Job 11:1-20
11 Tsënam naamatïta Zofarqa+ kënö nirqan:
2 “¿Pillapis manatsuraq imallatapis nishunki?
¿O alläpa parlarku rasumpa kaqta ninqëkita pensanki?
3 ¿Mana kaqta parlanqëkiwanku wakinkunata upällatsita munanki?
¿Manatsuraq burlakunqëkipita pillapis corregishunki?+
4 Qamqa ‘alli kaqllatam yachatsikü,+y Teyta Diospa rikëninchöpis limpium këkä’+ ninkim.
5 Ojalä Teyta Dios imatapis nïkushunkiman,y parlanqëkimannö contestëkushunkiman.+
6 Tsëqa yachaq karmi musyanqanta yachatsishunkiman,y imëkatachi yachakunkiman,y wakin pantanqëkikunata Teyta Dios qonqëkunqantachi musyankiman.
7 Teyta Dios llapan yachanqantaqa, manachi musyankimantsu.
Y Llapanta Puëdeq Diospitaqa, manachi llapantaqa yachakunkimantsu.
8 Yachaq këqa ciëlupitapis mas altuchömi këkan, ¿imatataq logrëta puëdinkiman?
Sepultürapita* mas rurichömi këkan, ¿imatataq yachakuyta puëdinkiman?
9 Patsapitapis mas largum,y lamarpitapis mas anchum.
10 Pitapis juiciuman prësur apaptinqa,¿piraq ama tsëta rurëtsu ninman?
11 Pëqa musyanmi pï rasumpa kaqta mana parlanqanta.
Y mana allita ruraqkunataqa manam tsënöllatsu dejan.
12 Tsënö kaptimpis, chukaru ashnu nunata wachaptinran,*upa nunakunaqa imallatapis entiendiyanqa.
13 Ojalä alli kaqtana ruranëkipaq decidinkimany makikikunata pallarkur* Teyta Diosman mañakunkiman.
14 Ama mana allikunata rurënatsu,y ama dejëtsu carpëki* rurinchö mana allikunata rurayänanta.
15 Tsëqa manam imatapis penqakunkitsu,y manam imatapis mantsankitsu.
16 Llapan pasashunqëkitam qonqarinki,y yaku pasanqantanöllanam yarpanki.
17 Ëka watana kawanqëkipis, pullan junaqpita masmi atsikyanqa,kawënikipis ampinö o tsakënö karpis, patsa warënömi atsikyanqa.
18 Yapë alli kawakunëkipaq kaqta yarparmi tranquïlu kawakunki,wakpa këpa rikachakuykurmi mana mantsakushpa punukunki.
19 Punukunqëki höraqa manam mantsakätsiyäshunkitsu,y atskaqmi qamwan alli këta munar shumaq tratayäshunki.
20 Peru mana allikunata ruraqkunaqa manam rikäyanqanatsu,y manam mëman qeshpita puëdiyanqanatsu.
Tsë nunakunataqa wanuyllanam shuyarëkan”.+
Nötakuna
^ O “chukaru ashnu nunanö yuriptinran”.
^ Kënöpis niyanmi: joqarkur.
^ Kënöpis niyanmi: tolduyki.
