Exodu 11:1-10
11 Tsënam Teyta Jehoväqa Moisesta nirqan: “Juk kuti masran egipciukunatawan gobernaqninta castigashaq,+ tsëran pëqa yarquyänëkita dejayäshunki, y kikinmi qarquyäshunki.+
2 Tsëmi llapan warmi y ollqu israelïtakunata ninëki plätapita y örupita cösaskunata vecïnunkunata mañakuyänampaq”.+
3 Teyta Jehovä permitiptinmi egipciukunaqa imëkankunata israelïtakunata qarayarqan. Y tsë tiempuqa, Egiptuchö gobernaqpa sirweqninkunapis y llapan egipciukunapis Moisestaqa alläpam respetayarqan.
4 Moisesqa kënömi nirqan Egiptuchö gobernaqta: “Jehovä Diosmi këta nin: ‘Pullan paqasnömi entëru Egiptupa purishaq,+
5 y llapan mayor wamrakunatam wanutsishaq:+ Egiptuchö gobernaqpa mayor tsurimpita, rumi mulinuwan aqapakoq warmikunapa mayor wamrankunatapis. Y tsënöllam llapan animalkunapa punta wawankunapis wanuyanqa.+
6 Tsëmi entëru Egiptuchö qaparir qayarar waqayanqa, y tsënöqa manam imëpis pasakushqatsu ni yapëpis pasakunqatsu.+
7 Peru israelïtakunata y animalninkunataqa manam imapis pasanqatsu, y manam ni allqukunapis kaniyanqatsu. Y tsëraqmi musyayanki noqa Jehoväqa egipciukunatawan israelïtakunata jukläya tratanqäta’.+
8 Tsëta rikarmi llapan sirwishoqnikikuna noqaman shayämunqa, y puntäman qonqurikurmi ‘¡llapëki këpita ëwakuyë!’+ niyämanqa, tsënam llapäkuna ëwakuyäshaq”. Egiptuchö gobernaqta tsënö nïkurmi Moisesqa cölerashqa ëwakurqan.
9 Tsëpitanam Teyta Jehoväqa Moisesta nirqan: “Alläpa puëdeq kanqäta rikätsikunäpaqmi+ Egiptuchö gobernaqqa kanampis cäsuyäshunkitsu”.+
10 Egiptuchö gobernaq rikänampaqmi Moiseswan Aaronqa Teyta Diospa poderninwan imëka espantëpaqkunata rurashqa kayarqan,+ tsënö kaptimpis, Jehovä Dios permitiptinmi Egiptuchö gobernaqqa chukru shonqu karnin israelïtakuna yarquyänanta munarqantsu.+
