Esdras 9:1-15
9 Tsë llapankunata rurar ushariyaptïnam dirigentikunaqa shamuykur kënö niyämarqan: “Israelïtakuna, sacerdötikuna y levïtakunaqa kë amänun markakunachö nunakunawanmi juntakäyan y mana alli costumbrinkunatam rurëkäyan.+ Cananeu, hitïta, perizïta, jebuseu, ammonïta, moabïta, egipciu+ y amorreu+ nunakunapa mana alli costumbrinkunata rurarmi këkäyan.
2 Pëkuna y tsurinkunapis tsë markakunachö warmikunawanmi casakuyashqa.+ Tsënömi Teyta Dios akranqan nunakuna këkarpis,+ tsë markakunachö nunakunawan juntakäyashqa.+ Tsë jutsataqa* dirigentikuna y jukpa mandädunchö këkaq gobernadorkunam puntataqa rurayashqa”.
3 Tsënö niyämaptinmi mantsakarnin janan kaq* y rurin kaq röpätapis rachirqä, tsënöllam aqtsätapis y cärallächö shaprätapis* sutar usharqä, y imanö këtapis mana musyarmi jamakuykurqä.
4 Y markankunaman kutimoqkuna mana allita rurayashqa kayanqanta musyarmi, Israelpa Diosnin mandakunqankunata respetaqkunaqa* lädüman shayämurqan. Y noqaqa ima rurëtapis mana musyarmi, gränupita rurashqa qarëkunata rupatsiyänan tardi hörayaq jamaräkurqä.+
5 Y tardipa gränupita rurashqa qarëkunata rupatsiyänan höranam,+ llakishqa jamaranqäpita sharkur Jehovä Diosman mañakunäpaq rachishqa röpällawan qonqurikurqä. Y makïta pallarkurmi*
6 kënö nirqä: “Teyta Dios, alläpa penqakushqa karmi qamman rikarkamuyllatapis mantsakü. Mëtsika jutsatam* rurayarqö y montonakarmi ciëluyaq chämushqa.+
7 Unë kastäkunapita qallëkurmi jutsata* rurarlla kawayarqö.+ Jutsata tsënö rurayanqäpitam, noqakunata, gobernantïkunata y sacerdötïkunatapis juk nacion gobernantikunapa poderninchö kayänäpaq dejayämarqëki. Pëkunam wakin kastäkunata espädawan wanutsiyarqan,+ prësu apayämarqan,+ imëkäkunata apakuyarqan+ y penqakatsiyämarqan. Tsënöllam kananyaqpis këkan.+
8 Peru qamqa Teyta Jehovä alli kayänätam munanki. Tsëmi wallkaqllatapis salvayämarqunki sagrädu sitiuchö* següru kawakuyänäpaq,+ kushishqa kayänäpaq* y esclävu kayanqäpita ichikllapis jamariyänäpaq.
9 Teyta Dios, qamqa esclävu kayaptïpis+ manam dejayämarqunkitsu. Alläpa kuyayämarmi Persia nacionpa gobernantinta pensatsirqunki noqakunata yanapayämänampaq.+ Tsëmi juchushqa* këkaptimpis templuykita kushishqa shäritsiyarqö.+ Y qamqa, Judä markakunachö y Jerusalen markachömi rumipita perqa cuenta imëkapita tsapäyämarqunki.
10 Tsë llapankunata noqakunapaq rurëkämuptikiqa, ¿imataraq niyäman Teyta Dios? Noqakunam mandakunqëkikunataqa cumpliyarqötsu.
11 Tsë mandakunqëkikunataqa willakoqnikikunawanmi musyatsiyämarqëki. Y clärum kënö niyämarqëki: ‘Duëñun tikrayänëkipaq kaq markakunachö nunakunaqa imëka mana allikunata rurarmi kawakuyan, tsëmi markankunapis limpiutsu. Tsë nunakuna melanëpaq jutsakunata* rurayaptinmi, markankunapis juknin kuchumpita juknin kuchunyaq Teyta Dios melananqan cösaskunawan junta këkan.+
12 Tsëmi warmi tsurikikunata, ollqu tsurinkunatawan casatsiyänëkitsu, ni ollqu tsurikikunata warmi tsurinkunatawan casatsiyänëkitsu.+ Ama pëkunawan juntakäyankitsu ni imëkankunata munapäyankitsu.+ Tsëta mana rurarqa puëdeqmi kayanki, tsë chakrakunapa duëñunmi kayanki, wayunqankunatam mas allin kaqta mikuyanki y wamrëkikunapaqpis herenciatam dejayanki’.
13 Tsënö nikäyämaptikipis jutsata* rurayanqäpitam sufriyarqö.+ Y qamqa Teyta Dios, maslla castigayämänëkipa rantinmi, salvayämar wallkaqllatapis këman pushayämarqunki.+
14 ¿Tsënö nikäyämaptikitsuraq mandakunqëkita mana cäsukur, melanëpaq mana allikunata ruraq nunakunawan casakuyäman?+ Tsëta rurayaptïqa cölerakurchi llapäkunata ushakäratsiyämanki.
15 Israelpa Diosnin Jehovä, qamqa alli ruraqmi kanki,+ tsëmi wallkaqllapis këchö këkäyä. Mana cäsukur jutsata* rurashqa kayaptïpis puntëkichö kayänätam permitiyämarqunki”.+
Nötakuna
^ Kënöpis niyanmi: pecädutaqa.
^ Kënöpis niyanmi: shaprütapis.
^ O “mangannaq röpata”.
^ O “llapan shonqunkunawan respetaqkunaqa”.
^ Kënöpis niyanmi: joqarkurmi.
^ Kënöpis niyanmi: pecädutam.
^ Kënöpis niyanmi: pecäduta.
^ Tsënö nirqa, capazchi Jerusalen markapaq y templupaq parlëkan.
^ Hebreu idiömachöqa “nawïkuna chipapänampaq” ninmi.
^ Kënöpis niyanmi: laqmashqa.
^ Kënöpis niyanmi: pecädukunata.
^ Kënöpis niyanmi: pecäduta.
^ Kënöpis niyanmi: pecäduta.
