Habacuc 3:1-19
3 Teyta Diospa willakoqnin Habacuc llakikur mañakunqan. Tsë mañakunqanqa llakikuypaq cancionnömi karqan, kënömi nin:
2 Teyta Jehovä, qampaq imëkata willakuyanqantam wiyarqö.
Teyta Jehovä, imëkata ruranqëkikunapitaqa alläpam espantakü.
¡Cada wata* tsëkunata yapë rurëkullë!
Cada wata tsëkunapita musyatsikullë.
Cölerashqa kanqëki höra ama llakipäyämëta* qonqëkullëtsu.+
3 Qam limpiu Teyta Diosqa,Teman sitiupita y Paran+ jirkapitam shamurqëki. (Sëlah).*
Alläpa puëdeq kanqëkiqa ciëlutapis tsaparkurqanmi,+y entëru patsachömi alabayäshurqëki.
4 Qamqa aktsinömi chipaparqëki.+
Makikipitam ishkë räyukuna yarqamurqan,tsë makikichömi kallpëki këkarqan.
5 Qampa puntëkitam imëka qeshyakuna ëwayarqan,+y qepëkitanam fiebri ëwarqan.
6 Shäkuriptikiqa* entëru patsam kuyurqan.+
Rikëkuptikillam llapan nacionpita nunakuna karkaryäyarqan.+
Mana ushakaq jirkakunapis pakirmi ushakäyarqan,+y unë kaq taksha jirkakunapis juchuyarqanmi.*
Unë imatapis ruranqëkinöllam kanampis rurëkanki.
7 Cusanpita nunakunatam carpankunachö* llakishqata rikarqä.
Madianchö carpakunapa tëlankunapis kuyuyarqanmi.+
8 Teyta Jehovä, ¿mayukunawanku* cölerashqa këkanki?
¿O lamarwan cölerashqa karku+cawalluykikunata montarkur ëwarqunki?+
Guërrapaq carrëtëkikunam salvacionta apayämurqan.+
9 Flechakunëkitapis alistarqunkinam.
Änikunqëkinömi* armakunapis* utilizäyänampaq listuna këkäyan. (Sëlah).
Mayukunawanmi* patsatapis rakirqunki.
10 Rikëkushurnikim jirkakunapis alläpa nanatsikuyarqan.+
Fuerti tamyam patsata limpiarqan.
Yakupis fuertipa büllar yarqamurmi+altu altuyaq pillchirqan.*
11 Inti o rupay y killapis këkäyanqanllachömi quedakuyarqan,+ y manam aktsiyänampaq yarqayämurqantsu.
Flëchëkikunapis räyunöran yarqayämurqan.+
Lanzëkipis räyunöran atsikyarqan.
12 Alläpa cölerashqam entëru patsapa purirqunki.
Alläpa cölerarmi trillaq cuenta llapan nacion nunakunata jarurqunki.
13 Sirwishoqnikikunata y akrashqëkita salvaqmi ëwarqunki.
Mana allita ruraq nunapa wayinchö mandakoqtam ushakätsirqunki.
Tëchumpita cimientunyaq wayita ushakätseqnömi pasëpa* ushakätsirqunki. (Sëlah).
14 Fuerti tamyanöraq conträ shamuykäyaptinmi,pelyëta yachaq nunankunata kikinkunapa lanzankunawan wanutsirqunki o wañutsirqunki.
Pëkunaqa sufrikaqtam pakëllapa wanutsita munayarqan.
15 Cawalluyki montashqam lamarta tsimparqunki,mëtsika laqcheqyëkaq yakupam tsimparqunki.
16 Tsëkunata wiyar alläpa mantsakaptïmiwirpäpis karkaryarqan.
Entëru cuerpüpis kallpannaqmi tikrarqan,+y chankäkunapis karkaryarqanmi.
Tsënö kaptimpis, tsë llakikuypaq junaqtaqa pacienciawanmi shuyaräshaq.+
Tsë junaqqa, qammi chikimaqnïkunawan pelyanki.
17 Hïgus planta mana wëtaptin,üvas planta mana wayuptin,aceitünas cosëcha mana kaptin,chakrakunachö mikuy mana wayuptin,y corralkunachö üshani wäka mana kaptimpis,
18 Teyta Jehoväman yarparmi alläpa kushikushaq,y salvamaq Teyta Diosman pensarmi kushishqa kashaq.+
19 Llapanta gobernaq Teyta Jehovämi kallpayoqta tikratsiman.+
Pë yanapamaptinmi china luychunöraq purishaq,y altu sitiukunapam puritsimanqa.+
Nötakuna
^ Kënöpis niyanmi: ankupäyämëta; kuyapäyämëta.
^ O capazchi “Kanan tiempuchöpis”.
^ Kënöpis niyanmi: Ichirkuptikiqa.
^ Kënöpis niyanmi: laqmayarqanmi.
^ Kënöpis niyanmi: toldunkunachö.
^ Kënöpis niyanmi: riukunawanku.
^ O capazchi “cada kastapita änikuyanqannömi”.
^ O capazchi “flëchakunapis”.
^ Kënöpis niyanmi: Riukunawanmi.
^ Kënöpis niyanmi: chispiarqan.
^ Kënöpis niyanmi: jankat.
