Esdras 8:1-36
8 Artajerjes+ gobernanqan witsan Babiloniapita kutiyanqä nunakunaqa kayarqan familiankunachö dirigeqkunam. Ima familiapita kayanqampis llapanmi apuntarëkarqan. Pëkunam kayarqan:
2 Finehaspa+ kastan Guersom; Itamarpa+ kastan Daniel y Davidpa kastan Hatus.
3 Secanïaspa kastankunam kayarqan, Parospa kastan Zacarïas y padrunakushqa cientu cincuenta ollqukuna;
4 Pahat-Moabpa+ kastankunam kayarqan, Zerahïaspa tsurin Elieho-Enäi y doscientus ollqukuna;
5 Zatüpa+ kastankunam kayarqan, Jahazielpa tsurin Secanïas y trescientus ollqukuna;
6 Adinpa+ kastankunam kayarqan, Jonatanpa tsurin Ëbed y cincuenta ollqukuna;
7 Elampa+ kastankunam kayarqan, Atalïapa tsurin Jesayä y setenta ollqukuna;
8 Sefatïaspa+ kastankunam kayarqan, Miguelpa tsurin Zebadïas y ochenta ollqukuna;
9 Joabpa kastankunam kayarqan, Jehielpa tsurin Abdïas y doscientus dieciöchu ollqukuna;
10 Banïpa kastankunam kayarqan, Josifïaspa tsurin Selomit y cientu sesenta ollqukuna;
11 Bebäipa+ kastankunam kayarqan, Bebäipa kastan Zacarïas y veintiöchu ollqukuna;
12 Azgadpa+ kastankunam kayarqan, Hacatanpa tsurin Johanan y cientu diez ollqukuna;
13 Adonicampa+ kastankunam kayarqan Elifëlet, Jeiel, Semäya y sesenta ollqukuna, pëkunam ultimuta kuteqkuna kayarqan;
14 Bigväipa+ kastankunam kayarqan, Utäi y Zabbud y setenta ollqukuna.
15 Pëkunawanmi Ahavä+ sitiuman chaq mayu* kuchunchö juntakäyarqä, y kima junaqpam tsëchö quedakuyarqä. Peru mëtsikaq kayaptïpis, levïtakunaqa manam ni jukllëllapis kayarqantsu, wakin nunakuna y sacerdötikunallam kayarqan.
16 Tsëmi familiankunachö mandakoq Eliezerta, Arielta, Semäyata, Elnatanta, Jaribta, Elnatanta, Natanta, Zacarïasta, Mesulamta y yachatsikoq Joiaribtawan Elnatanta qayatsirqä.
17 Pëkunatam mandarqä Casifïa sitiuchö mandakoq Idöwan parlayänampaq. Idöta y Casifïa templuchö yanapakoq wawqinkunata* kënö niyänampaqmi mandarqä: “Teyta Diospa templunchö trabajayänampaq yanapakoqkunata pushamunëkitam munayä”.
18 Tsëmi Teyta Dios yanapayämaptin yachaq nuna Serebïasta,+ tsurinkunata y wawqinkunata pushayämurqan, llapanqa dieciöchum kayarqan. Serebïasqa karqan Mahlïpa+ kastanmi, Mahlïnam karqan Levïpa willkan y Levïnam karqan Israelpa tsurin.
19 Tsënöllam pushayämurqan Merarïpa+ kastan Hasabïasta, Jesayäta, tsurinkunata y wawqinkunata. Llapanqa veintim kayarqan.
20 Templuchö levïtakunata yanapayänampaqmi Davidwan dirigentikunaqa doscientus veinti nunakunata* churashqa kayarqan. Y llapankunapa jutinkunam qellqashqa karqan.
21 Tsëpitanam Ahavä mayupa* kuchunchö llapankunata nirqä arrepentikurnin ayunayänäpaq y Teyta Diosman mañakuyänäpaq. Tsënöpa wamräkunawan y imëkäkunawan markäkunata kutikuyaptï yanapayämänampaq.
22 Gobernantitam kënö nishqa kayarqä: “Teyta Diosqa pëta cäsukoqkunataqa yanapanmi,+ peru pëta dejayaptinqa cölerarmi yanapannatsu”.+ Tsënö nishqa karmi, chikikoqkunapita viäjichö defendiyämänampaq soldädukunata y cawalluyoq soldädukunata mañakuytaqa penqakurqä.
