Exodu 39:1-43
39 Carpa* wayichö sirwirnin sacerdötikuna vistikuyänampaqmi azul hïluwan, millwapita granäti hïluwan y puka hïluwan+ alli awashqa röpakunata rurayarqan. Y sacerdöti karnin Aaron vistikunampaqmi, Teyta Jehovä mandakunqannölla sagrädu röpakunata rurayarqan.+
2 Y örupita hïluwan, azul hïluwan, millwapita granäti hïluwan, puka hïluwan y lïnupita rurashqa alli kaq hïluwanmi mandilta rurayarqan.+
3 Tsëpaqqa örutam llapshayanqanyaq martilluwan takayarqan. Tsëpitanam llanu llanulla rutuyarqan, y azul hïluwan, millwapita granäti hïluwan, puka hïluwan y lïnupita rurashqa alli kaq hïluwan juntarkurmi sacerdötipa mandilninta bordayarqan.
4 Y pëchunchö ëwaq piëzata y waqtanchö ëwaq piëzata juntayänampaqmi, ishkan hombrunchö parchikunata churayarqan.
5 Moisesta Teyta Jehovä mandanqannömi örupita hïluwan, azul hïluwan, millwapita granäti hïluwan, puka hïluwan y lïnupita rurashqa alli kaq hïluwan wachukuta rurayarqan. Tsë wachukuqa mandil janampam ëwaq, y tseqllan kaqchömi wataraq.+
6 Örupita chäpa rurinmanmi önici rumikunata churayarqan, y tsë rumikunamanmi Israelpa döci tsurinkunapa jutinkunata sëllumannö churayarqan.+
7 Tsëpitanam mandilpa hombrunchö costüran jananman churayarqan, tsënöpa Israelpa tsurinkunata yarpätsinampaq.+ Tsëtaqa Moisesta Teyta Jehovä mandanqannöllam rurayarqan.
8 Pechëratam rurayarqan,+ tsëtapis mandiltanöllam örupita hïluwan, azul hïluwan, millwapita granäti hïluwan, puka hïluwan y lïnupita rurashqa alli kaq hïluwan bordayarqan.+
9 Doblararqa cuadrädum karqan. Largunqa veintidos centïmetrusnömi* karqan, y anchunnam veintidos centïmetrusnö.
10 Chusku fïlamanmi rumikunata churayarqan. Punta kaq fïlachöqa rubï, topaciu y esmeralda rumikunam karqan.
11 Ishkë kaq fïlachönam turquësa, zafïru y jaspi rumikuna karqan.
12 Kima kaq fïlachönam lëshem,* ägata y amatista rumikuna karqan.
13 Chusku kaq fïlachönam crisölitu, önici y jädi rumikuna karqan. Tsë rumikunataqa örupita chäpakunamanmi churayarqan.
14 Tsë rumikunamanmi Israelpa döci tsurinkunapa jutinkunata qellqayarqan, y cada jutim Israelchö juk kastata rikätsikurqan.
Cada rumimanmi imëka sëllumannö Israelpa juk tsurimpa jutinta churayarqan.
15 Tsëpitanam pechërapaq cordonkunata rurayarqan, y tsë cordonkunaqa alli kaq örupitam kayarqan.+
16 Örupitam ishkë chäpakunata y ishkë ichishaq argöllakunata rurayarqan, tsë argöllakunatam pechërapa ishkan esquïnanman churayarqan.
17 Tsëpitanam pechërapa esquïnanchö ichishaq argöllakuna rurimpa örupita cordonkunata ullutsiyarqan.
18 Y tsë cordonkunatam hombrunkunachö chäpakunapa jananchö ichishaq argöllakunapita tsaritsiyarqan, tsënöpa pechëran pëchunchö ëwanampaq.
19 Y pechërapa ura esquïnankunaman churayänampaqmi örupita ishkë ichishaq argöllakunata rurayarqan. Tsë argöllakunataqa pechëra rurimpam churayarqan.+
20 Y mandilpa pachan kaqman churayänampaqmi örupita ishkë ichishaq argöllakunata rurayarqan. Tsë argöllakunataqa ishkan hombrunkunapa ura kuchunmanmi churayarqan. Awmi, tsëkunataqa mandilta watayänampaq wachuku jananmanmi churayarqan.
21 Y pechërapa ura esquïnanchö argöllakunapitam mandilchö argöllakunaman azul cordonwan tsaritsiyarqan. Tsënöpa pechëra mana kuyunampaq. Tsëtaqa Moisesta Teyta Jehovä mandanqannöllam rurayarqan.
22 Bezalelqa azul hïlullapitam mandilpa rurinchö ëwaq largu röpata awatsirqan.+
23 Tsëpitanam sacerdötipa peqan o uman yëkunampaq soldädupa chalëcunpaqnö tsë largu röpapa kunkanchö uchkuta rurayarqan. Y tsë uchku mana rachinampaqmi entëru kuchunta shumaq jirayarqan.
