Exodu 34:1-35
34 Tsëpitanam Teyta Jehoväqa Moisesta kënö nirqan: “Punta ruranqä rumikunatanölla ishkë palta rumikunata ruramuy.+ Tsëmanmi ushakätsinqëki rumikunaman+ qellqanqäta yapë qellqamushaq.+
2 Warë tempränulla Sinaï jirkaman witsämunki, y noqa këkanqäman shamunki.+
3 Japallëkim witsämunëki, y entëru jirkachöpis manam pï nuna kanantsu. Y ama pï nunapis üshankunata ni wäkankunata kë jirka kinrëchö mitsitsuntsu”.+
4 Tsënam Moisesqa punta rumikunatanölla ishkë palta rumikunata rurarqan. Y waräninqa tempränulla sharkurmi, tsë rumikunata aparkur Teyta Jehovä mandanqannölla Sinaï jirkaman witsarqan.
5 Y Teyta Jehoväqa pukutë rurinchömi Moises këkanqanman urämurqan,+ kikin Jehovämi imanö Dios kanqanta willarqan.*+
6 Moisespa puntampa pasarmi Teyta Jehoväqa kënö nirqan: “Noqam Jehovä kä, noqa Jehovä Diosnikikunaqa ankupäkoq,+ llakipäkoq,+ pacienciakoq+ y alläpa kuyakoqmi kä,+ y rasumpa kaqllatam parlä.*+
7 Llapan nunakunatam alläpa kuyä,+ y mana wiyakoqkunata, imachöpis pantaqkunata y mana allikunata ruraqkunatam perdonä.+ Tsënö kaptimpis culpayoq kayaptinqa, tsurinkunaman, willkankunaman, willkankunapa tsurinkunaman y willkankunapa willkankunamanmi+ castïguta apamushaq”.+
8 Tsë höram Moisesqa urkumpis patsaman chanqanyaq qonqurikurqan.
9 Y kënömi nirqan: “Jehovä Diosllä, qampa rikënikichö alli nuna kaptïqa, noqakunawan ëwëkullë.+ Teyta Jehovä mana wiyakoq kayaptïpis,+ pantayanqäpita y jutsata* rurayanqäpita perdonëkayämë,+ sirwishoqnikikuna kayänäpaq chaskïkayämë”.
10 Tsënam Teyta Diosqa kënö nirqan: “Qamkunawanmi juk acuerduta rurashaq, y llapan israelïtakuna rikëkäyaptinmi imëka milagrukunata rurashaq. Tsënö milagrukunataqa manam më markachöpis rikäyashqatsu.+ Y noqa Jehovä qamkunapaq ruranqä espantëpaq milagrukunataqa tsë kinrëchö nunakunapis rikäyanqam.+
11 Kë mandanqaqkunataqa imëpis cäsukuyänëkim.+ Qamkunapa puntëkikunata ëwarmi amorreu, cananeu, hitïta, perizïta, heveu y jebuseu nunakunata qarqushaq.+
12 Juk nacion nunakunawan ima acuerdutapis rurarqa, mana allikunamanmi chäyanki,+ tsëmi juk nacion nunakunawanqa ima acuerdutapis rurayänëkitsu.+
13 Tsëpa rantinqa altarninkunata, sagrädu columnankunata y sagrädu postinkunatam* ushakätsiyänëki.+
14 Noqa Jehoväqa, noqallata adorayämänëkitam munä,+ y tsëtaqa llapan nunakunam musyayan, tsëmi santukunataqa adorayänëkitsu.+
15 Juk nacion nunakunaqa jukwan jukwan kakoq* cuentam santunkunata adorayan, y santunkunapaqmi pishtashqa animalkunata rupatsiyan.+ Tsëmi tsë nunakunawanqa ima acuerdutapis rurayänëkitsu. Pëkunawan acuerduta rurayaptikiqa, santunkunapaq rurayanqan mikuyta mikuyänëkipaqmi invitayäshunki.+
16 Tsëpitanam warmi tsurinkunawan ollqu tsurikikunata casatsiyanki,+ y tsë warmikunaqa jukwan jukwan kakoq* cuentam santunkunata adorayanqa, y tsë rurëkunamanmi ollqu tsurikikunatapis chätsiyanqa.+
17 Ama metalta tsullutsirnin santukunata rurayankitsu.+
18 Qamkunaqa abib* killachömi Egiptupita yarqayämurqëki, tsëmi tsë killachö Levadürannaq Tantata Mikuna Fiestata rurayänëki,+ y mandakunqänöllam qanchis junaqpa levadürannaq tantata mikuyänëki.+
19 Mayor ollqu tsurikikunaqa noqapaqmi kanan.+ Üshëkikunapa y wäkëkikunapa punta yureq orqu* wawankunapis noqapaqmi kanan.+
20 Punta yureq orqu* ashnupa rantinqa, juk üshatam noqapaq pishtayänëki. Tsëta mana rurarqa, kunkanchö wirurmi tsë ashnuta wanutsiyänëki. Y mayor ollqu wamrëkikunapitam chaninta pagayämänëki.+ Manam pï nunapis noqaman jinëllaqa shamunantsu.
