Genesis 9:1-29
9 Noëtawan tsurinkunata bendicirmi Teyta Diosqa kënö nirqan: “Wamrëkikuna atska katsun, y patsa juntanqanyaq mirayë.+
2 Patsachö llapan animalkuna, llapan volaq* pishqukuna, patsachö lätëpa pureq llapan animalkuna y lamarchö llapan pescädukunam mantsayäshurniki sïguiyanqa. Tsëmi kanampitaqa llapan animalkunata dominayanki.+
3 Y llapan animalkunam mikuyänëkipaq kanqa. Imanömi tukuyläya plantakunata mikuyänëkipaq dispunirqö,+ tsënöllam llapan kawaq animalkunata y lätëpa pureq animalkunatapis mikuyänëkipaq dispunikä.+
4 Imëka animalpis yawaryoq karmi kawan, tsëmi yawaryoq ëtsataqa mikuyänëkitsu.+
5 Tsënöllam pï nunapis o ima animalpis wanutsiyäshuptikiqa,* tsë wanutsiyäshoqniki kaqta cuentata mañashaq. Pitapis wanutseq o wañutseq animalqa wanutsishqam kanqa, y nuna mayinta wanutseq nunapis wanutsishqam kanqa.+
6 Noqa Dios Yayaqa kikï rikoqtam nunata rurarqä.+ Tsëmi pillapis nuna mayinta wanutsiptinqa,* kikintapis wanutsiyänëki.+
7 Atska wamrayoq kayë, y patsa juntanqanyaq mirayë”.+
8 Tsëpitanam Teyta Diosqa Noëta y tsurinkunata nirqan:
9 “Kananmi juk acuerduta rurä qamkunawan,+ qamkunapita yureq kastëkikunawan
10 y arcapita qamkunawan yarqoq llapan animalkunawan; volaq* pishqukunawan, manshu animalkunawan y chukaru animalkunawan. Juk parlakuychöqa, patsachö llapan kawaqkunawan.+
11 Kë acuerdutam qamkunawan rurä: fuerti tamyawanqa* manam patsata ni patsachö kawaqkunata imëpis ushakätsishaqnatsu”.+
12 Tsëpitanam Teyta Diosqa nirqan: “Kë señalmi imëpis yarpätsiyäshunki qamkunawan y llapan animalkunawan ruranqä acuerduta:
13 turmanyënïmi pukutëchö yurimunqa. Tsëmi yarpätsikunqa patsachö llapan kawaqkunawan acuerdu ruranqäta.
14 Tsëmi patsa jananchö pukutë kaptinqa, tsëchö imëpis turmanyë yurinqa.
15 Tsënömi yarpäshaq qamkunawan y tukuyläya animalkunawan acuerdu ruranqäta. Y manam fuerti tamyawanqa patsachö llapan kawaqkunata imëpis ushakätsishaqnatsu.+
16 Pukutëchö turmanyë yureqta rikarqa, qamwan y patsachö llapan animalkunawan mana ushakaq acuerduta ruranqätam yarpäshaq”.
17 Tsëpitanam Teyta Diosqa Noëta yapë nirqan: “Kë señalmi rikätsikun patsachö llapan kawaqkunawan acuerduta ruranqäta”.+
18 Arcapita yarqoq Noëpa tsurinkunaqa kayarqan Sem, Cam y Jafetmi.+ Y tsëpitaqa, Campa tsurin Canaanmi yurirqan.+
19 Tsë kimanmi Noëpa tsurinkuna kayarqan, y pëkunapitam patsachö llapan nunakuna mirayarqan.+
20 Tsëpitanam Noëqa chakrachö murukur qallëkurqan, y üvas plantakunatam plantarqan.
21 Vïnuwan macharkurmi carpan* rurinchö llapan röpanta jipikurqan.
22 Y Canaanpa papänin Camqa, papänin Noëta qalapächuta rikëkurmi ishkan wawqinkunata willaq ëwarqan.
23 Tsënam Semwan Jafetqa jakuta ishkan lädupa tsarirkur* y umbrunkunayaq pallarkur* qepapëllapa yëkuyarqan. Y qalapächu këkaq papäninta mana rikäyänampaqmi juk läduman tumarëkarlla jakuwan tsaparkuyarqan.
24 Vïnuwan machanqampita kachakärirmi Noëqa musyaskirqan ultimu kaq tsurin* imata rurashqa kanqanta,
25 tsëmi kënö nirqan:
“Maldïtu Canaan.+
Pëqa wawqinkunapa esclävunmi* kanqa”.+
26 Tsëpitanam nirqan:
“Canaanqa Sempa esclävun katsun.+ Y Sempa Teyta Diosnin Jehovä alabashqa katsun.
27 Jafet-taqa jatun sitiun Teyta Dios entregatsun,y Jafetqa Sempa carpankunachö* kawatsun.
Y Canaanqa Jafetpapis esclävun katsun”.
28 Alläpa tamya pasanqampitaqa trescientus cincuenta wata masran Noëqa kawarqan.+
29 Y novecientus cincuenta watayoq këkarmi Noëqa wanukurqan.
Nötakuna
^ Kënöpis niyanmi: päreq; vuëlaq.
^ O “kawatsiyäshoqniki yawarnikikunata jichaptinqa”.
^ Hebreu idiömachöqa “nunapa yawarninta ramanqa o jichanqa” ninmi.
^ Kënöpis niyanmi: päreq; vuëlaq.
^ O “diluviuwanqa”.
^ Kënöpis niyanmi: toldun.
^ Kënöpis niyanmi: achkurkur.
^ Kënöpis niyanmi: joqarkur.
^ “Tsuri” nirqa, höraqa willkapaqmi parlan.
^ O “mas allqutsashqa kaq esclävunmi”.
^ Kënöpis niyanmi: toldunkunachö.
