Esdras 4:1-24
4 Markankunaman kutirirmi, Judäpa y Benjaminpa+ kastankunaqa Israelpa Diosnin Jehoväpaq templuta rurar qallëkuyarqan,+ tsëtam chikeqninkunaqa musyaskiyarqan.
2 Tsënam ëwarnin Zorobabelta y familiankunachö mandakoqkunata kënö niyarqan: “Noqakunapis templu rurëchö yanapayashqëki.+ Noqakunapis Diosnikikunatam adorayä. Y Asiriachö gobernaq Esar-hadon+ këman pushayämanqan junaqpitam, animalkunata pishtëkur Diosnikikunapaq rupatsiyä”.+
3 Tsënam Zorobabel, Jesüa y Israel familiakunachö mandakoq nunakuna niyarqan: “Qamkunaqa manam yanapayämankitsu Diosnïkunapa templunta rurayaptï.+ Israelpa Diosnin Jehoväpa templuntaqa kikïkunallam rurakuyäshaq. Tsëta rurayänäpaqmi Persia nacionpa gobernantin Cïru mandayämashqa”.+
4 Tsënö niyaptinmi amänun markakunachö kawaq nunakunaqa, Teyta Diospa templunta mana rurayänampaq judïu nunakunata imëkanöpa mantsakätsiyarqan.+
5 Y trabajëkäyanqanta dejatsiyänampaqmi yachaq nunakunata contratayarqan.+ Tsëtaqa rurayarqan, Persia nacionchö gobernaq Cïru gobernanqan witsampita hasta Darïu gobernanqan witsanyaqmi.+
6 Asuëru gobernar qallanqan witsanmi, Jerusalenchö y Judächö nunakunata mana kaqpita acusarnin, chikeqninkunaqa juk cartata gobernantiman mandayarqan.
7 Tsënöllam Artajerjes gobernanqan witsampis Bislam, Mitrïdates, Tabeel y wakin yanapaqninkuna, Artajerjesman apatsiyänampaq cartataqa arameu idiömachö* qellqayarqan.+
8 Gobernantita yanapaq Rehum y qellqarnin trabajaq Simsäimi, Jerusalenchö täkoqkunata* acusarnin gobernanti Artajerjesman cartakuyarqan.
9 (Tsë cartataqa qellqayarqan gobernantita yanapaq Rehum, qellqarnin trabajaq Simsäi, yanapaqninkuna, juezkuna, oficialkuna, secretariukuna, Erec+ markapita nunakuna, Babiloniachö kawaq nunakuna, Susa+ markachö kawaq elamïta+ nunakuna,
10 Eufratis mayupa* kë tsimpanchö* kawaq nunakuna y Samaria markakunachö+ kawaq nunakunam. Samaria markakunachö kawaqkunaqa kayarqan respetashqa Asnapar jutiyoq nuna y juk nacionkunata ushakätsir prësu apanqan nunakunam).
11 Tsë apatsiyanqan cartachöqa kënömi nirqan:
“Teytallë Artajerjes, Eufratis mayupa* tsimpanchö* täkoq* sirwishoqnikikunam qamman cartakëkäyämü.
12 Qam mandakunqëki markapita kutïkamurmi, judïukuna Jerusalen markata yapë shärikätsiyan. Cimientunkunatam altsëkäyan y murällankunataqa ushariyannam.+ Tsë markachöqa mana cäsukoq y munëninkunata ruraqkunam imëpis kawakuyashqa.
13 Tsë markata y murällankunata shäritsir usharirqa, manam ni ima impuestuta ni peäjitapis pagayäshunkinatsu.+ Tsëqa mananam puntatanönatsu qellë kanqa.
14 Noqakunaqa pagayämanqëkiwanmi kawayä. Manachi allitsu kanman, impuestuta mana pagakuyänampaq kaqta musyëkar mana willakayämuptïqa. Tsëmi musyanëkipaq cartakëkäyämü.
15 Willëkäyanqaqta mana creiyämarqa, qampa puntëkita gobernaqkuna qellqayanqanta leyiri.+ Tsëta leyirmi musyarinki Jerusalenchö täkoqkunaqa* mana cäsukoq kayanqanta, gobernantikunapa y provinciakunachö mandakoqkunapa contran churakäyanqanta y chikinakurlla kawakuyanqanta. Tsënö kayaptinmi tsë markataqa ushakätsiyarqan.+
16 Tsë markata y murällankunata ushariyaptinqa, Eufratis mayu* kë tsimpan* markakunaqa mananam podernikichönatsu kayanqa. Tsëta musyanëkitam munayä”.+
17 Tsënam gobernanti Artajerjesqa gobernantita yanapaq Rehumman, qellqarnin trabajaq Simsäiman, Samariachö yanapaqninkunaman y Eufratis mayupa* tsimpanchö nunakunaman kënö nir cartakurqan:
“¡Salüdutam apatsikamü!
18 Mandayämunqëki cartataqa leyipäyämashqanam.
19 Noqa mandaptïmi imanö kayanqanta musyayämushqa. Y willayämashqam, tsë markachö kawaq nunakunaqa unëpitana gobernantipa contran churakäyanqanta y chikinakurlla kawakuyanqanta.+
20 Jerusalen markachöqa puëdeq gobernantikunam kayarqan y Eufratis mayu* tsimpanchö* llapan markakunata poderninchö katsirmi, impuestukunata y peäjitapis cobrakuyaq.
21 Tsëmi kananqa tsë nunakunata niyänëki rurëkäyanqanta dejayänampaq, noqa mandakuptïran tsë markataqa shäritsiyänan.
22 Ama imatapis rurayänanta dejayëtsu, tsë markata shäritsirqa gobernantita mana cäsukurmi contran churakäyanqa”.+
23 Tsëmi Gobernanti Artajerjes apatsinqan cartataqa, leyipäyarqan Rehumta, qellqarnin trabajaq Simsäita y autoridä mayinkunata. Tsënam pëkunaqa jinan höra Jerusalen markata ëwar, judïukuna trabajëkäyanqanta amälas dejatsiyarqan.
24 Tsëmi Jerusalenchö Teyta Diospa templunta rurëkäyanqanta dejariyarqan. Y mananam imatapis rurayarqannatsu Persia nacionchö gobernanti Darïu ishkë watapa gobernanqan witsanyaq.+
Nötakuna
^ Capazchi arameu idiömachö qellqayarqan y tsëtana juk idiömaman traduciyarqan.
^ Kënöpis niyanmi: täraqkunata; päraqkunata.
^ O “inti o rupay jeqanan lädunchö”.
^ Kënöpis niyanmi: riupa.
^ Kënöpis niyanmi: riupa.
^ O “inti o rupay jeqanan lädunchö”.
^ Kënöpis niyanmi: täraq; päraq.
^ Kënöpis niyanmi: täraqkunaqa; päraqkunaqa.
^ O “inti o rupay jeqanan lädun”.
^ Kënöpis niyanmi: riu.
^ Kënöpis niyanmi: riupa.
^ Kënöpis niyanmi: riu.
^ O “inti o rupay jeqanan lädunchö”.
