Ezequiel 41:1-26
41 Tsëpitanam sagrädu cuartuman* apamarqan, y ishkan läduchö këkaq columnakunatam medirqan. Tsë columnakunaqa, juk kaq lädupam kima metru* medirqan y juk kaq lädupapis kima metrum medirqan.
2 Tsë cuartuman yëkuna punkupa anchunqa, pitsqa metrum* karqan. Ishkan lädunchö ëwaq perqapa anchumpis cada ünum ishkë metru mediu* karqan. Sagrädu cuartupa largunta mediptinmi, cäsi veintiun metrus* karqan y anchunnam chunka metru* karqan.
3 Tsëpitanam mas sagrädu kaq cuartuman yëkurir, ishkan läduchö këkaq columnakunata medirqan. Tsë columnapa titanqa o tetanqa* juk metrum* karqan. Tsënöllam yëkunampa anchuntapis medirqan y kima metrum* karqan. Y ishkan läduman ëwaq perqakunapa anchunnam, cada ünu kima metru mediu* medirqan.
4 Tsëpitanam sagrädu cuartupa lädunchö këkaq cuartuta medirqan. Tsë cuartupa largunqa chunka metrum* karqan y anchumpis chunka metrum karqan.+ Tsëpitanam kënö nimarqan: “Këmi Alläpa Sagrädu kaq Cuartu”.+
5 Tsëpitanam templupa perqankunata medirqan. Tsë perqakunapa anchunqa kima metrum* karqan, y templupa entërumpa këkaq cuartukunapa anchunqa ishkë metrum* karqan.+
6 Templupa ishkan lädunchö y qepanchö këkaq cuartukunaqa kima pïsum karqan. Y cada pïsuchömi treinta cuartukuna karqan. Tsë cuartukunapa terrädunqa manam templupa perqanman yakaraqtsu. Templupa perqan kaq läduchömi grädakuna kaq y tsë grädakunam terrädukunata tsaraq.+
7 Templupa ishkan lädunkunachömi tumëpa witsaq escalërakuna kaq.+ Tsë escalëraqa, primer pïsuchö llanullam qallaq, peru cada pïsuman charmi mas anchu tikraq.
8 Templuqa altu patakchömi këkarqan. Tsëmi entëru templu kuchumpaqa tsë patak rikakaq. Templupa entëru lädumpa këkaq cuartukunapa cimientunta esquïnayaq mediriptinqa, juk bärra complëtum karqan. Tsëqa kima metrum* karqan.
9 Tsë cuartukunapa waqtaman rikaraq perqankunapa anchunqa, ishkë metru medium* karqan. Y templuwan qaqarëkaq cuartukunapa kuchumpam juk verëda karqan. Tsë verëdaqa templupanam karqan.
10 Templutawan comedortaqa juk cällim rakeq.+ Tsë cällipa anchunqa, chunka metrum* karqan.
11 Y norti kaq lädupam, cuartukunawan qaqaraq verëda kaqpa juk yëkuna karqan. Tsënöllam sur kaq läduchöpis karqan. Tsë verëdaqa entëru lädupam tumamoq. Y anchunqa ishkë metru medium* karqan.
12 Inti o rupay jeqanan lädumampam, templu qepan cällita pasarkushqa, juk jatun wayi karqan. Tsë wayipa anchunqa treinta y seis metrusmi* karqan y largunnam cäsi cuarenta y siëti metrus* karqan. Y perqampa anchunnam ishkë metru mediu* karqan.
13 Tsëpitanam templuta medirqan. Templupa largunqa cincuenta y dos metrusmi* karqan. Tsënöllam medirqan cällinta, tsë jatun wayita* y perqankunata. Tsë llapanta juntu mediriptinmi largunqa cincuenta y dos metrus karqan.
14 Templuman yëkunapa perqapa anchunta, ishkan läduchö cällikunatawan juntu mediriptinqa cincuenta y dos metrusmi* karqan.
15 Tsëpitanam templu qepanchö këkaq jatun wayita, cällita y ishkan läduchö pasadïzukunatawan juntu medirqan. Y llapanqa cincuenta y dos metrusmi* karqan.
Tsënöllam medirqan templuchö sagrädu cuartuta, Alläpa Sagrädu kaq Cuartuta,+ patiuchö këkaq pasadïzukunata,
16 umbralkunata, kiman sitiuchö këkaq pasadïzukunata y ventänakunata.+ Tsë ventänakunapa marcunkunaqa, waqtamanmi ichiklla rikakaq y rurimannam jatun rikakaq. Y umbral kaq lädupanam, patsapita ventäna kaqyaq perqaqa tablawan laqararqan.+ Ventänakunapa marcunqa entëru kuchumpam karqan.
