Joel 1:1-20
1 Petuelpa tsurin Joeltam* Teyta Jehoväqa kënö willakunampaq mandarqan:
2 “Dirigeqkuna këta wiyayë,y kë nacionchö nunakuna willakunqäta wiyakuyë.
Qamkunata willanäpaq* kaqtaqa manam qamkuna rikäyarqunkitsuni unë kastëkikunapis manam rikäyashqatsu.+
3 Tsurikikunata këkunata willayë,pëkunana tsurinkunata willayätsun,y willkëkikunana tsurinkunata willayätsun.
4 Punta grüpu chukllushkuna* mana mikuyanqantam, juk grüpu chukllushkuna mikukurkuyashqa;+tsë grüpu chukllushkuna mana mikuyanqantanam, älannaq chukllushkuna mikukurkuyashqa;y älannaq chukllushkuna dejayanqantanam, juk grüpu chukllushkuna mikukurkuyashqa.+
5 ¡Machashqa+ këkaqkuna cuentata qokuyë y waqayë!
Llapëki vïnuta upoqkuna llakikuyë,mishkeq vïnuqa mananam kanqanatsu.+
6 Juk nacion nunakunanömi mëtsikaq chukllushkuna* markäman chäyämushqa.+
Kirunkunapis y chakallwankunapis* leonpanöran.+
7 Üvas plantätapis pasëpam* ushakätsiyashqa y hïgus plantäpapis troncunllanam quedashqa.
Qarantapis shiptëkurmi jitariyashqay rämankunachöpis manam qaran kannatsu.
8 Casakunampaq äninqan jövin* wanuptin o wañuptin,chukru tëlata churakurkur shipash* llakikur waqanqannö llakikuyë.
9 Teyta Jehoväpa wayinmanqa mananam gränupita rurashqa qarëta+ ni vïnu qarëta+ apayannatsu.
Teyta Jehoväta sirweq sacerdötikunapis llakishqam këkäyan.
10 Murukuykunatapis llapantam ushakätsiyashqa, y manam imapis chakrakunachö jeqamunnatsu.+
Gränukunapis ushakashqam, llullu vïnupis ushakärishqam y aceitipis manam kannatsu.+
11 Trïgupis y cebädapis mana kaptinmi murukoqkunaqa imanö këtapis puëdiyantsuy üvasta muroqkunapis llakishqam këkäyan.
Murukuykunapis llapanmi perdishqa.
12 Üvas plantakunapis llapanmi tsakishqa,hïgus plantakunapis ushakäyashqam.
Granäda planta, palmëra planta y manzäna plantapis tsakishqam.+
Pampakunachö llapan plantakunam* tsakiyashqa.
Markachö nunakunapa kushikuyninkunam penqakuyman tikrashqa.
13 Teyta Diospa wayinmanqa mananam gränupita rurashqa qarëkunata+ ni vïnu qarëkunata+ apayämunnatsu.
Tsërëkur chukru tëlata vistikuyë y llakikuyë sacerdötikuna.
Llakikuyë* altarchö sirweqkuna.+
Teyta Diosnïta sirweqkuna templunman shayämuy, y chukru tëlata vistishqa tsëchö waräyë.
14 Ayunayänampaq mandakuyë y Teyta Diosta alabayänëkipaq juntakäyë.+
Dirigeqkunata y llapan nunakunata Teyta Jehoväpa wayinman juntayë,+yanapëkuyäshunëkipaq Teyta Jehoväman rogakuyë.
15 Tsë tiempuqa alläpa mantsakëpaqmi kanqa.
Nunakunata Teyta Jehovä juzganan tiempuqa këllachönam këkan.+
Llapanta Puëdeq Teyta Diosqa llapantam ushakätsinqa.
16 Manam mikuynintsikkunapis kannatsu.
Teyta Diospa wayinchöpis manam kushikuy kannatsu.
17 Pëkuna muruyanqan murupis* tsakirmi ushakäshqa.*
Mikuy churakuna cuartukunachöpis manam mikuy kantsu.
Gränu mikuykuna manana kaptinmi, gränu churakuna wayikunatapis ushakätsiyashqa.
18 Animalkunapis llakishqam këkäyan.
Qewa mana kaptinmi wäkakunapis wakpa këpa oqrakashqa puriyan.
Üshakunapis alläpam sufriyan.
19 Pampakunachö qewakunata nina ushashqa kaptin,y pampakunachö llapan jatusaq montikunata o qerukunata nina ushashqa kaptinmi,qamman rogakamushaq Teyta Jehovä.+
20 Ëwaq yakukunapis tsakishqa kaptin,y pampakunachö qewakunatapis nina ushashqa kaptinmi,chukaru animalkunapis Teyta Dios, yanapëkunëkita shuyarëkäyan”.
Nötakuna
^ Joelqa, “Jehovämi Teyta Diosqa” ninanmi.
^ Kënöpis niyanmi: willayänaqpaq.
^ Kënöpis niyanmi: churqapikuna.
^ Kënöpis niyanmi: churqapikuna.
^ Kënöpis niyanmi: aqlinkunapis; kachillwankunapis.
^ Kënöpis niyanmi: jankatmi.
^ O “runan; qowan; ollqun”.
^ O “piwampis mana oqllanakushqa shipash”.
^ O “montikunam”.
^ O “Pëchuykikunata kutakuyë”.
^ O capazchi “tsakishqa hïguspis”.
^ O “lampankunawan muruykäyaptinllam tsakiriyashqa”.
