer, Isïya, Malkïya,+ Semäya, Shimeon,
32 Benjamin, Maluc y Semarïas;
33 Hasumpa+ tsurin Matenäi, Matatä, Zabad, Elifëlet, Jeremäi, Manases y Simeï;
34 Banïpa tsurin Maadäi, Amram, Uel,
35 Benäya, Bedeya, Kelühi,
36 Vanïas, Meremot, Eliasib,
37 Matanïas, Matenäi y Jaasü;
38 Binuïpa tsurin Simeï,
39 Selemïas, Natan, Adaya,
40 Macnadebäi, Sasäi, Sharäi,
41 Azarel, Selemïas, Semarïas,
42 Salum, Amarïas y Josë;
43 Nëbupa tsurin Jeiel, Matitïas, Zabad, Zebinä, Jadai, Joel y Benäya.
44 Pëkunam mana israelïta warmikunawan casakushqa kayänaq,+ y tsë warmikunatam wamrankunatawan qarquyarqan.+
Nötakuna
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecäduyoq.
^ Kënöpis niyanmi: pecäduta.
^ Kënöpis niyanmi: täraq; päraq.
^ Kënöpis niyanmi: pecäduta.
^ Hebreu idiömachöqa “sacerdötikunapa tsurinkunapis” ninmi.
^ Kënöpis niyanmi: pecäduta.
