Ezequiel 11:1-25
11 Tsëpitanam Teyta Diospa poderninqa apamarqan, y Jehoväpa wayimpa punkunmanmi chätsimarqan. Tsë punkuqa këkarqan inti o rupay yarqamunan lädumampam,+ tsëchömi punku kaqchö veinticincu nunakuna këkäyarqan. Tsëchömi këkarqan Azurpa tsurin Jaazanïas y Benäyapa tsurin Pelatïas, pëkunaqa markankunachö dirigentim kayarqan.+
2 Tsënam Teyta Diosqa nimarqan: “Nunapa tsurin, kë nunakunaqa mana allikunata rurayänampaqmi willanakuykäyan, y kë markachö nunakunatam mana allita consejayan.
3 Kënö parlarmi puriyan: ‘Kananqa wayintsik ruranantsik tiempunam,+ markantsikqa manka* cuentam+ y noqantsiknam manka rurinchö këkaq ëtsa cuenta kantsik’.*
4 Nunapa tsurin, tsëmi kananqa willakunëki. Pëkunata ima pasanampaq kaqtam willakunëki”.+
5 Tsënam Teyta Jehoväpa podernin yanapamarqan.+ Teyta Diosmi kënö nimarqan: “Kënömi ninëki: ‘Këtam Teyta Jehovä niyäshunki: “Israel nunakuna rasun kaqllatam parlayarqunki y imata pensëkäyanqëkitaqa allim musyä.
6 Qamkunapa culpëkikunam kë markachöqa mëtsikaq wanuyashqa o wañuyashqa, cällikunachöpis mëtsika wanushqa nunakunam mashtaräkuyan”’”.+
7 “Tsëmi Llapanta Gobernaq Teyta Jehoväqa kënö nin: ‘Kë markam manka cuenta y markaman jitayanqëki ayakunanam manka rurinchö ëtsa cuenta.+ Peru qamkunaqa manam tsë mankachö quedayankitsu’”.
8 “Llapanta Gobernaq Teyta Jehovämi kënö nin: ‘Guërrata mantsëkäyaptikipis, guërrachömi ushakätsiyashqëki.+
9 Markëkikunapitam qarquyashqëki, juk nacion nunakunapa makinmanmi churayashqëki y castigarmi ushakätsiyashqëki.+
10 Espädawanmi wanutsiyashqëki+ y Israel nacionnikikunapa lindërunchömi juzgayashqëki,+ y musyariyankim noqa Jehovä kanqäta.+
11 Markëkikunaqa manam manka cuentatsu kanqa, y qamkunapis manam tsë manka rurinchö ëtsanötsu kayanki. Israel nacionnikikunapa lindërunchömi juzgayashqëki,
12 y musyariyankim noqa Jehovä kanqäta. Tsënöqa juzgayashqëki leynïkuna ninqannö mana kawakuyanqëkipita+ y ninqäkunata mana cumpliyanqëkipitam. Tsëkunata cäsuyänëkipa rantinmi, juk nacion nunakuna niyanqanta cäsukur kawayarqunki’”.+
13 Tsëta willakur ushariptïnam, Benäyapa tsurin Pelatïas wanurirqan y noqanam patsamampis urkü chanqanyaq ishkirir fuertipa kënö nirqä: “Llapanta Gobernaq Teyta Jehovä, ¿Israelchö quedaq llapan nunakunatatsuraq ushakätsinki?”.+
14 Teyta Jehovämi yapë kënö nimarqan:
15 “Nunapa tsurin, Jerusalenchö nunakunam israelïta mayikikunata, familiankunapa chakrankunata rantita puëdeqkunata y llapan israelïtakunata kënö nikäyan: ‘Qamkunaqa Jehoväpita karuchönam këkäyanki. Amana kutiyämuynatsu. Kë markakunaqa noqakunapanam, noqakunatam entregayämashqa duëñunkuna kayänäpaq’.
16 Tsëmi kananqa kënö ninëki: ‘Këtam Llapanta Gobernaq Teyta Jehovä nin: “Karu nacionkunaman y mëtsë nacionkunaman aparpis,+ tsë markakunachöqa noqam wallka tiempupa templun cuenta pëkunapaq kashaq”’.+
17 Tsëmi kënö ninëki: ‘Llapanta Gobernaq Teyta Jehovämi kënö nin: “Mëtsë markakunachö y mëtsë nacionkunachö këkaqtam llapanta kutitsimushaq. Y Israelchömi markankuna entregashaq.+
18 Pëkuna kutimurqa melanëpaq santunkunatam ushakätsiyanqa y mana allikunatapis mananam rurayanqanatsu.+
19 Juk shonqulla kayänampaq+ y ninqäkunata chaskikuyänampaqmi yanapashaq.+ Rumi shonqu këkäyaptimpis+ cäsukoq kayänampaqmi yanapashaq.*+
20 Tsënöpam leynïkuna ninqannö kawakuyanqa y ninqäkunata cäsukuyanqa. Pëkunaqa sirwimaqnïkunam kayanqa y noqam Diosninkuna kashaq”’.
21 ‘“Peru mana cäsukur melanëpaq santunkunata adorayaptin y imëka mana allikunata rurayaptinqa..., tsëkunata rurayanqampitam castigashaq y kikinkunallam sufriyanqa” ninmi Llapanta Gobernaq Teyta Jehovä’”.
22 Tsënam querubinkunaqa älankunata kicharkuyarqan y lädunkunachömi ruëdakuna këkarqan.+ Y querubinkuna jananchönam Israelpa Diosnimpa podernin këkarqan.+
23 Tsëpitanam Teyta Jehoväpa poderninqa+ markachö këkanqampita pallarikarkur* inti o rupay yarqamunan läduchö këkaq jirkaman ëwarqan.+
24 Tsëpitanam Teyta Diospa podernin, Caldëa markachö marka mayïkuna këkäyanqanman kutitsimarqan. Tsë markaman chäratsimaptinqa, mananam tsë revelacionta masqa rikarqänatsu.
25 Tsënam Caldëa markachö këkaq marka mayïkunataqa, Teyta Jehovä llapan rikätsimanqankunata willarqä.
Nötakuna
^ O “jatun shimiyoq manka”.
^ Tsënö nirqa, manka rurinchönö següru sientikuyanqampaqmi parlëkan.
^ O “Dios ninqanta cäsukuyänampaqmi yanapashaq”.
^ Kënöpis niyanmi: joqarikarkur.
