Ezequiel 37:1-28
37 Teyta Jehovämi poderninwan* yanapamarqan. Teyta Jehovämi poderninwan apamar pampa chowpinman* churamarqan.+ Tsë pampachöqa mëtsika tullukunam karqan.
2 Y tullukuna këkaqpam pasatsimarqan y pasëkarmi rikarqä entëru pampachö pasëpa* tsakishqa mëtsika tullukunata.+
3 Tsënam Teyta Diosqa kënö tapumarqan: “Nunapa tsurin, ¿kë tullukunaqa kawamuyta puëdiyanmantsuraq?”. Noqanam nirqä: “Llapanta Gobernaq Teyta Jehovä, tsëtaqa qammi musyanki”.+
4 Tsënam pëqa nimarqan: “Kë tullukunapaq willakuy y kënö nï: ‘Tsakishqa tullukuna, Teyta Jehovä ninqanta wiyayë.
5 Kë tsakishqa tullukunatam, Llapanta Gobernaq Teyta Jehovä kënö nin: “Qamkunamanmi jamanita churamushaq, tsëmi yapë kawarkayämunki.+
6 Qamkunamanmi ankuta, ëtsata y qarata churamushaq, y jamanikikuna churamuptïmi yapë kawarkuyanki y musyariyankim noqa Jehovä kanqäta”’”.
7 Tsëmi mandamanqannölla willakurqä, y willakur usharirmi wiyarqä tullukuna pasëpa* jaqraraqta. Tullukunaqa pasëpa jaqrararmi juntakar qallëkuyarqan.
8 Tsëpitanam rikarqä ankunkuna y ëtsankuna yurikaqta y tsë janampanam qara tsaparkurqan, peru manaran shütayarqanraqtsu.
9 Tsëpitanam Teyta Diosqa kënö nimarqan: “Kananqa vientuta parlapë, nunapa tsurin, vientuta kënö nï: ‘Llapanta Gobernaq Teyta Jehovämi kënö nishunki: “Vientu,* chuskun lädupita shamur kë wanutsiyanqan nunakunaman pükë kawarkayämunampaq”’”.
10 Mandamanqannöllam vientuta parlaparqä. Tsënam tsë nunakunaqa, shütar qallëkur* kawarkayämurqan y sharkayämurqan.+ Llapankunaqa yupëtapis mana puëdipaq mëtsika soldädukunam kayarqan.
11 Tsëpitanam Teyta Diosqa kënö nimarqan: “Nunapa tsurin, tsë tsakishqa tullukunaqa Israel nunakunam kayan.+ Pëkunaqa kënömi nikäyan: ‘Tulluntsikpis pasëpam* tsakirishqa y manam imatapis shuyarantsiknatsu,+ pasëpam ushakätsimarquntsik’.
12 Pëkunata kënö nï: ‘Llapanta Gobernaq Teyta Jehovämi kënö niyäshunki: “Sirwimaqnï nunakuna, sepultürëkikunata kicharkurmi+ kawarkatsiyämushqëki, y Israel markakunamanmi kutitsiyämushqëki.+
13 Sirwimaqnï nunakuna, sepultürëkikunata kicharkur kawarkatsimupteqmi, musyariyanki noqa Jehovä kanqäta”’.+
14 ‘Podernïwan yanapapteqmi kawarkayämunki y markëkikunamanmi kutitsiyämushqëki.+ Tsëmi musyariyanki noqa Jehovä parlashqa kanqäta y parlanqänölla ruranqäta’ ninmi Teyta Jehovä”.
15 Teyta Jehoväqa yapëmi parlapämarqan. Kënömi nimarqan:
16 “Qamqa nunapa tsurin, juk llanu qeruta aptarkur tsëman kënö nir qellqë: ‘Judäpaq y pëwan këkaq* Israel nunakunapaq’.+ Tsëpitana juk llanu qeru masta aptarkur tsëman kënö nirna qellqë: ‘Efrain qeru Josëpaq, y pëwan këkaq llapan Israel nunakunapaq’.+
17 Tsëpitana tsë ishkan qerukunata qaqarkatsi, makikichö juk qerullana tikrarinampaq.+
18 Tsënam marka mayikikuna kënö tapuyäshunki: ‘¿Tsë rurëkanqëkiqa imapaqtan? Willayämë’.
19 Y qamna kënö ninki: ‘Llapanta Gobernaq Teyta Jehovämi kënö nishqa: “Efrain aptarëkanqan Josëpa qerunta, y Israel kastakunatam Judä qerutawan juntarkushaq. Tsë ishkan qerukunam makïchöqa, juk qerullana tikrariyanqa”’.+
20 Tsë letrayoq* llanu qerukunataqa pëkuna rikäyänampaqmi aptaränëki.
21 Tsëpitanam kënö ninëki: ‘Llapanta Gobernaq Teyta Jehovämi kënö nin: “Israelïtakunatam mëtsë nacionkunachö këkäyaqta, mëtsë sitiukunachö këkäyaqta juntamushaq y markankunamanmi kutitsimushaq.+
22 Y pëkunatam markankunachö, Israel jirkakunachö juk nacionllamanna tikratsishaq.+ Gobernantinkunapis jukllëllanam kanqa,+ mananam puntatanöqa rakikar ushashqa ishkë nacionnatsu kayanqa, sinöqa jukllëllanam.+
23 Mananam santukunata adorarnin, ni mana allikunata rurarnin melanëpaq kayanqanatsu.+ Mana cäsukoq karnin jutsata* rurayanqankunapitam salvashaq, y limpiutam tikratsishaq. Pëkunam sirwimaqnïkuna kayanqa y noqam Diosninkuna kashaq.+
24 Gobernantinkunaqa sirwimaqnï Davidmi kanqa,+ y mitseqninkunapis jukllëllanam kanqa.+ Ninqäkunata y leynïkunata cäsukurmi kawakuyanqa.+
25 Sirwimaqnï Jacobta entreganqä markakunachö, unë kastankuna kawayanqan markakunachömi kawakuyanqa.+ Tsëchömi imëyaqpis kawakuyanqa:+ pëkunapis, tsurinkunapis y willkankunapis tsëchömi kawakuyanqa.+ Y sirwimaqnï Davidmi, imëpis mandaqninkuna kanqa.+
26 Pëkunawanmi alli kawakuyänampaq acuerduta rurashaq,+ tsë acuerduqa manam ni imëpis ushakanqatsu. Imëyaqpis kawakuyänampaqmi markankunaman churashaq, tsëchömi mirayanqa.+ Pëkuna kayanqanmanmi templütapis churashaq, y tsëchömi imëyaqpis kanqa.
27 Pëkuna kayanqanchömi carpa* wayïpis kanqa. Noqam Diosninkuna kashaq y pëkunam sirwimaqnïkuna kayanqa.+
28 Pëkuna këkäyanqanman, templüta imëyaqpis kanampaq churariptïmi, llapan nacionkuna musyariyanqa noqa Jehovä, Israelta limpiutana tikratsishqa kanqäta”’”.+
Nötakuna
^ Kënöpis niyanmi: pullanninman.
^ Hebreu idiömachöqa “makinwan” ninmi.
^ Kënöpis niyanmi: jankat.
^ Kënöpis niyanmi: jankat.
^ O “Jamani; Kallpa”.
^ O “kallpa yëkuriptin”.
^ Kënöpis niyanmi: jankatmi.
^ O “yanapaqninkuna”.
^ O “qellqanqëki”.
^ Kënöpis niyanmi: pecäduta.
^ Kënöpis niyanmi: toldu.