21 Joqta junaqpam imatapis rurayänëki. Peru qanchis kaq junaqqa, murupakuy witsan kaptin o cosëcha witsan kaptimpis manam imatapis rurayänëkitsu.+
22 Cosëcha Qallanan Fiestata rurarqa, puntata cosechayanqëki trïgutam noqapaq apayämunëki. Y wata ushë cosëchachönam, Cosëcha Ushanan Fiestata* rurayänëki.+
23 Noqam Diosnikikuna kä, tsëmi watachö kima kuti llapëki ollqukuna, noqa Jehoväpa rikënïman juntakäyänëki.+
24 Puntëkikunata ëwarmi juk markakunachö nunakunata qarqushaq,+ tsënöpam mas markakunapa duëñunkuna kayanki. Y noqa Jehoväpa rikënïman watachö kima kuti shayämuptikiqa, manam ni pï markëkikunata duëñutsakunqatsu.
25 Noqapaq qarëta apamurqa, ama animalkunapa yawarnintawan levadürayoq tantata juntayankitsu.+ Y Pascua Fiestapaq pishtayanqëki animalpa ëtsantaqa, manam waränin junaqyaq dejayänëkitsu.+
26 Punta mas alli cosëchëkikunataqa, noqa Jehovä Diospaqmi apayämunëki.+
Malta cabrapa ëtsantaqa, manam mamampa lichinchö yanuyänëkitsu”.+
27 Tsëpitanam Teyta Jehoväqa Moisesta nirqan: “Kë ninqäkunawanmi qamwan y israelïtakunawan juk acuerduta rurëkä,+ tsëmi tsë llapan ninqaqkunata qellqanëki”.+
28 Tsë rurayanqan acuerdutam Teyta Diosqa* ishkë palta rumikunaman qellqarqan, tsëqa chunka mandamientukunam karqan.+ Moisesqa cuarenta junaq y cuarenta paqasmi Teyta Jehoväwan jirkachö quedakurqan, y tsë tiempuchöqa manam tantata mikurqantsu ni yakuta upurqantsu.+
29 Tsëpitanam Moisesqa Teyta Dios qellqanqan ishkë palta rumikunata aparkur Sinaï jirkapita urämurqan.+ Teyta Dioswan parlashqa kaptinmi Moisespa cäranqa alläpa chipaparqan, tsënö kaptimpis, pëqa manam cuentata qokurqantsu.
30 Aaronwan israelïtakunaqa, Moisespa cäran chipapanqanta rikarmi pëman witita mantsayarqan.+
31 Peru Aaronta y israelïtakunapa dirigeqninkunata qayëkurmi, Moisesqa pëkunawan parlarqan.
32 Tsëpitanam israelïtakunaqa Moises kaqman witiyarqan, tsënam Moisesqa Sinaï jirkachö Teyta Jehovä llapan mandakunqanta willarqan.+
33 Y israelïtakunawan parlar usharirqa, Moisesqa tëlawanmi cäranta tsapakoq.+
34 Peru carpaman* Teyta Jehoväwan parlaq ëwarninqa, manam cäranta tsapakoqtsu.+ Y carpapita yarqurqa, Teyta Dios llapan ninqantam israelïtakunata willaq.+
35 Moisespa cäran chipapanqanta israelïtakunaqa yapëmi rikäyaq. Tsëmi Moisesqa Teyta Dioswan* yapë parlaq ëwanqanyaq cäranta tsapakoq.+
Nötakuna
^ Hebreu idiömachöqa “Jehovämi jutimpita willarqan” ninmi.
^ O “markäkuypaqmi o yärakuypaqmi kä”.
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqta.
^ O “oqllanakoq”.
^ O “oqllanakoq”.
^ Kënöpis niyanmi: mächu.
^ Kënöpis niyanmi: mächu.
^ Kë fiestataqa, 7 kaq Semäna Ushanan Fiesta o Pentecostes Fiesta nirpis reqiyanmi.
^ Hebreu idiömachöqa “Pëqa” ninmi.
^ Kënöpis niyanmi: tolduman.
^ Hebreu idiömachöqa “Pëwan” ninmi.
