Exodu 37:1-29
37 Tsëpitanam Bezalelqa+ acacia qerupita Sagrädu Cäjata rurarqan.+ Largunqa cientu onci centïmetrusnömi* karqan, anchunnam sesenta y siëti centïmetrusnö* y altunnam sesenta y siëti centïmetrusnö karqan.+
2 Janampa y rurimpam alli kaq öruta laqarqan, tsë cäjapa entëru kuchumpaqmi örupita adornun rurarqan.+
3 Öruta tsulluratsir chusku argöllakunata rurëkurmi, cäjapa chakinkuna janan esquïnaman churarqan. Cada esquïnamanmi juk argöllata churarqan.
4 Tsëpitanam acacia qerupita listonkunata rurarqan, y jananmanmi öruta laqarqan.+
5 Y cäjata puritsiyänampaqmi argöllakuna rurimpa tsë listonkunata ullutsirqan.+
6 Alli kaq örupitam cäjapa tsapanan rurarqan,+ y largunqa cientu onci centïmetrusnömi karqan, y anchunnam sesenta y siëti centïmetrusnö karqan.+
7 Y örupita ishkë querubinkunatam+ martilluwan llaqllar rurarqan, y cäja tsapanampa ishkan kuchunmanmi churarqan.+
8 Juknin querubintam juk kaq kuchuman churarqan, y juknintanam juknin kaq kuchuman churarqan.
9 Tsë ishkan querubinkunataqa frenti frentim churarqan, y cärankunaqa cäjapa tsapanantam rikaräyarqan.+ Y älankunata kichëkurmi cäjata tsaparäyarqan.+
10 Acacia qerupitam mësata rurarqan.+ Largunqa ochenta y nuëvi centïmetrusmi karqan, anchunnam cuarenta y cincu centïmetrusnö, y altunnam sesenta y siëti centïmetrusnö.+
11 Tsëpitanam alli kaq öruta jananman laqarqan, y entëru kuchumpaqmi örupita adornun rurarqan.
12 Mësapa chakinkunata tsaränampaqmi chuskun lädupa llanu tablakunata churarqan, tsë tablakunapa anchunqa qanchis centïmetrunömi* karqan. Tsëpitanam tsë tablakunapa entëru kuchunta öruwan adornarqan.
13 Öruta tsulluratsirmi chusku argöllakunata rurarqan, y mësapa chakinkuna janan esquïnamanmi churarqan.
14 Tsë argöllakunataqa tablakunapa jawanmanmi churarqan, tsë rurimpa listonkunata ulluratsirnin mësata puritsiyänampaq.
15 Tsë mësata puritsiyänampaqmi acacia qerupita listonkunata rurarqan, y jananmanmi öruta laqarqan.
16 Tsënöllam mësachö utilizäyänampaq alli kaq örupita plätukunata, cöpakunata, y vïnu qarëkunata sirwiyänampaqnam järrakunata y tazonkunata rurarqan.+
17 Alli kaq örupitam juk candelabruta rurarqan.+ Tsë candelabruqa juk piëzallam karqan, martilluwan llaqllarmi rurarqan. Chakinta, chowpichö* ëwaqninta, rikrankunata, cöpankunata, moqunkunata y wëtankunatam rurarqan.+
18 Tsë candelabrupa chowpimpitam* ishkan lädupa kima rikrankuna rurarqan.
19 Ishkan läduchömi cada rikranchö almendru wëta niraq kima cöpata rurarqan, y cada cöpapa jananchömi juk moquta juk wëtata, juk moquta juk wëtata rurarqan. Tsënömi rurarqan candelabrupa chowpimpita* yarqoq joqta rikrankunachö.
20 Candelabrupa maestranchöpis almendru wëta niraq chusku cöpakunatam rurarqan, cada cöpapa jananchömi juk moquta juk wëtata, juk moquta juk wëtata rurarqan.
21 Punta kaq moqutaqa, chowpimpita* yarqoq punta ishkë rikrankunapa jawanchömi rurarqan; ishkë kaq moqutanam, mas jananchö këkaq ishkë rikrankunapa jawanchö rurarqan, y kima kaq moqutanam, ushanan kaq ishkë rikrankunapa jawanchö rurarqan. Tsënömi rurarqan maestrampita yarqoq joqta rikrankunachö.
22 Tsë candelabruwan moqunkuna y rikrankunaqa juk piëzallam karqan, alli kaq örupitam martilluwan llaqllar rurarqan.
23 Tsëpitanam alli kaq örupita qanchis chiwchinkunata,+ mëchata upitsiyänampaq* pinzakunata y carbonta puritsinata rurarqan.
24 Candelabruta y candelabruchö utilizäyanqan cösaskunataqa, treinta y cuatru kïlus* alli kaq örupitam rurarqan.
25 Inciensuta rupatsiyänampaqmi acacia qerupita juk altarta rurarqan.+ Tsë altarqa cuadrädum karqan, largunwan anchunqa cuarenta y cincu centïmetrusnömi karqan, y altunnam ochenta y nuëvi centïmetrus karqan. Altarwan esquïnankunachö ëwaq waqrakunaqa juk piëzallam kayarqan.+
26 Tsë altarpa jananman, lädunkunaman, y esquïnankunachö waqrankunamanmi alli kaq öruta laqarqan. Y tsë altarpa entëru jana kuchumpaqmi örupita adornun rurarqan.
27 Altarpa chuskun kuchunmanmi örupita argöllakunata rurëkur adornun jawanman churarqan. Tsë argöllakunaqa listonkunata ulluratsirnin altarta puritsiyänampaqmi karqan.
28 Tsë listonkunataqa acacia qerupita rurëkurmi öruta jananman laqarqan.
29 Tsëpitanam ima cargutapis chaskeqkunaman jichayänampaq sagrädu aceitita rurarqan.+ Y imawampis mana takushpam shumaq pichurnin* shumaq pukutaq o mushkoq inciensuta rurarqan.+
Nötakuna
^ Hebreu idiömachöqa “2 cödus pullan” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 cödu pullan” ninmi. Rikäri “Masllata musyanapaq” neqchö B14 kaqta.
^ O “4 dëdum”. Rikäri “Masllata musyanapaq” neqchö B14 kaqta.
^ Kënöpis niyanmi: pullanchö.
^ Kënöpis niyanmi: pullannimpitam.
^ Kënöpis niyanmi: pullannimpita.
^ Kënöpis niyanmi: pullannimpita.
^ Kënöpis niyanmi: wañutsiyänampaq.
^ Hebreu idiömachöqa “1 talentu” ninmi. Rikäri “Masllata musyanapaq” neqchö B14 kaqta.
^ O “pomädata ruraq nunakunanö rurarkurnin”.