24 Azul hïluwan, millwapita granäti hïluwan y puka hïluwan granäda früta niraqta rurëkurmi largu röpapa bastanman warkuyarqan.
25 Y tsë largu röpapa bastanman warkuyänampaqmi, alli kaq örupita campänakunata rurayarqan, entëru bastanmanmi juk campänata y juk granädata warkuyarqan.
26 Sacerdöti karnin vistikuyänan largu röpapa entëru bastanmanmi, juk campänata y juk granädata, juk campänata y juk granädata warkuyarqan. Tsëtaqa Moisesta Teyta Jehovä mandanqannöllam rurayarqan.
27 Aaronpaq y tsurinkunapaqmi lïnupita rurashqa alli kaq hïlupita largu röpakunata awayarqan.+
28 Tsëpitanam peqanman o umanman Aaron churakunan sagrädu wankunata,+ y Aaronpa tsurinkuna churakuyänan wankunata+ rurayarqan. Y lïnupita rurashqa alli kaq hïlupitam trüsankuna* rurayarqan.+
29 Tsënöllam lïnupita rurashqa alli kaq hïluwan, azul hïluwan, millwapita granäti hïluwan y puka hïluwan wachukuta rurayarqan. Tsëtaqa Moisesta Teyta Jehovä mandanqannöllam rurayarqan.
30 Tsëpitanam alli kaq örupita sagrädu vinchata* rurayarqan. Tsëmanmi sëllumannö, ‘Jehoväqa imëkachöpis limpiu Diosmi’+ nirnin qellqayarqan.
31 Y tsë vinchata peqa o uma wankunaman watayänampaqmi azul cordonnin churayarqan. Tsëtaqa Moisesta Teyta Jehovä mandanqannöllam rurayarqan.
32 Tsënömi juntakäyänan carpa* wayichö trabäjukunata ushayarqan. Y Moisesta Teyta Jehovä mandanqannöllam israelïtakunaqa llapanta rurayarqan.+
33 Tsëpitanam carpa* wayipaq+ alistayanqankunata Moisesman apayarqan. Y këkunatam apayarqan: carpa wayipaq+ bayëtakunata, ganchukunata,+ marcukunata,+ listonkunata,+ columnakunata y tsëkunata jawiyänampaq täcukunata;+
34 pukaman tiñishqa üshapa qaratsampita+ carpa* wayita, föcapa qaratsampita carpa wayita y sagrädu cäjapa frentinchö ëwaq cortïnata;+
35 Sagrädu Cäjata, tsapananta+ y puritsiyänampaq listonkunata;+
36 mësata, mësachö utilizäyänampaq kaqkunata+ y Teyta Diospaq tantata;
37 alli kaq örupita candelabruta, candelabruchö fïla churashqa chiwchinkunata,+ candelabruchö utilizäyänampaq kaqkunata+ y chiwchikunapaq aceitita;+
38 örupita altarta,+ carguta chaskeqkunaman jichayänampaq sagrädu aceitita,+ shumaq pukutaq o mushkoq inciensuta+ y carpa* wayipa yëkunanman churayänampaq cortïnata;+
39 cobripita altarta+ y rejïllanta, puritsiyänampaq listonkunata+ y altarchö utilizäyänampaq kaqkunata,+ cobripita jatun lavatoriuta y armazonninta;+
40 patiuta cercayänampaq bayëtakunata, listonninkunata, y tsëkunata jawiyänampaq täcukunata,+ patiu yëkunanman churayänampaq bayëtakunata,+ tsëkunata watayänampaq waskakunata y estäcakunata,+ y carpa* wayichö sirwirnin utilizäyänampaq kaqkunata;
41 carpa* wayichö sirwirnin vistikuyänampaq alli awashqa röpakunata, sacerdöti karnin Aaron vistikunampaq sagrädu röpakunata+ y sacerdöti karnin tsurinkuna vistikuyänampaq röpakunata.
42 Israelïtakunaqa Moisesta Teyta Jehovä mandanqannöllam llapanta rurayarqan.+
43 Tsëpitanam Moisesqa rurayanqanta rikarqan, y llapantam Teyta Jehovä mandakunqannölla rurashqa kayarqan. Tsëmi Moisesqa pëkunata Teyta Dios bendicïkunampaq mañakurqan.
Nötakuna
^ Kënöpis niyanmi: Toldu.
^ Hebreu idiömachöqa “1 palmu” ninmi. 1 palmuqa 22,2 centïmetrusnömi karqan. Rikäri “Masllata musyanapaq” neqchö B14 kaqta.
^ Lëshem nirqa, capazchi ambar, jacintu, öpalu o turmalïna shumaq rumipaq parlëkan.
^ O “rurin kaq röpankuna”.
^ O “Diosta sirwinampaq akrashqa kanqanta rikätsikoq vinchata”.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: toldu.
