Exodu 29:1-46
29 Aaronwan tsurinkuna rikënïchö alli kayänampaq y sacerdöti karnin sirwiyämänampaqmi juk mallwa töruta y ishkë sänu carnërukunata akranëki.+
2 Y alli aqashqa trïgupitam levadürannaq tantakunata, aceitiwan pichushqa levadürannaq roscakunata y aceitiwan llushishqa levadürannaq gallëtakunata ruranëki.+
3 Tsëkunata juk canastaman churarkurmi,+ akranqëki törutawan y ishkan carnërutawan noqapaq apamunëki.
4 Aarontawan tsurinkunatam carpa* wayiman pushanëki,+ y bañakuyänampaqmi ninëki.+
5 Tsëpitanam, puntu ladrïllu awashqa jatun röpata, mangannaq jatun röpata, mandilta y pechërata Aaronta vistitsinëki.+ Y wachukuwanmi tseqllanta watapunëki.+
6 Y peqa o uma wankunawanmi wankupunëki, y urkunmannam alli kaq örupita sagrädu vinchata* vinchatsinëki.+
7 Y Aaron sacerdöti kanampaqmi sagrädu aceitita+ peqanman o umanman jichanëki.+
8 Tsëpitanam Aaronpa tsurinkunata qamman witiyämunampaq ninëki, y puntu ladrïllu awashqa jatun röpatam vistitsinëki.+
9 Aaronpa y tsurinkunapa tseqllankunatam wachukuwan watapunëki. Y peqa o uma wankunawanmi wankupunëki. Aaron, tsurinkuna y tsëpita yureq tsurinkunam imëpis sacerdöti kayanqa.+ Tsënömi Aaronta y tsurinkunata sacerdöti kayänampaq churanëki.+
10 Carpa* wayimanmi akranqëki töruta apamunëki, y Aaronwan tsurinkunam tsë törupa peqanman o umanman makinkunata churayänan.+
11 Y noqa Jehoväpa rikënïchömi carpa* wayipa punkunchö tsë töruta pishtanki.+
12 Y altarpa waqrankunamanmi dëduykiwan yawarninta shututsinëki,+ y wakin kaqtanam altarpa chakin kaqman jichanëki.+
13 Y altarchö rupatsinëkipaqmi wiranta rakinëki.+ Y ishkan riñonninta y riñonninkunachö wiratam rupatsinëki.+
14 Peru törupa ëtsanta, qaranta y panzantaqa campamentupita karuman apëkurmi ushakanqanyaq rupatsinëki. Tsëqa, jutsankunapita* perdonashqa kayänampaq qarëmi kanqa.
15 Tsëpitanam akranqëki carnëruta apamunëki, y Aaronwan tsurinkunam tsë carnërupa peqanman o umanman makinkunata churayänan.+
16 Y tsë carnëruta pishtëkurmi altarpa llapan lädunta yawarninwan pillchitsinëki.*+
17 Ëtsantam prësa prësa roqunëki, y aqishninta*+ y chakinkunatam yakuwan awinëki.* Tsë llapan prësakunata y carnërupa peqantam o umantam lädu lädu churanëki.
18 Tsë carnërupa llapan ëtsantam altarchö rupatsinëki. Tsëqa noqa Jehoväpaq ushakanqanyaq rupatsina qarëmi kanqa. Y ninawan rupanqanqa noqata alläpam gustamanqa.+ Tsëqa noqa Jehoväpaq ninawan rupatsishqa qarëmi kanqa.
19 Juknin kaq carnërutam apamunëki, y Aaronwan tsurinkunam tsë carnërupa peqanman o umanman makinkunata churayänan.+
20 Tsë carnëruta pishtëkurmi Aaronpa y tsurinkunapa derëcha rinrinkunapa ura kuchunta, derëcha makimpa y derëcha chakimpa maman dëdunta tsë yawarwan llushinëki. Y altarpa llapan lädunkunatam tsë carnërupa yawarninwan pillchitsinëki.*
21 Y altarchö këkaq yawarwan, y sagrädu aceitiwanmi+ Aaronta y röpanta pillchitsinëki.* Tsënöllam tsurinkunata y röpankunatapis pillchitsinëki. Tsënöpam Aaron, tsurinkuna y röpankunapis noqapaq limpiu kayanqa.+
22 Tsëpitanam tsë carnërupa wiranta, chupanchö wirata, aqishninchö* wirata, ñatinninchö wirata, ishkan riñonninta, riñonninkunachö wirata+ y derëcha kaq chankanta rakinëki. Tsë carnërutaqa sacerdöti këta qallayanqan junaqmi pishtanëki.+
23 Y noqa Jehoväpa rikënïchö këkaq canastapitam levadürannaq tantata, aceitiwan pichushqa levadürannaq roscata y aceitiwan llushishqa levadürannaq gallëtata aptarkur
24 Aaronpa y tsurinkunapa makinman churanëki, tsëpitanam noqa Jehoväpa rikënïchö puntaman y qepaman tsë qarëkunata kuyutsinëki.
25 Tsëpitanam tsë qarëkunata mañarir wakin qarëtawan juntu altarchö rupatsinëki. Tsëqa noqa Jehoväpaq ushakanqanyaq rupatsina qarëmi kanqa, ninawan rupanqanqa noqa Jehoväta alläpam gustamanqa.
26 Tsëpitanam Aaron sacerdöti kanampaq pishtanqëki carnërupa+ pëchunta noqa Jehoväpa rikënïchö puntaman y qepaman kuyutsinëki. Y tsë ëtsam qampaq kanqa.
