Exodu 28:1-43
28 Sacerdöti+ kar sirwiyämänampaqmi wawqiki Aaronta+ y tsurinkuna+ Nadabta, Abihüta,+ Eleazarta y Itamarta+ akranëki.
2 Wawqiki Aaron respetashqa kanampaqmi shumaq röpankuna ruratsinëki.+
3 Y yanapaptï imëka rurëta yachaq nunakunawanmi parlanëki.+ Pëkunam Aaronpaq shumaq röpakunata rurayanqa, y tsë röpakunam rikënïchö alli këkanqanta y sacerdöti kanampaq akranqäta rikätsikunqa.
4 Aaronpaq y tsurinkunapaqmi kë röpakunata rurayänan: pechërata,+ mandilta,+ mangannaq largu röpata,+ puntu ladrïllu awashqa jatun röpata, peqa o uma wankunata+ y wachukuta.+ Tsë shumaq röpakunawan vistikurmi sacerdöti karnin sirwiyämanqa.
5 Tsë imëka rurëta yachaq nunakunaqa örupita, azul hïlupita, millwapita granäti hïlupita, puka hïlupita y lïnupita rurashqa alli kaq hïlupitam tsë röpakunata rurayänan.
6 Mandiltaqa örupita hïluwan, azul hïluwan, millwapita granäti hïluwan, puka hïluwan y lïnupita rurashqa alli kaq hïluwanmi rurayänan. Tsëpitanam örupita hïluwan bordayänan.+
7 Pëchunchö ëwaq piëzata y waqtanchö ëwaq piëzatam hombrunchö parchikunawan juntayänan.
8 Wachukutapis örupita hïluwan,+ azul hïluwan, millwapita granäti hïluwan, puka hïluwan y lïnupita rurashqa alli kaq hïluwanmi rurayänan. Y tsë wachukuqa mandil janampam ëwanan, y tseqllankunachömi wataränan.
9 Ishkë önici rumikunamanmi+ Israelpa döci tsurinkunapa jutinkunata qellqatsinëki.+
10 Juknin kaq rumimanmi joqta tsurinkunapa jutinta qellqatsinëki, y juknin kaq rumimannam wakin joqta tsurinkunapa jutinta qellqatsinëki, mayor kaqpita qallëkur ultimuta yureq kaqyaq.
11 Rumi llaqllëta yachaqmi Israelpa tsurinkunapa jutinta sëllumannö tsë ishkan rumikunaman qellqanan.+ Tsëpitanam örupita chäpa jananman churatsinëki.
12 Tsë ishkan rumiqa Israelpa tsurinkunata yarpätsinampaqmi kanqa, y mandilpa hombrun costürachömi ëwanan.+ Y noqa Jehoväpa rikënïman shamurmi Aaronqa tsë jutikunata hombrunchö puritsinan, tsënöpa Israelpa tsurinkunata yarpätsinampaq.
13 Y örupitam chäpakunata rurayänëki.
14 Tsënöllam alli kaq örupita ishkë cordonkunata rurayänëki,+ y tsë cordonkunatam chäpakunapita tsaritsiyänëki.+
15 Bordëta yachaq nunawanmi pechërata ruratsinëki,+ tsëmi noqa decidinqäta musyayänampaq yanapanqa. Y mandiltanöllam örupita hïluwan, azul hïluwan, millwapita granäti hïluwan, puka hïluwan y lïnupita rurashqa alli kaq hïluwan bordayänëki.+
16 Doblararqa cuadrädum kanan. Largunqa veintidos centïmetrusnömi* kanan, y anchumpis veintidos centïmetrusnömi kanan.
17 Y chusku fïlamanmi chäpakunaman rumikunata churayänëki. Punta kaq fïlachöqa rubï, topaciu y esmeralda rumikunam ëwanan.
18 Ishkë kaq fïlachönam turquësa, zafïru y jaspi rumikuna ëwanan.
19 Kima kaq fïlachönam lëshem,* ägata y amatista rumikuna ëwanan.
20 Chusku kaq fïlachönam crisölitu, önici y jädi rumikuna ëwanan. Tsë rumikunata churayänëkipaqmi örupita chäpakunata rurayänëki.
21 Tsë rumikunaqa Israelpa döci tsurinkunapa jutinkunatam apanqa, y cada jutim Israelchö juk kastata rikätsikunqa. Y cada rumimanmi imëka sëllumannö Israelpa juk tsurimpa jutinta churayänëki.
