Job 1:1-22
1 Uz markachömi Job*+ jutiyoq nuna kawarqan. Jobqa mana culpayoqmi karqan, alli kaqllatam ruraq,+ Teyta Diostam respetaq y mana allikunataqa manam ruraqtsu.+
2 Pëpaqa, qanchis ollqu tsurinkuna y kima warmi tsurinkunam karqan.
3 Tsënöllam siëti mil üshankuna, tres mil camëllunkuna, mil wäkankuna y quinientus ashnunkuna kapurqan. Y sirweqninkunapis atskaqmi kayarqan. Tsëmi Jobqa inti o rupay yarqamunan läduchö nunakunapita mas kapoqyoq y respetashqa karqan.
4 Ollqu tsurinkunaqa, cada ünuta tocanqan junaqmi juntakëkur mikuyänampaq wayinkunachö mikuyta ruratsiyaq. Tsëmanmi kiman paninkunatapis invitayaq, mikur y upur kayänampaq.
5 Llapankunapa wayinchö mikuriyaptinnam, Jobqa Teyta Diospa rikëninchö limpiu kayänampaq llapan tsurinkunata qayatseq. “Capaz mëqan tsurïpis Teyta Diospa rikënimpaq jutsata* rurashqa o shonqunchö Teyta Diospaq mana allita pensashqa” nirmi, tempränulla sharkur cada tsurimpa jutinchö Teyta Diospaq qarëkunata rupatseq,+ y tsënömi imëpis ruraq.+
6 Teyta Jehoväpa angelninkuna* juntakäyanqan junaqmi,+ llapan angelninkuna pëpa puntanman juntakäyarqan,+ y tsëmanmi Satanas Diablupis+ charqan.+
7 Tsënam Teyta Jehoväqa Satanasta tapurqan “¿mëpitataq shamuykanki?” nir. Satanasnam, “entëru patsata rikapakoq ëwanqäpitam” nir Teyta Jehoväta contestarqan.+
8 Tsënam Teyta Jehoväqa Satanasta nirqan, “¿rikarqunkiku sirwimaqnï Job imanö kanqanta? Pënöqa manam ni pï patsachö kantsu. Pëqa culpannaqmi, alli kaqllatam ruran y respetamarmi mana allikunataqa rurantsu”.+
9 Tsënam Satanasqa Teyta Jehoväta nirqan, “¿mana imatapis chaskikarku Jobqa respetashunki?+
10 Qamqa pëta, wayinchö kaqkunata y llapan kapunqantam, cercu cuenta imëkapita cuidëkanki.+ Tsënöllam llapan ruranqanchöpis bendicirqunki+ y wakinkunapita mas atska animalkunayoq kanantam permitirqunki.
11 Llapan kapunqanta ushakätsiptikiqa, cärëkichömi qampaq mana allita parlanqa”.
12 Tsënam Teyta Jehoväqa Satanasta nirqan, “llapan kapunqanmi makikichö këkan. Peru pëtaqa ama imanëtsu”. Tsënö niptinnam Satanasqa Teyta Jehoväpa puntampita* ëwakurqan.+
13 Tsëpitanam ollqu tsurinkuna y warmi tsurinkuna, mayor kaq tsurimpa wayinchö mikur y vïnuta upur këkäyaptin,+
14 sirweqnin char Jobta kënö willarqan: “Yuntakunawan yapyëkäyaptin y amänunchö ashnukuna mikuykäyaptinmi,
15 sabeu nunakuna chëkur llapanta apakuyashqa, y sirwishoqnikikunatam espädawan wanutsiyashqa. Noqallam qamta willanaqpaq qeshpir shamurqö”.
16 Tsënö willëkaptinmi juk sirweqnin char Jobta willarqan, “ciëlupita nina* shikwamurmi üshëkikunata y sirwishoqnikikunata rupar ushakätsishqa. Noqallam qamta willanaqpaq qeshpir shamurqö”.
17 Tsë kaq sirweqnin manaraq willar ushaptinmi, juk sirweqnin char Jobta willarqan, “kima grüpu caldeu nunakunam,+ camëlluykikunata apakuyashqa, y sirwishoqnikikunatam espädawan wanutsiyashqa. Noqallam qamta willanaqpaq qeshpir shamurqö”.
18 Pëpis manaraq willar ushaptinmi, juk sirweqninna chëkur Jobta willarqan, “ollqu tsurikikuna y warmi tsurikikuna mayor tsurikipa wayinchö mikur y vïnuta upur këkäyaptinmi,
19 tsunyaq sitiupita fuerti vientu shamurnin juntarëkäyanqan wayita juchutsishqa,* y wayi juchurmi llapan tsurikikunata wanutsishqa. Noqallam qamta willanaqpaq qeshpir shamurqö”.
20 Tsënam Jobqa sharkur röpanta rachirqan y llapan aqtsanta rutukurqan. Tsëpitanam urkumpis patsaman chanqanyaq qonqurïkur
21 kënö nirqan:
“Mamäpa pachampitaqa jinëllam yarqamurqä, y jinëllam wanukushaqpis o wañukushaqpis.+
Teyta Jehovä permitiptinmi imëkäpis kapamashqa,+y Jehovä Dios permitiptinmi imëkäpis ushakashqa.
Teyta Diospa jutin Jehovä imëpis alabashqa këkullätsun”.
22 Tsë llapampa pasëkarpis, Jobqa manam Teyta Diospa rikënimpaq jutsata* rurarqantsu ni mana allikunapa pasanqampita culparqantsu.
Nötakuna
^ Tsëqa capazchi, “imëka mana allikunawan sufritsishqa kaq” ninan.
^ Kënöpis niyanmi: pecäduta.
^ O “tsurinkuna”.
^ O “rikënimpita”.
^ O capazchi “räyu”.
^ Kënöpis niyanmi: laqmatsishqa.
^ Kënöpis niyanmi: pecäduta.
