Exodu 2:1-25
2 Tsë witsanmi juk levïta nuna, levïta mayin warmiwan casakurqan.+
2 Y warmin qeshyaq tikrariptinmi ollqu wamran yurirqan. Y wamran shumaq kaptinmi kima killapa pakarätsirqan.+
3 Y pakëta manana puëdirmi,+ papïrupita canastata aptarkur breawan* llushirqan, y tsë canastaman wamranta winarkurmi Nïlu mayu* kuchunchö shoqushkunapa rurinman churëkurqan.
4 Y tsë llullu wamrapa paninqa+ ima pasanqanta musyanampaqmi karullapita rikarëkarqan.
5 Tsë junaqmi Egiptuchö gobernaqpa warmi tsurinqa Nïlu mayuman* bañakoq ëwarqan. Y sirweqnin warmikuna mayu kuchunchö purikachäyanqanyaqmi gobernaqpa warmi tsurinqa shoqushkunapa rurinchö canastata rikëkurqan, y pë kaqman apanampaqmi juk sirweqninta mandarqan.+
6 Y canastata kicharkurqa waqëkaq llullu wamrata rikëkurmi alläpa llakiparqan,* y kënömi nirqan: “Kë wamraqa hebreukunapa wamranmi”.
7 Tsënam tsë llullu wamrapa paninqa gobernaqpa warmi tsurinta nirqan: “¿Munankiku kë wamrata chichirnin* cuidapushunëkipaq juk hebrëa warmita ashimunäta?”.
8 Tsënam gobernaqpa warmi tsurinqa “ëwë ashimuy” nirqan. Tsënö niptinnam shipashqa tsë wamrapa mamanllata pusharqan.+
9 Tsë warmita chäratsiptinmi gobernaqpa warmi tsurinqa, “kë llulluta apakuy y chichirnin* cuidëkapamë pagashqëkim” nirqan. Tsënam tsë warmiqa wamrata apakurqan, y chichirnin cuidapurqan.
10 Tsë wamra winarkuptinqa gobernaqpa warmi tsurintam entreguëkurqan. Gobernaqpa warmi tsurinqa kikimpa wamrantanömi katsirqan,+ y Moises* nirmi jutin churarqan. Tsë jutitaqa churarqan “pëtaqa yakupitam jipimurqö”+ nirmi.
11 Kallpanchöna këkarmi* Moisesqa hebreu mayinkunata egipciukuna imanö tratayanqanta rikaq ëwarqan.+ Y tsëchömi hebreu mayinta juk egipciu maqëkaqta rikarqan.
12 Tsëmi wakman këman rikachakurqan, y pitapis mana rikarmi tsë egipciu nunata wanuratsirqan, y arëna rurinmanmi pampëkurqan.+
13 Y waränin junaqqa ishkë hebreu mayinkunatam pelyëkaqta rikarqan. Tsëmi maqëkaqta nirqan: “¿Imanirtan marka mayikita maqëkanki?”.+
14 Tsënam pëqa nirqan: “¿Qamtaqa pitaq churashurqunki mandamaqnïkuna y jueznïkuna kanëkipaq? ¿Egipciu nunatanöku wanuratsimëta munëkanki?”.+ Tsënam Moisesqa “ruranqätaqa musyariyashqanataq” nirnin mantsakarqan.
15 Moises ruranqanta gobernaq musyëkurqa wanutsitam munarqan. Tsëmi Moisesqa Madianta ëwakurqan,+ y juk pözu lädunman chëkurmi tsëchö jamakurqan.
16 Madianchöqa Reuel jutiyoq sacerdötipam+ qanchis warmi tsurinkuna karqan. Tsë warmi tsurinkunam papäninkunapa üshankunata yakütseq Moises këkanqan pözuman chäyarqan.
17 Y mitsikoqkuna chëkurmi imëpis rurayanqannölla tsë warmikunata qarqur ushayarqan. Tsënam Moisesqa tsë warmikunata yanapaq sharkurqan, y tsëpitam animalninkunata yakütsirqan.
18 Tsëpitanam tsë warmikunaqa wayinkunaman kutikuyarqan,+ y chäriyaptinmi pëkunapa papänin Reuelqa* kënö tapurqan: “¿Imanirtan kananqa rätulla kutiyämurqunki?”.
19 Tsënam pëkunaqa niyarqan: “Imëpis qarquyämaq mitsikoqkunapitam juk egipciu nuna+ defendiyämashqa. Y pözupita yakuta chaqamurmi üshantsikkunata yakütsimushqa”.
20 Tsënam pëqa tsurinkunata nirqan: “¿Y mëtan tsë nunaqa? ¿Imanirtan pushayämurqunkitsu? Ëwar qayayämuy pëwan imallatapis mikunapaq”.
21 Tsëpitanam Moisesqa wayinchö quedakunampaq änirqan. Y tsëpitaqa warmi tsurin Ziporäwanmi+ Reuelqa Moisesta casatsirqan.
22 Tiempuwannam Ziporäpa ollqu wamran yurirqan. Tsënam Moisesqa, “noqaqa forastërullam kë markachö kallä” nirnin Guersom* nir jutin churarqan.+
23 Tsëpita atska tiempu pasariptinmi Egiptuchö gobernaq wanukurqan o wañukurqan.+ Tsënö kaptimpis sufritsir sïguiyaptinmi israelïtakunaqa alläpa llakikur y quejakur kayarqan. Y yanapëkuyänampaqmi Dios Yayata rogakuyarqan.+
24 Tiempuwannam Teyta Diosqa tsënö rogakuyanqanta wiyarqan,+ y Abrahanwan, Isaacwan y Jacobwan ruranqan acuerdutam yarpaskirqan.+
25 Tsëmi Teyta Diosqa israelïtakuna pasëkäyanqanta rikarnin llakikuyninkunata cuentaman churarqan.
Nötakuna
^ O “betunwan y alquitranwan”.
^ Kënöpis niyanmi: riu.
^ Kënöpis niyanmi: riuman.
^ Kënöpis niyanmi: ankuparqan; kuyaparqan.
^ Kënöpis niyanmi: chuchurnin.
^ Kënöpis niyanmi: chuchurnin.
^ Tsë jutiqa, “jipishqa” ninanmi. Tsënö nirqa, yakupita salvashqapaqmi parlëkan.
^ O “poqurkurmi”.
^ Reul nirqa Jetröpaqmi parlëkan.
^ Tsë jutiqa, “tsë markachö forastëru” ninanmi.
