Ezequiel 6:1-14
6 Teyta Jehoväqa yapëmi parlapämarqan y kënömi nimarqan:
2 “Nunapa tsurin, kananqa Israel jirkakunaman rikëkur ima pasanampaq kaqta willakuy.
3 Kënö nï: ‘Israel jirkakuna, Llapanta Gobernaq Teyta Jehovä ninqanta wiyayë. Llapanta Gobernaq Teyta Jehovämi jatusaq jirkakunata, taksha jirkakunata, mayukunata* y pampakunata kënö niyäshunki: “Rikäyë, atacayäshunëkipaqmi espädayoq soldädukunata pushamushaq y sagrädu altu sitiuykikunatapis ishkitsirmi ushashaq.
4 Altarnikikunatam juchutsir* ushashaq, inciensuta rupatsiyänan altarnikikunatapis ushakätsishaqmi,+ wanushqa nunakunatapis melanëpaq* santunkunapa puntanmanmi jitar ushashaq.+
5 Israel nunakunapa ayankunatapis melanëpaq santunkunapa puntanmanmi jitashaq y tullunkunatapis altarkunapa entëru lädunmanmi mashtar ushashaq.+
6 Mëchö kawayaptimpis markankunaqa ushakanqam.+ Sagrädu altu sitiukuna, altarkuna, melanëpaq santukuna, inciensuta rupatsiyänan altarkunapis y imëka rurayanqankunapis llapanmi ushakanqa.+
7 Rikëkäyaptikim nunakunaqa wanur o wañur ushakäyanqa.+ Tsëmi qamkunaqa musyariyanki noqa Jehovä kanqäta.+
8 Peru wakin nunakunataqa kawëkaqtam dejashaq. Pëkunaqa manam espädawan wanuyanqatsu y mëtsë nacionkunachömi kawayanqa.+
9 Mana wanutsiyanqan nunakunataqa, esclävunkunapaqmi juk nacionkunaman apayanqa.+ Y pëkunaqa tsëchömi cuentata qokuyanqa noqata dejaramar,* mana allikunata rurar y melanëpaq santukunata kuyar+ llakitsiyämanqanta.+ Mana allikunata rurayanqampitaqa penqakuyanqam y rurayanqankunataqa melanäyanqam.+
10 Pëkunaqa musyariyanqam noqa Jehovä kanqäta y castiganäpaq parlanqätaqa cumpleq kanqäta”’.+
11 Llapanta Gobernaq Teyta Jehovämi kënö nimarqan: ‘Makikiwan paqchi o taqllë y chakikiwan patsata jëtar* ushë. Imëka jutsata* Israel nunakuna rurayanqampita llakikuy. Pëkunaqa espädawan, mallaqëwan y raslla o saslla wanutsikoq qeshyawanmi wanur ushakäyanqa.+
12 Karuchö këkaqkunaqa raslla o saslla wanutsikoq qeshyawanmi* wanuyanqa y amänuchö këkaqkunataqa espädawanmi wanutsiyanqa. Qeshyawan y espädawan mana wanoq kaqkunaqa mallaqëpam wanuyanqa. Cölerarmi llapanta ushakätsishaq.+
13 Melanëpaq santukunapa puntanchö, altarkunapa entëru lädunchö, jatusaq jirkakunachö,+ taksha jirkakunachö, y jatusaq qerukuna o montikuna rurinchömi mëtsika wanushqakunata rikäyanki.+ Tsënöllam rikäyanki rogakur melanëpaq santukunapaq inciensuta* rupatsiyanqan atska rämayoq jatusaq plantakuna chakinchö mëtsika wanushqakunata. Tsëta rikarmi musyariyanki noqa Jehovä kanqäta.+
14 Pëkunataqa tsënömi castigashaq, markankunaqa juchur* ushashqam y tsunyëkarmi quedanqa. Mëchöpis kawayanqanchöqa, markankunaqa Diblä sitiupa amänunchö këkaq tsunyaq sitiupitapis mas tsunyaqmi quedanqa. Y musyariyanqam noqa Jehovä kanqäta’”.
Nötakuna
^ Kënöpis niyanmi: riukunata.
^ Kënöpis niyanmi: laqmatsir.
^ Melanëpaq nirqa, hebreu idiömachöqa “ismë” ninmi. Tsënoqa despreciarmi nikan.
^ O “jukwan jukwan kakur”.
^ Kënöpis niyanmi: saytar; jaytar.
^ Kënöpis niyanmi: pecäduta.
^ O “pestiwanmi”.
^ O “pukutaqta o mushkoqta”.
^ Kënöpis niyanmi: laqmar.
