Job 40:1-24
40 Teyta Jehoväqa Jobta kënöpis nirqanmi:
2 “Imëkapitapis quejakoq nuna, ¿puëdinmantsuraq Llapanta Puëdeq Dioswan pleytuyta?+
Teyta Diosta corregita munaq nuna, mä imatapis nitsun”.+
3 Tsënam Jobqa Teyta Jehoväta nirqan:
4 “Noqalläqa manam imatsu kallä,+¿imataraq nillaqman?
Tsëmi upällakur makïwan shimïta tsapakü.+
5 Juk kuti parlashqa karpis kananqa manam parlashaqnatsu,yapë parlashqa karpis, kananqa manam imatapis nishaqnatsu”.
6 Tsënam Teyta Jehoväqa fuerti vientu rurimpita Jobta kënö nirqan:+
7 “Qamta tapuptï contestamänëkipaq,shumaq alistakuy y ollqunö portakuy.+
8 ¿Mana allita ruraq kanqätatsuraq ninki?
¿Alli kaqta ruraq kanqëkita rikätsikunëkipaqtsuraq condenamanki?+
9 ¿Alläpa puëdeq noqa Diosnöku kanki?+
¿Parlanqëkipis noqa parlanqänöku räyunöraq wiyakan?+
10 Tsënö kaptinqa, puëdeq y kallpayoq kanqëkitay wakimpita mas alli kar respetashqa kanëkipaq kaqta rikätsikuy.
11 Alläpa cölerakunqëkita rikätsikurallish tukoqkunata penqakatsi.
12 Llapan allish tukoqkunata penqakatsiy mana alli ruraqkunata këkäyanqanchö jarur ushë.
13 Llapankunata allpaman pampëkuy,y pakaraq sitiuman wichqëkuy.
14 Tsëkunata ruraptikiqa,kallpëkiwan salvakuyta puëdinqëkitam nishaq.
15 Noqam hipopötamuta y qamtapis kamarqoq.
Tsë animalqa törunömi qewata mikun.
16 Rikë tseqllanchö y pachanchömëtsika kallpayoq kanqanta.
17 Chupampis cedru qerunö chukrum,y chankankunachö ankunkunapis awashqanömi këkan.
18 Tullunkunaqa cobripita rurashqanömi,y chankankunapis fiërrupita rurashqanömi.
19 Noqa kamanqä animalkunapitaqa pëmi mas mantsëpaq,y Kamaqninllam* espädanwan wanutsita puëdin.
20 Chukaru animalkuna pukllar cörrikachäyanqan jirkakunachömi,mikunan tarin.
21 Lötukuna chakinchömi punun,y shoqush rurin senigachömi päran.
22 Lötu qeru achachëpita tsapan,y lädun pampachöqa mëtsika plantakunam* kan.
23 Mayu* yaku mëtsika shamuptimpis, manam mantsakantsu.
Jordan mayu+ cäranman laqcheqyëkaptimpis, segürum sientikun.
24 Rikarëkaptinqa, ¿puëdinmantsuraq pillapis tsarita*o fiërrupita ganchuwan senqanta uchkuyta?
Nötakuna
^ Hebreu idiömachöqa “Ruraqninllam” ninmi.
^ O “älamu plantakunam”.
^ Kënöpis niyanmi: Riu.
^ Kënöpis niyanmi: achkuyta.
