Filemon 1:1-25
1 Cristu Jesusrëkur carcelarëkaq+ noqa Pablupita y wawqintsik Timoteupita,+ alläpa kuyë yanapakoq mayïkuna Filemonpaq,
2 panintsik Apfiapaq, Cristuta soldädunö sirweq mayintsik Arquïpupaq+ y wayikichö juntakaqkunapaq:+
3 Teytantsik Dios y Señornintsik Jesucristu qamkunawan alläpa alli këkuyätsun y yamë kayänëkipaq yanapëkuyäshuy.
4 Mañakunqächö qampaq mañakurqa, Teyta Diosnïtam imëpis agradecikü.+
5 Tsëtaqa rurä, markäkoq o yärakoq kanqëkipita y Señor Jesusta y limpiu nunakunata kuyanqëkita imëpis wiyarmi.
6 Teyta Diosmanmi mañakü, wakin creikoq mayikikunanölla markäkoq o yärakoq kar, Cristurëkur imëka allikunata chaskinqantsikta cuentata qokunëkipaq.
7 Qamrëkurmi wawqi, limpiu nunakunapa shonqun kallpayoq tikrashqa,* tsëmi kuyakoq kanqëkita wiyar alläpa kushikurqö y shoqashqa karqö.
8 Tsëmi Cristupa apostolnin kar allita ruranëkipaq mandanaqpaq autoridäyoq karpis,
9 kuyakoq kanqëkita musyar jukta rogakuynikita munä. Noqa Pabluqa mayor nunanam kä, y kananqa Cristu Jesusta sirwinqärëkurmi prësu këkä.
10 Tsurï cuenta Onësimupaqmi+ rogakoq, noqaqa prësu këkarmi* pëpa papänin cuenta tikrarqä.+
11 Unëqa manam qampaq ütiltsu karqan, peru kananqa qampaq y noqapaqpis ütilmi.
12 Pëtam qamman kutitsimü, awmi, pëta, alläpa kuyanqä kaqta.
13 Alli noticiakunata willakunqärëkur prësu këkanqäyaqmi, qam sirwimänëkipa rantin pë sirwimänampaq këchö quedatsikuyta munä.+
14 Peru qamwan manaraq parlarqa manam ima rurëtapis munätsu, tsënöpa tsë alli rurëta kikiki munar ruranëkipaq y ama obligashqanöqa.+
15 Capazchi tsërëkur juk tiempupa* qampita karuchö kashqa: qamllana imëyaqpis yapë katsinëkipaq,
16 peru manana sirwipakoqtanöqa,+ sinöqa mastanöna, awmi, kuyë wawqitanöna.+ Pëtaqa alläpam kuyä, y qamnäqa masraqchi, yapë juntu kayänëki kaptin y cristiänu mayiki kaptin.
17 Tsëmi amïgutanö rikämarqa, noqata chaskimaq cuentalla pëtapis shumaq chaskïkuy.
18 Manam tsëllatsu, përëkur imatapis perdishqa kaptiki o imatapis jaqëki kaptinqa, kikïmi pagashqëki.
19 Noqa Pablum makïwan qamman qellqamü: noqam pagashqëki (tsënö kaptimpis, qampis vïdëkipitam debimanki).
20 Awmi wawqi, Señorpa qateqnin karnin tsëta rurar yanapëkamë; Cristupa qateqnin kar shonqü kallpayoq kanampaq* yanapëkamë.
21 Segürum këkä roganqaqnölla ruranëkipaq kaqta, tsëmi ninqaqpitapis masta ruranëkipaq kaqta musyar qamman qellqamü.
22 Noqapaq mañakuyanqëkirëkurmi qamkunaman kutitsiyämänanta shuyarä,*+ tsëmi posädä alistarëkänëkipaqpis rogakoq.
23 Cristurëkur prësuraq mayï Epafrasmi+ qampaq salüdunta apatsikamun.
24 Tsënöllam yanapayämaq Marcus, Aristarcu,+ Dëmas+ y Lücaspis,+ salüdunkunata apatsikayämun.
25 Qamkunawan alläpa alli kar, imanö pensayanqëkichö Señornintsik Jesucristu bendicïkuyäshuy.
Nötakuna
^ O “limpiu nunakuna kuyakoq tikrayashqa”.
^ Griëgu idiömachöqa “cadenarëkarmi” ninmi.
^ Griëgu idiömachöqa “juk hörapa” ninmi.
^ O “kuyakoq kanampaq”.
^ O “qamkunawan kanäpaq libri këta shuyarä”.