22 Pechërapaqmi cordonkunata rurayänëki, tsë cordonkunaqa alli kaq örupitam kanan.+
23 Pechërapa ishkan esquïnanman churayänëkipaqmi örupita ishkë ichishaq argöllakunata rurayänëki.
24 Y pechërapa esquïnanchö ëwaq ichishaq argöllakuna rurimpam örupita cordonkunata ullutsiyänëki.
25 Tsë ishkan cordonkunatam chäpakunapa ichishaq argöllankunapita tsaritsiyänëki, tsënöpa pechëran pëchunchö ëwanampaq.
26 Y pechërapa ura esquïnankunaman churayänëkipaqmi örupita ishkë ichishaq argöllakunata rurayänëki. Tsë argöllakunaqa pechëra rurinchömi ëwanan.+
27 Tsënöllam mandilpa pachan kaqman churayänëkipaqpis örupita ishkë ichishaq argöllakunata rurayänëki. Tsë argöllakunataqa ishkan hombrunkunapa ura kuchunmanmi churayänëki. Awmi, tsëkunataqa mandilta watayänëkipaq wachuku jananmanmi churayänëki.+
28 Y pechëra mana kuyunampaqmi, ura kuchun esquïnachö argöllakunapita mandilchö argöllakunaman azul cordonwan tsaritsiyänëki. Tsënöpam wachuku jananchö pechëraqa ni wakman ni këman kuyunqatsu.
29 Sagrädu Cuartuman Aaron yëkurninqa, pëchunchö apanqan pechërachömi Israelpa tsurinkunapa jutinkunata puritsinan, tsënöpa noqa Jehovä pëkunata yarpänäpaq.
30 Aaronpa pechëran rurinmanmi Urimta y Tumimta*+ churayänëki, tsënöpa noqa Jehoväpa rikënïman yëkurnin pëchunchö imëpis puritsinampaq. Y tsëkunata utilizarmi noqa Jehoväpa rikënïchö israelïtakunata juzganqa.
31 Mangannaq mandilpa rurinchö ëwaq largu röpataqa azul hïlullapitam rurayänëki.+
32 Y sacerdötipa peqan o uman yëkunampaqmi soldädupa chalëcunpaqnö kunkanchö uchkuta rurayänëki. Y tsë uchku mana rachinampaqmi awëta yachaq nunawan entëru kuchunta shumaq jiratsiyänëki.
33 Camisompa bastanman warkuyänëkipaqmi ichishaq campänakunata rurayänëki. Azul hïluwan, millwapita granäti hïluwan y puka hïluwanmi granäda früta niraqta rurayänëki. Tsëpitanam entëru bastanman juk campänata y juk granädata, juk campänata y juk granädata warkuyänëki.
34 Mangannaq camisompa entëru bastanmanmi örupita campänata y juk granädata, örupita campänata y juk granädata warkuyänëki.
35 Sacerdöti kar sirwimänampaqmi Aaronqa tsë röpawan vistikunan. Noqa Jehoväpa rikënïchö carpa* wayiman yëkuptin y yarquptinmi tsë campänakunaqa wiyakänan, tsënöpa Aaron mana wanunampaq o wañunampaq.+
36 Alli kaq örupitam vinchata ruratsinëki, tsëmanmi sëllumannö, ‘Jehoväqa imëkachöpis limpiu Diosmi’+ nirnin qellqatsinëki.
37 Tsë vinchatam mandakoq sacerdötipa urkunman azul cordonwan watayänëki,+ y peqa o uma wankunan jananchömi ëwanan.
38 Israelïtakuna noqa Jehoväpa rikënïchö alli kayänampaqmi, Aaronqa tsë vinchata imëpis urkunchö puritsinan. Y israelïtakuna noqapaq apayämunqan qarëkunawan ima mana allitapis rurayaptinqa,+ Aaronmi tsëkunata rikänan.
39 Lïnupita rurashqa alli kaq hïlupitam puntu ladrïllu awashqa jatun röpata y peqa o uma wankunata rurayänëki, y juk wachukutapis awayänëkim.+
40 Y Aaronpa tsurinkunapaqmi jatun röpakunata, peqa o uma wankunata y wachukukunata rurayänëki,+ tsënöpa pëkunapis respetashqa kayänampaq.+
41 Qammi wawqiki Aaronta y tsurinkunata tsë röpakunawan vistitsinëki. Tsëpitanam sacerdöti kayänampaq peqankunaman o umankunaman aceitita jichanëki+ y noqata sirwiyämänampaq akranëki.+ Tsënöpam noqapaq sacerdöti kayanqa.
42 Qarankunata tsapanampaqmi lïnu hïlupita trüsankuna* rurayänëki,+ y tsë trüsakunaqa tseqllampita qonqunyaqmi o qonqurninyaqmi tsapanan.
43 Y carpa* wayiman manaraq yëkurnin o sagrädu sitiuchö qarëkunata manaraq rupatseq ëwarmi Aaronwan tsurinkunaqa tsë trüsakunata churakuyänan, tsënöpa imapitapis mana culpayoq kayänampaq y mana wanuyänampaq o wañuyänampaq. Kë mandakunqätam Aaronpis, tsurinkunapis y tsëpita yureq kastankunapis cumpliyänan.
Nötakuna
^ Hebreu idiömachöqa “1 palmu” ninmi. Rikäri “Masllata musyanapaq” neqchö B14 kaqta.
^ Lëshem nirqa, capazchi ambar, jacintu, öpalu o turmalïna shumaq rumipaq parlëkan.
^ Rikäri “Bibliachö palabrakunata entiendinapaq” neqta.
^ Kënöpis niyanmi: toldu.
^ O “rurin kaq röpankuna”.
^ Kënöpis niyanmi: toldu.
