Ezequiel 13:1-23
13 Teyta Jehoväqa yapëmi parlapämarqan y kënömi nimarqan:
2 “Nunapa tsurin, kananqa Israel markachö ulikur o llullakur+ willakoq nunakunapaq* willakuy.+ Kënö nï: ‘Jehovä ninqanta wiyayë.
3 Llapanta Gobernaq Teyta Jehovämi kënö nin: “Allaw ¡imanöraq kayanqa! Imatapis mana rikëkar kikinkuna pensayanqanmannö willakoqkuna, imanöraq kayanqa.+
4 Israel nunakuna, willakoqnikikunaqa juchur* ushashqa wayikunachö päraq atoqkunanömi kayan.
5 Qamkuna willakoqkuna, qamkunaqa manam ëwayankitsu rumipita rurashqa Israelpa murällankuna qatsashqa këkaqta altsapaqllapis.+ Tsëmi segürutsu kanqa, nunakunata juzgar Jehovä guërrata ruranan junaqpaqqa”.+
6 “Chaskiyanqëki revelacionpis ni willakuyanqëkipis manam rasumpatsu. Teyta Jehovä mana mandëkäyäshuptikim, ‘Jehovämi këta nishqa’ nir willakuyanki. Y tsëpitaqa cumplikänantaran shuyaräyankipis.+
7 Qamkunaqa allim musyayanki rikäyanqëki revelacionpis y willakuyanqëkipis mana rasumpa kanqanta. ¿Imanirtaq mana mandëkaptï,* ‘Jehovämi këta nishqa’ nir ulikuykäyanki o llullakuykäyanki?”’.
8 ‘Tsëmi Llapanta Gobernaq Teyta Jehoväqa kënö niyäshunki: “‘Ulikur o llullakur willakuyanqëkipita y rikäyanqëkikunapis mana rasumpa kanqampitam, kananqa contrëkikuna churakä’ ninmi Llapanta Gobernaq Teyta Jehovä”.+
9 Ulikur o llullakur willakuyanqampita y rikäyanqankunapis mana rasumpa kanqampitam kananqa tsë willakoqkunata castigashaq.+ Manam confiakunqä nunakunatanötsu rikäshaq, ni manam israelïtakunapa jutinkuna qellqarëkanqan listachöpis jutinkuna kanqanatsu, ni manam Israel markamampis kutiyanqanatsu. Y qamkunaqa musyariyankim Llapanta Gobernaq Teyta Jehovä noqa kanqäta.+
10 Tsënöqa castigashaq alli kawakuy mana këkaptin, “¡allim kawakuntsik!” nir sirwimaqnïkunata mana allikunata ruratsiyanqampitam.+ Pëkunaqa ishkinarëkaq perqata* mas firmi rikakunampaq yësuwan laqaparkoqnömi kayan’.+
11 Tsë perqata altsapaqkunata niyë tsë perqa ishkinampaq kaqta. Fuerti tamyamuptin, runtumuptin* y fuertipa vientumuptinqa ishkinqam.+
12 Tsë perqa ishkiptinqa kënömi tapuyanqa: ‘¿Yësuwan altsapäyanqëkiqa sirwishqaku?’.+
13 Tsëmi Llapanta Gobernaq Teyta Jehoväqa kënö nin: ‘Kananqa alläpa cölerashqam fuertipa vientutsimushaq, tamyatsimushaq y runtutsimushaq.
14 Yësuwan altsapäyanqëki perqatam ishkitsir ushakäratsishaq y cimientunllanam rikakuykar quedanqa. Llapan marka ishkir ushakaptinmi qamkunapis tsë rurinchö wanuyanki. Y musyariyankim noqa Jehovä kanqäta’.
15 ‘Alläpa cölerar tsë perqata y yësuwan altsapaqkunata ushakäratsirmi kënö nishaq: “Tsë perqapis y yësuwan altsapaqkunapis mananam kayannatsu.+
16 Israelchö willakoqkunaqa ushakäyashqanam. Pëkunaqa alli kawakuy mana këkaptinmi, Jerusalenchö alli kawakuy kanqanta niyaq. Revelacionta chaskiyanqampis manam rasumpatsu karqan. Tsë willakoqkunaqa ushakäyashqanam”’+ ninmi Llapanta Gobernaq Teyta Jehovä.
17 Y qamqa nunapa tsurin, marka mayiki warmikunata ama mantsëtsu, pëkunaqa ulikurmi o llullakurmi willakuyan. Pëkunapa contran willakuy,
18 y kënö nï: ‘Këtam Llapanta Gobernaq Teyta Jehovä nin: “Allaw warmikuna, ¿imanöraq kayanki? Qamkunaqa nunakunata munënikikunata ruratsita munarmi, trampawan pishquta tsareqnöpis,* rikrankunapaq cintakunata* awayanki y vëlutapis tukuy tamäñuta rurayanki. ¿Imanirtaq trampawan pishquta tsareqnöpis sirwimaqnïkunapa vïdanta peligruman churayanki, peru qamkunaqa salvakuyta munayanki?
19 Qamkunaqa mana respetamarmi juk aptë cebädapaq y juk ishkë pakishqa tantapaq jutsannaq* nunakunata wanutsiyanki y jutsayoq nunakunataqa salvayanki.+ Tsëtaqa rurëkäyanki sirwimaqnïkunata imëkata uliparmi o llullaparmi”’.+
20 Tsëmi Llapanta Gobernaq Teyta Jehoväqa kënö nin: ‘Warmikuna, tsë jirayanqëki cintakunaqa manam ichikllapis gustamantsu. Tsëwanmi nunakunataqa pishqutanö trampëkikunaman ishkitsiyanki. Tsëmi kananqa rikrëkikunachö këkaq cintakunata rachir ushashaq y trampapita pishquta qarqoqnömi llapan nunakunata librashaq.
21 Rurayanqëki vëlukunatapis sutar sutarmi jitar ushashaq. Y llapan sirwimaqnïkunatam librashaq. Pëkunaqa mananam trampëkikunaman ishkiyämunqanatsu. Y musyariyankim noqa Jehovä kanqäta.+
22 Allita ruraq nunakunatapis, noqa mana llakikätsiptïmi,+ allikunata rurakuyänanta michäyarqunki. Y mana allita ruraq nunakunatanam yanapayarqunki+ mana allikunata maslla rurayänampaq. Tsënöpam pëkunaqa kananyaq kawëkäyan.+
23 Tsëmi kananqa warmikuna, mana ulikuyänëkipaq o mana llullakuyänëkipaq ima revelaciontapis rikäyankinatsu,+ ni mananam suertitapis qatiyankinatsu. Sirwimaqnïkunataqa noqam makikikunapita librashaq. Y qamkunaqa musyariyankim noqa Jehovä kanqäta’”.
Nötakuna
^ Hebreu idiömachöqa “profëtakunapaq” ninmi.
^ Kënöpis niyanmi: laqmar.
^ Kënöpis niyanmi: mandëkäyapteq.
^ Pï karpis perqata dëbilta ruraptinqa, pëkunaqa allinö rikakunampaqmi yësuwan laqapäriyan.
^ O “runtunöraq rumi ishkimuptin”.
^ Tsë cintakunataqa brujerïata rurarmi makinkunaman watayaq o kukuchinkunaman churayaq.
^ Kënöpis niyanmi: achkoqnöpis.
^ Kënöpis niyanmi: pecädunnaq.
