Esdras 5:1-17
5 Tsëpitanam Diospa willakoqnin Ageutawan+ Idöpa+ willkan Zacarïastaqa+ Teyta Dios yanaparqan. Tsëmi Judächö y Jerusalenchö këkaq judïukunata Teyta Diospa jutinchö parlapäyarqan.
2 Tsënam Sealtielpa tsurin Zorobabel+ y Jehozadacpa tsurin Jesüaqa,+ Teyta Diospa templunta Jerusalenchö yapë ruratsir qallëkuyarqan.+ Y Teyta Diospa willakoqninkunam templu rurëta mana dejayänampaq yanapayarqan.+
3 Tsënam Eufratis mayu* tsimpanchö* gobernaq Tatenäi, Setar-Bozenäi y yanapaqninkuna ëwarnin judïukunata kënö niyarqan: “¿Pitaq mandayäshurqunki kë templuta yapë rurayänëkipaq? ¿Imanirtaq terrädunkunata churëkäyanki?”.
4 Y mas tapuparninmi kënö niyarqan: “Trabajëkaq nunakunapaqa, ¿imataq jutinkuna?”.
5 Judächö dirigentikunataqa+ kikin Teyta Diosmi yanapëkarqan,* tsëmi rurëkäyanqanta dejatsita puëdiyarqantsu. Tsënam michäkoq nunakunaqa gobernanti Darïuman tsë asuntupaq cartakuskir ima ninqantapis shuyäyarqan.
6 Tsë cartataqa, Eufratis mayu* tsimpanchö* gobernador Tatenäi, Setar-Bozenäi y wakin oficialkunam, gobernanti Darïuman qellqayarqan.
7 Tsë cartachöqa kënömi niyarqan:
“Mandakoq teytallë Darïu:
¡Imanöllatan këkanki!
8 Teytallë Darïu këta musyanëkitam munayä: Judä provinciatam ëwayarqä puëdeq Diospa templunta rikaq. Tsëmi jatusaq rumikunawan rurëkäyanqanta y perqankunamampis qeruta churëkäyanqanta rikäyämurqö. Llapankuna empëñu empëñu yanapanakurmi templutaqa ushariyanna.
9 Y tsëchö dirigeqkunatam kënö tapuyarqä: ‘¿Pitaq mandayäshurqunki kë templuta yapë rurayänëkipaq? ¿Imanirtaq terrädunkunata churëkäyanki?’.+
10 Tsënöllam jutinkunatapis tapuyämurqä pikuna dirigikäyanqanta qellqayämunäpaq.
11 Tsënam pëkunaqa kënö niyämarqan: ‘Noqakunaqa ciëluchö y patsachö mandakoq Diospa sirweqninmi kayä. Kë templutaqa Israelchö puëdeq gobernantim unëna ruratsishqa karqan, tsëtam kananqa yapë shärikätsiyä.+
12 Unë awilükunam ciëluchö mandakoq Teyta Diosnïkunata cöleratsishqa kayarqan.+ Tsëmi Teyta Diosqa Babiloniachö këkaq Caldëapita gobernaq Nabucodonosor+ ushakätsinampaq dejarqan. Y pëmi shamuykur kë templuta ushakätsirqan+ y nunakunatapis Babiloniaman prësu aparqan.+
13 Peru Babiloniachö gobernanti Cïrum, gobernar qallëkur mandakurqan Teyta Diospa templunta yapë rurayänäpaq.+
14 Babiloniachö unë mandakoq Nabucodonosormi, Jerusalenchö këkaq templupita apakushqa karqan örupita y pläta metalpita väsukunata y tazonkunata. Y tsëtam Babiloniachö templuman churatsishqa karqan.+ Tsëmi gobernanti Cïruqa tsë cösaskunata yapë Jerusalenman kutitsiyämunampaq mandakurqan. Tsë cösaskunata kutitsimunampaqqa, gobernador kanampaq Cïru churanqan Sesbazar jutiyoq nunatam entregayarqan.+
15 Pëtam Cïru nirqan: “Kë väsukunata y tazonkunata aparkur Jerusalenta ëwë, y Diospa templunta punta kanqanllachö yapë sharkatsiyaptin tsëman churanki”.+
16 Tsënam Sesbazarqa Jerusalenman chëkamur Teyta Diospa templumpa+ cimientunta churatsirqan. Tsëpita witsëpam shärikätsiyä y manaran ushayäraqtsu’.+
17 Tsënö niyämashqa kaptinmi, teytë Darïu rogakayämü, rasumpa o mana rasumpa kanqanta musyayänäpaq y Babiloniachö gobernantikunapa väleq cösasninkuna churaränanchö tsëpaq parlaq documentukunata ashïkatsimunëkipaq. Mä rasumpakush gobernanti Cïru mandakunaq Diospa templunta Jerusalenchö yapë shäritsiyänampaq.+ Y tsëpitana imata pensanqëkitapis willëkayämanki”.
Nötakuna
^ Kënöpis niyanmi: riu.
^ O “inti o rupay jeqanan lädunchö”.
^ O “cuidëkarqan”.
^ O “inti o rupay jeqanan lädunchö”.
^ Kënöpis niyanmi: riu.
