Exodu 9:1-35
9 Tsënam Teyta Jehoväqa Moisesta nirqan: “Egiptuchö gobernaqman ëwë y këta nï: ‘Hebreukunapa Diosnin Jehovämi këta nin: “Adorayämänampaq sirweqnïkuna yarquyänanta dejë.+
2 Mana dejaptiki y tsarakurnin sïguiptikiqa,
3 noqa Jehovä alläpa puëdeq kanqanta+ rikänëkipaqmi animalnikikunata wanutsishaq. Cawalluykikunata, ashnuykikunata, camëlluykikunata, wäkëkikunata y üshëkikunatapis qeshyawanmi ushakätsishaq.+
4 Noqa Jehoväqa egipciukunapa animalninkunallatam ushakätsishaq, peru israelïtakunapa animalninkunataqa manam ni jukllëllatapis wanutsishaqtsu”’”.+
5 Jehovä Diosqa tsëkuna imë pasakunampaq kaqta willakurmi kënö nirqan: “Kikï Jehovämi tsëtaqa warë rurashaq”.
6 Tsënömi Teyta Jehoväqa waränin junaq rurarqan. Egipciukunapa animalninkunaqa wanurmi qallëkuyarqan,+ peru israelïtakunapa animalninkunaqa manam ni jukllëllapis wanurqantsu.
7 Y Egiptuchö gobernaqqa, tsëta musyanampaqmi israelïtakuna täkuyanqan* sitiukunaman sirweqninkunata mandarqan, y pëkunaqa israelïtakunapa animalninkuna ni jukllëllapis mana wanushqa kanqantam willayarqan. Tsënö kaptimpis, Egiptuchö gobernaqqa manam chukru shonqu këta dejarqantsu, y manam israelïtakuna yarquyänanta munarqantsu.+
8 Tsëpitanam Teyta Jehoväqa Moisestawan Aaronta nirqan: “Ishkan makikiwan hornupita uchpata aparkur Egiptuchö gobernaqman ëwayë, y pë rikëkaptin tsë uchpata vientuman Moises jitatsun.
9 Tsënam tsë uchpaqa polvunö entëru Egiptuman juntanqa, y nunakunapa y animalkunapa jananman shikwëkuptinmi llapanta qeri ushanqa”.
10 Tsënam Moiseswan Aaronqa hornupa uchpanta aparkur Egiptuchö gobernaqman ëwayarqan. Y tsë uchpata vientuman Moises jitëkuptinmi, nunakunata y animalkunata qeri ushanqa.
11 Egiptuchö gobernaqpa sirweqnin brüjukunatapis tsë qeriqa pasëpam* ushashqa karqan,+ tsëmi Moises këkanqanman ëwëta puëdiyarqantsu.
12 Teyta Jehovä permitiptinmi Egiptuchö gobernaqqa chukru shonqu këta dejarqantsu, y Moisesta Teyta Jehovä ninqannöllam+ Egiptuchö gobernaqqa Moisestawan Aaronta cäsurqantsu.
13 Tsënam Teyta Jehoväqa Moisesta nirqan: “Warë tempränulla sharkur Egiptuchö gobernaqman ëwë y këta nï: ‘Hebreukunapa Diosnin Jehovämi nin: “Sirweqnïkuna adorayämänampaq yarquyänanta dejë.
14 Kananqa mas feyupam qamta, sirwishoqnikikunata y marka mayikikunata noqa castigayashqëki, y tsëran musyanki noqanöqa ni pï mana kanqanta.+
15 Munarqa unënam qamta y marka mayikikunata qeshyawan ushakätsïman karqan,
16 tsënö kaptimpis, alläpa puëdeq kanqäta rikänëkipaq y jutï mëtsëchö reqishqa kanampaqmi+ ushakätsirqoqraqtsu.
17 ¿¡Imanirtaq chukru shonqu kanki!? ¿¡Imanirtaq sirweqnïkuna yarquyänanta dejankitsu!?
18 Tsëmi warë kë höra feyupa runtur tamyamunqa, y Egiptu nacion patsakanqampita kananyaqpis tsënöqa manam ni imëpis runtushqatsu.
19 Tsëmi sirwishoqnikikunata mandë animalnikikunata y llapan kapushunqëkita tsaki sitiukunaman yëkatsiyänampaq, y kikinkunapis wayi rurinman yëkuyänampaq. Waqtachö quedaq kaqtaqa nunatapis o animaltapis runtum ushakätsinqa”’”.