23 Tsëmi viäjichö yanapayämänampaq ayunar Teyta Diosman mañakuyarqä, y mañakuyanqätaqa wiyayämarqanmi.+
24 Tsëpitanam sacerdötikunapa mandaqninkunata döcita akrarqä: Serebïasta, Hasabïasta+ y chunka familiankunata.
25 Pëkunatam Teyta Diospa templumpaq apayämunqan pläta metalta, öruta y wakin cösaskunatapis pesarkur entregarqä.+ Tsë cösaskunaqa karqan gobernanti, consejaqninkuna, dirigentikuna y tsëchö këkaq israelïtakuna apayämunqan cösaskunam.
26 Tsëmi pesarkur entregarqä veintidos mil doscientus treinta kïlus* pläta metalta; sesenta y öchu* pläta qellë cuestaq, pläta metalpita rurashqa utilizäyänampaq cien cösaskunata; tres mil cuatrocientus veinti kïlus* öruta;
27 mil däricu cuestaq,* örupita rurashqa veinti taksha tazonkunata; y alli kaq cobripita rurashqa utilizäyänampaq ishkë cösaskunata, tsëqa pukam karqan y chipapaqmi, y örutanömi alläpa kuyayaq.
28 Tsënam pëkunata nirqä: “Qamkunaqa Teyta Jehoväta sirwiyänëkipaqmi akrashqa kayanki.+ Tsënöllam cösaskunapis Teyta Diosnintsikllapa kanqa. Y pläta metaltawan örutaqa unë kastantsikkunapa Diosnin Jehoväpaqmi llapan voluntäninkunawan apayämushqa.
29 Tsëkunataqa alli cuidarnin Jerusalenyaq apayanki. Chäratsirna sacerdötikunapa mandaqninkuna, levïtakuna y familiankunachö dirigentikuna rikëkäyaptin Jehoväpa templunchö churakuyänan cuartukunachö pesayanki”.+
30 Tsënam sacerdötikuna y levïtakunaqa, Jerusalenchö këkaq Teyta Diospa templunman apayänampaq pesayanqan pläta metalta, öruta y wakin cösaskunata chaskiyarqan.
31 Tsëpitanam Ahavä+ mayupa* kuchunchö këkäyanqäpita, wata qallanan killapa döci junaqninchö+ Jerusalenman ëwar qallëkuyarqä. Y viäjichöqa Teyta Diosmi imëkapita tsapäyämarqan. Tsëmi chikiyämaq nunakuna ni asaltantikunapis imanayämarqantsu.
32 Jerusalenman chärirqa,+ kima junaqpam tsëchö quedakuyarqä.
33 Y chusku kaq junaqchöqa apayanqä pläta metalta, öruta y wakin cösaskunatam Teyta Diospa templunchö+ pesar pesar Uriyapa tsurin Meremot-ta+ entregayarqä. Pëwanmi këkäyarqan Finehaspa tsurin Eleazar, levïta Jesüapa tsurin Jozabad+ y levïta Binuïpa+ tsurin Noadïas.
34 Llapantam yupar yupar pesayarqä, y ëka lasanqantam apuntayarqan.
35 Y karu markachö prësu kawayanqampita llapan kutimoqkunam, Israelpa Diosnimpaq animalkunata pishtëkur rupatsiyarqan: noventa y seis carnërukunata,+ setenta y siëti mallwa üshakunata y llapan israelïtakunapa jutinchö döci törukunata.+ Tsënöllam chïvukunatapis* jutsankunapita* döcita+ rupatsiyarqan. Tsë llapantam Jehovä Diospaq rupatsiyarqan.+
36 Tsëpitanam gobernanti apatsiyämanqan cartata entregayarqä+ Eufratis mayupa* tsimpanchö*+ gobernadorkunata y pëkunapa mandaqninkunata.* Pëkunaqa llapan nunakunatam alli yanapayarqan y Teyta Diospa templumpaqpis allim yanapakayämurqan.+
Nötakuna
^ Kënöpis niyanmi: riu.
^ O “netineukunata”.
^ O “netineukunata”.
^ Kënöpis niyanmi: riupa.
^ Hebreu idiömachöqa “650 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “100 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “2 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Tsëqa karqan persa nunakuna utilizäyanqan örupita qellëmi. Rikäri “Masllata musyanapaq” neqchö B14 kaqta.
^ Kënöpis niyanmi: riupa.
^ Kënöpis niyanmi: pecädunkunapita.
^ Kënöpis niyanmi: orqu cabrakunatapis.
^ Kënöpis niyanmi: riupa.
^ O “inti o rupay jeqanan lädunchö”.
^ Pëkunaqa kayarqan persa nacionpa provinciankunachö gobernadorkunam.