27 Aaronwan tsurinkuna sacerdöti kayänampaq pishtanqëki carnërupa chankanta y pëchuntam rakinëki, tsëqa puntaman y qepaman kuyutsinqëki carnërupa ëtsanmi kanqa.+
28 Tsë ëtsaqa Aaronpaq y tsurinkunapaqmi sagrädu qarë kanqa. Tsëmi noqawan amïgu kayanqanta rikätsikoq qarëpita noqa Jehoväta tocamanqan kanqa.+ Y kë mandakunqätam israelïtakunaqa imëpis cäsukuyänan.+
29 Aaron wanuptinqa, pëpa rantin sacerdöti yëkoq tsurinkunam+ sagrädu röpankunata+ vistikuyänan. Y sacerdöti yëkoq tsurimpa peqanmanmi o umanmanmi sagrädu aceitita jichayänëki.
30 Y Aaronpa rantin sacerdöti yëkoq tsurinmi, carpa* wayichö këkaq sagrädu sitiuchö sirwimarnï tsë röpakunata qanchis junaq vistiränan.+
31 Tsëpitanam sacerdöti këta qallayänan junaqpaq akranqëki carnëruta pishtanëki, y sagrädu sitiuchömi ëtsanta yanutsinëki.+
32 Aaronwan tsurinkunam carpa* wayipa yëkunanchö tsë carnërupa ëtsanta y canastachö tantakunata mikuyänan.+
33 Jutsankunapita* perdonashqa kayänampaq ruratsiyanqëki mikuykunataqa Aaronwan tsurinkunallam mikuyänan, tsënöpa sacerdöti kayänampaq y Teyta Diospa rikëninchö alli kayänampaq. Tsë mikuykuna sagrädu kaptinmi, mana derëchuyoq kaqkunaqa* mikuyänantsu.+
34 Sacerdöti këta qallayänan junaqpaq pishtanqëki ëtsa o rurayanqëki tantakuna waränin junaqpaq sobraptinqa, ushakanqanyaqmi ninawan rupatsiyänëki.+ Sagrädu kaptinmi ni pï tsëkunata mikunantsu.
35 Aaronwan tsurinkuna sacerdöti kayänampaqqa, noqa ninqaqnöllam qanchis junaq ruranëki.+
36 Cada junaqmi jutsankunapita* perdonashqa kayänampaq juk töruta pishtanëki, tsënöpa altar jutsapita* limpiu kanampaq. Y Teyta Diospa rikëninchö tsë altar limpiu kanampaqmi jananman aceitita jichanëki.+
37 Qanchis junaqpam altarta limpiuyätsinëki, tsënöpa tsë altar alläpa sagrädu kanampaq.+ Y altarchö llapan sirweqkunaqa imëkachöpis limpium kayänan.
38 Cada junaqmi altarchö juk watayoq carnëruta ushakanqanyaq rupatsinëki.+
39 Patsa warëmi juknin kaq carnëruta rupatsinëki, y juknin kaqtanam tardipa.*+
40 Juk kïlunö* alli kaq harinatam juk litru* aceiti de olïvawan pichunëki, y punta kaq carnërutawan juntum rupatsinëki. Y juk litru vïnutam altarman qarëtanö jichanëki.
41 Juknin kaq carnërutapis juknin carnërutanöllam gränupita rurashqa qarëtawan y vïnutawan juntu tardipa* rupatsinëki. Tsëqa ninawan rupatsishqa qarëmi kanqa, y rupanqanqa noqa Jehoväta alläpam gustamanqa.
42 Tsënöllam qamkuna y tsëpita yureq tsurikikunapis, ushakanqanyaq rupatsina qarëkunata noqa Jehoväpa rikënïchö imëpis rupatsiyänëki, y tsëtaqa carpa* wayipa yëkunanchömi rurayänëki. Y tsëchömi yuripurniki parlapashqëki.+
43 Tsëchömi israelïtakunata yuripushaq, y alläpa puëdeq kanqämi tsë sitiutaqa sagräduta tikratsinqa.+
44 Altarta y carpa* wayitam sagrädu tikratsishaq, y sacerdöti karnin sirwiyämänampaqmi Aarontawan tsurinkunata limpiuta tikratsishaq.+
45 Noqam israelïtakunawan këkäshaq, y Diosninkunam kashaq.+
46 Tsënömi pëkuna musyayanqa noqa Jehovä Diosninkuna kanqäta, y pëkunawan kanäpaq Egiptu nacionpita kë sitiuman pushamunqäta.*+ Noqam Jehovä Diosninkuna kä.
Nötakuna
^ Kënöpis niyanmi: toldu.
^ O “Diosta sirwinampaq akrashqa kanqanta rikätsikoq vinchata”.
^ Kënöpis niyanmi: Toldu.
^ Kënöpis niyanmi: toldu.
^ Kënöpis niyanmi: pecädunkunapita.
^ Kënöpis niyanmi: chispiatsinëki.
^ Kënöpis niyanmi: aqashninta.
^ Kënöpis niyanmi: paqanëki; mayllanëki.
^ Kënöpis niyanmi: chispiatsinëki.
^ Kënöpis niyanmi: chispiatsinëki.
^ Kënöpis niyanmi: aqashninchö.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: Pecädunkunapita.
^ O “Aaronpa familiampita mana kaqkunaqa”.
^ Kënöpis niyanmi: pecädupita.
^ Kënöpis niyanmi: pecädunkunapita.
^ Hebreu idiömachöqa “2 tardichö” ninmi.
^ O “1 efäpa diezmunta”. 1 efäqa, 22 litrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “1 cuartu de hin” ninmi. 1 hinqa 3,67 litrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “2 tardichö” ninmi.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: pushayämunqaqta.
