Joel 3:1-21
3 “Judäpita y Jerusalenpita juk nacionmanapashqa kaqkunata kutitsimunqä witsanqa,+
2 juk nacionpita nunakunatapis juntashaqmi,y Jehosafat* pampamanmi* urätsishaq.
Tsëchömi sirwimaqnïkunata y akranqä Israel nunakunataimëkata rurayanqampita juzgashaq.+
Pëkunaqa sirwimaqnïkunata juk nacionkunaman qarquskirmi,markankunata rakipänakuyarqan.+
3 Pëkunaqa sortiëkurmi sirwimaqnïkunata rakipänakuyarqan.+
Qellëpaqrëkur jukwan jukwan kakoq* warmiwan oqllanakuyänampaqmi ollqu wamrakunata rantikuyaq,y vïnuta rantiyänampaqnam warmi wamrakunata rantikuyaq.
4 Tïruchö, Sidonchö y Filistëa markakunachö nunakuna,¿imanirtan conträ këkäyanki?
¿Qamkunata ima mana allitapis ruranqäpitaku vengakuykäyanki?
Noqapita vengakuykäyaptikiqa,noqaqa jinan höram rurëta munëkäyanqëkinö qamkunata rurayashqëki.+
5 Qamkunaqa plätäta y örütam apakuyarqunki,+y mas väleq cösasnïkunatam templuykikunaman churayarqunki.
6 Markankunapita karuman apashqa kayänampaqmi, Judäpita y Jerusalenpita nunakunata,Greciapita nunakunata rantikuyarqunki.+
7 Tsënö kaptimpis, rantikuyanqëki markakunapitam pëkunata kutitsimushaq,+y vengakur rurëta munëkäyanqëkinömi qamkunata rurayashqëki.
8 Qamkunapa ollqu y warmi tsurikikunatam Judä nunakunata rantikushaq,+y pëkunanam karu nacionchö Säbapita* nunakunata rantikuyanqa.
Kikï Jehovämi tsënö kanampaq nikä.
9 Mëtsë nacionkunachö kënö willakuyë:+
‘¡Guërrapaq alistakuyë! ¡Puëdeq nunakunata qayatsiyë!
¡Llapan soldädukuna guërraman ëwar pelyayätsun!+
10 Takllëkikunapa puntampita o planchampita espädata rurayë, y ösikikunapita* lanzata rurayë.
Kallpannaq kaqkuna, “kallpayoqmi kä” niyätsun.
11 ¡Shamur yanapanakuyë amänunchö këkaq nacionkuna! ¡Llapëki juntakäyë!’”.+
Jehovä Diosllä, puëdeq soldäduykikuna tsë sitiuman uräyämutsun.
12 “Mëtsë nacionkuna juntakäyätsun y Jehosafat pampaman* witsäyämutsun.
Amänunchö këkaq nacionkunata juzganäpaqmi tsëchö jamakushaq.+
13 Poqushqana murukuykunata segayë.
Vïnuta rurayänëkichöqa üvas juntanam këkan,+ jaruyänëkipaq uräyë.
Imëka mana allikunata rurashqa kayaptinmi, vïnuta juntayänan pözukunaqa juntana këkan.
14 Juiciuta rurayänan pampachö* noqa Jehovä nunakunata juzganä tiempuqa këllachönam këkan,tsëpaqmi mëtsikaq nunakuna juiciuta rurayänan pampachö këkäyan.+
15 Intipis o rupaypis y killapis mananam atsikyanqanatsu,y estrëllakunapis mananam chipapäyanqanatsu.
16 Noqa Jehoväqa Sion jirkapitam leonnö qayaräshaq.
Jerusalenpitam fuertipa parlamushaq.
Ciëlupis y patsapis kuyunqam,peru noqa Jehoväqa machë cuentam sirwimaqnïkunapaq kashaq.+
Israel nunakunapaqqa següru sitiunömi kashaq.
17 Qamkunaqa noqa Jehovä Diosnikikuna kanqätam musyayanki.
Noqaqa sagrädu Sion jirkachömi kawä.+
Jerusalenqa sagrädu sitium kanqa,+ y juk nacion nunakunaqa,* manam yapë tsëpa pasayanqatsu.+
18 Tsë witsanqa, jirkakunachömi mëtsika llullu vïnu kanqa.+
Taksha jirkakunachömi mëtsika lichi kanqa,y Judächö llapan mayukunapam* mëtsika yaku ëwanqa.
Noqa Jehoväpa wayïpitam yaku pashtamunqa,+y entëru Sitim pampatam oqunqa.
19 Judächö nunakunata mana alli tratashqa kar,+y culpannaq nunakunata tsëchö wanutsishqa karmi,+Egiptuqa tsunyëkar quedanqa,+y Edompis tsunyaq sitium tikranqa.+
20 Peru Judächöqa imëpis nunakuna kawayanqam,y Jerusalenchöpis nunakuna kanqam.+
21 Culpayoq kashqa karnimpis, kananqa culpannaqnam kayanki.+
Noqa Jehoväqa Sion jirkachömi kawashaq”.+
Nötakuna
^ Tsëqa, “Jehovämi juez” ninanmi.
^ O “ruri pampamanmi”.
^ O “oqllanakoq”.
^ O “Sëbapita”.
^ O “planta rutukuyänëkipita”.
^ O “ruri pampaman”.
^ O “ruri pampachö”.
^ O “forastërukunaqa”.
^ Kënöpis niyanmi: riukunapam.