20 Egiptuchö gobernaqpa wakin sirweqninkunaqa, Teyta Jehovä ninqanta cäsukurmi animalninkunata qëkupakuyarqan, y sirweqninkunatapis wayi rurinman yëkuyänampaqmi niyarqan.
21 Tsënö kaptimpis, Teyta Jehovä ninqanta mana cäsukoqkunaqa, manam animalninkunata qëkupakuyarqantsu y sirweqninkunatapis manam wayi rurinman yëkuyänampaq niyarqantsu.
22 Tsëpitanam Teyta Jehoväqa Moisesta nirqan: “Entëru Egiptuman runtumunampaq makikita ciëluman pallari,*+ tsënöpa plantakunata, animalkunata y nunakunata runtu tamya ushakätsinampaq”.+
23 Tsënam Moisesqa tukrunta ciëluman pallarirarqan,* y tsë höram Teyta Jehoväqa feyupa runtutsir qallëkurqan, y räyukunapis feyupa pashtarmi chipakyäkurqan. Teyta Jehoväqa entëru Egiptuchömi tsënö feyupa runtutsirqan.
24 Feyupa runtuptin, y räyu pashtaptinmi ciëlupis chipakyäkurqanraq. Egiptu nacionchöqa manam ni imëpis tsënöqa pasashqatsu karqan.+
25 Tsë runtu tamyaqa entëru Egiptuchömi llapan plantakunata y montikunata* ushakätsirqan,+ y animalkunata y nunakunatapis wanutsirqanmi.
26 Peru israelïtakuna kawayanqan Gosen kinrëchöqa manam runturqantsu.+
27 Tsënam Egiptuchö gobernaqqa Moisestawan Aaronta qayëkatsir nirqan: “Mana allita rurëkanqätam cuentata qokurqö. Noqawan marka mayïkunaqa mana allitam rurëkäyarqö, peru Jehoväqa alli kaqllatam rurëkan.
28 Manana räyumunampaq ni runtumunampaq Jehovä Diosnikikunata rogakuyaptikiqa, dejashaqmi yarquyänëkita, y manam michäyashqëkinatsu”.
29 Tsënam Moisesqa nirqan: “Tsënö kanan kaptinqa, kë täkunqëki* markapita yarquskirllam makïta pallarkur* Jehoväman mañakushaq. Y kë entëru patsa Jehoväpa kanqanta musyanëkipaqmi räyumunqanatsu ni runtumunqanatsu.+
30 Tsënö kaptimpis, noqaqa musyänam qampis ni sirwishoqnikikunapis Jehovä Diosta mana respetayänëkipaq kaqta”.*
31 Tsë runtu tamyaqa qarwëkaq cebädata y wëtëkaq lïnutam ushakätsirqan.
32 Peru trïgutawan centënutaqa* qepa muruy kaptinmi imanarqantsu.
33 Tsëpitanam Moisesqa Egiptuchö gobernaqwan parlaskir tsë markampita ëwakurqan, y Teyta Jehovä rikëkaptinmi makinta pallarkurqan,* tsënam räyurqannatsu, runturqannatsu ni tamyarqannatsu.+
34 Y tamya, runtu y räyukuna pärariptinqa, Egiptuchö gobernaqpis y sirweqninkunapis yapëmi jutsata* rurar rumi shonqu tikrayarqan,+
35 tsëmi Egiptuchö gobernaqqa israelïtakuna yarquyänanta dejarqantsu, y Moisesta Teyta Jehovä ninqannöllam chukru shonqu kar sïguirqan.+
Nötakuna
^ Kënöpis niyanmi: täräyanqan; pärayanqan.
^ Kënöpis niyanmi: jankatmi.
^ Kënöpis niyanmi: joqë.
^ Kënöpis niyanmi: joqararqan.
^ Kënöpis niyanmi: qerukunata.
^ Kënöpis niyanmi: täranqëki; päranqëki.
^ Kënöpis niyanmi: joqarkur.
^ Hebreu idiömachöqa “mana mantsayänëkipaq kaqta” ninmi.
^ O “espelta trïgutaqa”. Tsë trïgutaqa unë witsanmi Egiptu nacionchö muruyaq, y lluta trïgullam karqan.
^ Kënöpis niyanmi: joqarkurqan.
^ Kënöpis niyanmi: pecäduta.
