Exodu 25:1-40
25 Tsënam Teyta Jehoväqa Moisesta kënö nirqan:
2 “Israelïtakunata mandë ima qarëllatapis noqapaq apayämunampaq. Pï nunapis llapan shonqunwan ima qarëtapis apamuptinqa chaskiyänëkillam.+
3 Y këkunatam chaskiyänëki: öruta,+ plätata,+ cobrita,+
4 azul hïluta, millwapita granäti hïluta,* puka hïluta, lïnupita rurashqa alli kaq hïluta, cabrapa millwanta,
5 pukawan tiñishqa üsha qaratsata, föcapa* qaratsanta, acacia qeruta,+
6 chiwchikunapaq aceitita,+ sagrädu aceitiman+ y shumaq pukutaq o mushkoq inciensuman+ jichana balsamuta,
7 önici rumikunata y tukuyläya shumaq rumikunata. Tsë rumikunatam mandakoq sacerdötipa mandilninman*+ y pechëranman churayänëki.+
8 Y adorayämänëkipaqmi juk carpa* wayita rurayänëki, y noqam tsëchö kashaq.+
9 Tsë carpa* wayita y rurinchö kaqkunataqa, noqa rikätsinqaqtanöllam* rurayänëki.+
10 Puntataqa acacia qerupitam juk Sagrädu Cäjata rurayänëki. Largunqa cientu diez centïmetrusnömi* kanan, anchunnam setenta centïmetrusnö kanan y altumpis setenta centïmetrusnömi* kanan.+
11 Tsëpitanam janampa y rurimpa alli kaq öruta laqayänëki,+ y tsë cäjapa entëru kuchumpaqmi örupita adornun rurayänëki.+
12 Öruta tsulluratsirmi chusku argöllakunata rurayänëki, y cäjapa chakinkuna janan esquïnamanmi churayänëki, juk argöllata cada esquïnaman.
13 Tsëpitanam acacia qerupita ishkë largu listonkunata rurayänëki, y jananmanmi öruta laqayänëki.+
14 Y tsë cäjata puritsiyänëkipaqmi argöllakuna rurimpa tsë listonkunata ullutsiyänëki.
15 Tsë listonkunataqa cäjapa argöllankunachömi dejayänëki, manam jipiyänëkitsu.+
16 Y tsë cäja rurinmanmi mandakunqäkunata qellqanqä palta rumikunata churayänëki.+
17 Alli kaq örupitam cäjapa tsapanan rurayänëki, y largunqa cientu onci centïmetrusnömi kanan, y anchunnam sesenta y siëti centïmetrusnö kanan.+
18 Y cäja tsapanampa ishkan kuchunman churayänëkipaqmi örupita ishkë querubinkunata martilluwan llaqllar rurayänëki.+
19 Juknin querubintam juk kaq kuchunman, y juknintanam juknin kaq kuchunman.
20 Tsë ishkan querubinkunaqa frenti frentim kayänan, y cärankunaqa cäjapa tsapanantam rikaräyänan.+ Y älasninkunata kichëkurmi cäjata tsaparäyänan.
21 Qammi cäjapa tsapananta churanëki,+ y tsë cäjamanmi mandakunqäkunata qellqanqä palta rumikunata churanëki.
22 Tsë cäja jananchömi yuripushqëki, y tsëpitam qamwan parlashaq.+ Y tsë Sagrädu Cäja* jananchö ishkan querubinkuna këkäyanqampitam israelïtakunata imata ninëkipaq kaqta nishqëki.
23 Acacia qerupitam mësata rurayänëki.+ Largunqa ochenta y nuëvi centïmetrusmi kanan, anchunnam cuarenta y cincu centïmetrusnö, y altunnam sesenta y siëti centïmetrusnö kanan.+
24 Tsëpitanam alli kaq öruta jananman laqayänëki, y entëru kuchumpam örupita adornun rurayänëki.
25 Mësapa chuskun lädumpam tablakunata churayänëki, y tsë tablakunapa anchunqa qanchis centïmetrunömi* kanan. Tsëpitanam tsë tablakunapa entëru kuchunta öruwan adornayänëki.
