Filipensis 3:1-21
3 Usharinapaq wawqilläkuna y panilläkuna, Señorwan juknölla kar imëpis kushishqa këkäyë.+ Qamkunapa biennikikunapaq kaptinmi, noqaqa ajayätsu qellqamunqä kaqkunapita qamkunaman yapë qellqamuyta.
2 Cuidakuyë allqunö portakoqkunapita; cuidakuyë jukkunata mana allita ruraqkunapita y cuidakuyë cuerpunkunata roqukoqkunapita.+
3 Noqantsikmi ishpakunantsikpa puntanchö rasumpa señalakushqakunaqa kantsik,+ noqantsikmi Teyta Diospa santu espïritun yanapamashqa sirwintsik y Cristu Jesus ruranqampita alabakuntsik,+ y manam nunakuna confiakuyanqanmantsu confiakuntsik,
4 tsënö kaptimpis, pillapis tsëta rurëta puëdeqqa noqam kä.
Pillapis nunakuna confiakuyanqanman confiakuyta puëdinqanta pensaptinqa, noqam masraq tsë rurëta puëdï:
5 yurinqäpita puwaq junaq pasariptinmi ishpakunäpa puntanchö señalayämarqan,+ Israel nacionpita y Benjamin kastapitam kä, hebreu nunakunapita yureq hebreu nunam kä;+ ley asuntuchöqa fariseum kä;+
6 llapan shonqüwan imatapis rurarmi congregacionchö kaqkunata imëkata rurar sufritsirqä,+ y ley ninqanta rurar allita ruraqnö rikashqa këchöqa, culpannaq kanqätam rikätsikurqä.
7 Tsënö kaptimpis, noqapaq väleq kaqkunatam, Cristupa qateqnin kanäpaq kushishqa dejarqö.*+
8 Manam tsëllatsu, Señornï Cristu Jesuspita yachakunqä alläpa väleq kaptinmi, tsë llapankunata mana väleqpaq churarqö. Përëkurmi tsë llapankunata mana väleqpaq churarqö, y mëtsika basüratanömi rikä, tsënöpa Cristupa rikëninchö alli kanäpaq
9 y pëwan juknölla këkanqäta rikätsikunäpaq, peru leyta cäsukur allita ruraqnö rikashqa kanqäpitatsu, sinöqa Cristuman+ markäkur o yärakur alli kaqta ruraqnö rikashqa kanqäpita,+ awmi, markäkoq kar+ Teyta Diospa rikëninchö allita ruraqnö rikashqa kanqäpita.
10 Noqaqa munä pëta reqita, wanushqampita kawaritsimoq puëdeq kanqampita musyëta+ y pë wanunqannölla wanur sufrinqannö sufritam,+
11 tsënöpa imanöllapis puntata kawarimoqkunawan wanushqäpita kawarimunäpaq.+
12 Manam premiuta chaskirqöraqtsu ni jutsannaq* këta lograrqöraqtsu, sinöqa Cristu Jesus akramar+ noqapaq munanqanta logranäpaqmi kallpachakur këkä.+
13 Wawqikuna y panikuna, noqaqa manam tsëta lograshqana kanqätatsu pensä. Peru këpitam següru këkä: qepachö quedaqkunata qonqëkur+ y puntachö këkaqkunata logranäpaq sutakaqnömi,+
14 Cristu Jesus tsëpaq akramashqa kaptin, Teyta Diospita ciëluchö kawë premiuta+ chaskinäpaq kallpachakur këkä.+
15 Tsëmi Diospa kaqchö alli këkaqkunaqa+ tsënö pensëyoq kashun, y qamkuna imanöllapis jukläya pensayaptikiqa, Teyta Diosmi tsënö pensayänëkipaq yanapayäshunki.
16 Imanö kaptimpis, Diospa kaqchö imanö këkanqantsikmannö mas alliyar sïguishun.
17 Wawqikuna y panikuna, llapëki juntu noqanö këta tïrayë,+ y noqakuna yachatsiyanqaqnölla kawëkaqkunanö kawayë.
18 Mëtsikaqmi, puntataqa seguïdum pëkunapaq parlaq kä, peru kananqa waqarmi pëkunapaq parlä, Cristu sufrimientu qeruchö* wanunqanta mana kaqpaq churayaptin.
19 Pëkunaqa ushananchömi ushakäyanqa, y diosninkunaqa pachankunam. Pëkunaqa penqakuyänampaq kaqkunapitam kushikuyan, y kë patsachö kaqkunamanmi imëpis yarparäkuyan.+
20 Peru noqantsikqa ciëluchömi kawashun,*+ y tsëchö këkaq salvakoq shamunantam, awmi, Señor Jesucristutam llapan shonquntsikwan shuyarëkantsik.+
21 Pëmi imëkatapis autoridäninman churanampaq utilizanqan alläpa puëdeq poderninwan, llakipëpaq* cuerpuntsikta chipapäkuykaq cuerpuntanö tikratsinqa.+
Nötakuna
^ O capazchi “kikï munar dejarqö”.
^ Kënöpis niyanmi: pecädunnaq.
^ Rikäri “Bibliachö palabrakunata entiendinapaq” neqta.
^ O “ciëluchö kawaqkunam kashun”.
^ Kënöpis niyanmi: ankupëpaq; kuyapëpaq.