17 Tsënöllam templuchö Alläpa Sagrädu kaq Cuartuta y sagrädu kaq cuartutapis yëkuna janampa medirqan. Tsënöllam templupa entëru perqantapis altupa medirqan.
18 Tsë perqakunachömi, querubin angelkuna+ y palmërakuna tallashqa karqan.+ Cada ishkë querubinpa chowpinchömi* juk palmëra karqan. Tsë querubinkunaqa ishkë cärayoqmi kayarqan.
19 Nunapanö cäranqa, juk kaq läduchö kaq palmëratam rikaraq y leonpanö* kaq cäranqa juk kaq läduchö kaq palmëratanam rikaraq.+ Tsënömi templupa entëru perqanchö karqan.
20 Sagrädu kaq cuartuchöqa patsapita hasta tëchuyaqmi entëru perqachö y bövedachöpis tallashqa querubinkuna y palmërakuna karqan.
21 Sagrädu kaq cuartuman yëkuna punkupa ishkan lädunchö shäraq* qeruqa cuadrädum karqan.+ Sagrädu kaq sitiupa* puntanchönam,
22 qerupita rurashqa altarnö karqan.+ Altunqa juk metru medium* karqan y largunnam juk metru.* Esquïnankunachömi tsaraqninkuna shärarqan* y ishkan lädun y jarukunampis qerupitam karqan. Tsënam pëqa kënö nimarqan: “Kë mësaqa Teyta Jehoväpa puntanchömi këkan”.+
23 Sagrädu kaq sitiupa y Alläpa Sagrädu kaq Sitiupapis ishkëmi punkun karqan.+
24 Tsë punkukunaqa ishkë höjayoqmi karqan, tsëmi doblakaq. Cada punkum ishkë höjayoq karqan.
25 Perqachönöllam, sagrädu cuartupa punkunkunachöpis tallashqa querubinkuna y palmërakuna karqan.+ Templuman yëkuna pasadïzupa alërunqa qerupitam karqan y waqtamanmi pasarämoq.
26 Y tsëchömi ventänakunapis karqan. Tsë ventänakunapa marcunqa waqtamanmi taksha rikakaq+ y rurimannam jatun rikakaq. Y pasadïzupa ishkan lädunchö y templupa ishkan lädunchö këkaq cuartukunachö y alëruchöpis tallashqa palmërakunam karqan.
Nötakuna
^ Hebreu idiömachöqa “templuman” ninmi. Capïtulu 41 y 42 tsëllatam sagrädu cuartu y mas sagrädu cuartu nin.
^ Hebreu idiömachöqa “6 cödus” ninmi. Tsë medïdaqa jatun kaq cödum karqan. Rikäri “Masllata musyanapaq” neqchö B14 kaqta.
^ Hebreu idiömachöqa “10 cödus” ninmi.
^ Hebreu idiömachöqa “5 cödus” ninmi.
^ Hebreu idiömachöqa “40 cödus” ninmi.
^ Hebreu idiömachöqa “20 cödus” ninmi.
^ Kënöpis niyanmi: rakunqa.
^ Hebreu idiömachöqa “2 cödus” ninmi.
^ Hebreu idiömachöqa “6 cödus” ninmi.
^ Hebreu idiömachöqa “7 cödus” ninmi.
^ Hebreu idiömachöqa “20 cödus” ninmi.
^ Hebreu idiömachöqa “4 cödus” ninmi.
^ Hebreu idiömachöqa “6 cödus” ninmi.
^ Hebreu idiömachöqa “6 cödus” ninmi.
^ Hebreu idiömachöqa “5 cödus” ninmi.
^ Hebreu idiömachöqa “20 cödus” ninmi.
^ Hebreu idiömachöqa “5 cödus” ninmi.
^ Hebreu idiömachöqa “5 cödus” ninmi.
^ Hebreu idiömachöqa “90 cödus” ninmi.
^ Hebreu idiömachöqa “70 cödus” ninmi.
^ Hebreu idiömachöqa “100 cödus” ninmi.
^ Tsënö nirqa, inti o rupay jeqanan lädumampa y templu amänunchö wayipaqmi parlëkan.
^ Hebreu idiömachöqa “100 cödus” ninmi.
^ Hebreu idiömachöqa “100 cödus” ninmi.
^ Kënöpis niyanmi: pullanninchömi.
^ O “mallwa leonpanö”.
^ Kënöpis niyanmi: ichiraq.
^ Tsënö nirqa, capazchi Alläpa Sagrädu Cuartupaq parlëkan.
^ Hebreu idiömachöqa “3 cödus” ninmi.
^ Hebreu idiömachöqa “2 cödus” ninmi.
^ Kënöpis niyanmi: ichirarqan.