26 Y chusku argöllakunatam rurayänëki, y mësapa chakinkuna janan esquïnamanmi churayänëki.
27 Tsë argöllakunataqa tablakunapa jawanmanmi churayänëki, y tsë argöllakuna rurimpam mësata puritsiyänëkipaq listonkunata ullutsiyänëki.
28 Mësata puritsiyänëkipaq listonkunataqa acacia qerupitam rurayänëki, y jananmanmi öruta laqayänëki.
29 Alli kaq örupitam plätukunata y cöpakunata rurayänëki, y vïnu qarëta sirwiyänampaqmi järrakunata y tazonkunata rurayänëki.+
30 Y puntächö këkaq mësamanmi noqapaq tantata imëpis churayänëki.+
31 Alli kaq örupitam juk candelabruta+ rurayänëki. Tsë candelabruqa juk piëzallapitam kanan, martilluwan llaqllarmi rurayänëki. Chakin, chowpichö* ëwaq maestran, rikrankuna, cöpankuna, moqunkuna y wëtankunam rurayänëki.+
32 Tsë candelabrupa maestrampitam ishkan lädupa kima rikrankuna rurayänëki.
33 Ishkan läduchömi cada rikrachö almendru wëta niraq kima cöpakunata rurayänëki, y cada cöpa jananchömi juk moquta juk wëtata, juk moquta juk wëtata rurayänëki. Y tsënömi rurayänëki candelabrupa maestrampita yarqoq joqta rikrankunachö.
34 Candelabrupa maestranchöpis almendru wëta niraq chusku cöpakunam kanan, cada cöpa jananchömi juk moquta juk wëtata, juk moquta juk wëtata rurayänëki.
35 Punta kaq moqutaqa, puntata yarqoq ishkë rikrakunapa jawanchömi rurayänëki; ishkë kaq moqutanam, mas jananchö këkaq ishkë rikrakunapa jawanchö rurayänëki, y kima kaq moqutanam, ushanan kaq ishkë rikrakunapa jawanchö rurayänëki. Tsënömi rurayänëki maestrapita yarqoq joqta rikrankunachö.
36 Tsë candelabruwan moqunkuna y rikrankunaqa juk piëzallapitam kanan, alli kaq örupitam martilluwan llaqllar rurayänëki.+
37 Y qanchis chiwchinkunam rurayänëki. Tsë chiwchikunaqa llapan frentinchö këkaqtam aktsinqa.+
38 Alli kaq örupitam mëchata upitsiyänampaq* pinzakunata rurayänëki, y carbonta puritsiyänantapis rurayänëkim.+
39 Candelabruta y carpa* wayichö utilizäyänëkipaq kaqkunataqa, treinta y cuatru kïlus* lasaq alli kaq örupitam rurayänëki.
40 Jirkachö rikätsinqaqtanöllam llapanta rurayänëki.+
Nötakuna
^ O “puka niraq möraduwan tiñishqa millwata”.
^ Föcaqa yakuchö kawaq animalmi.
^ Hebreu idiömachöqa “efodninman” ninmi.
^ Kënöpis niyanmi: toldu.
^ Kënöpis niyanmi: toldu.
^ O “ninqaqtanöllam”.
^ Hebreu idiömachöqa “2 cödus pullan” ninanmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 cödu pullan” ninanmi. Rikäri “Masllata musyanapaq” neqchö B14 kaqta.
^ O “Yarpätsikoq Cäja”.
^ O “4 dëdum”. Rikäri “Masllata musyanapaq” neqchö B14 kaqta.
^ Kënöpis niyanmi: pullanchö.
^ Kënöpis niyanmi: wañutsiyänampaq.
^ Kënöpis niyanmi: toldu.
^ Hebreu idiömachöqa “1 talentu” ninmi. Rikäri “Masllata musyanapaq” neqchö B14 kaqta.
