Jonas 1:1-17
1 Amitaipa tsurin Jonastam* Jehovä Dios nirqan:+
2 “Jatun Nïnivi markachö+ nunakuna alläpa mana allikunata rurëkäyanqantam rikarqö, tsëmi ushakäyänampaq kaqta willanëkipaq Nïnivi markata ëwanëki”.
3 Tsënö kaptimpis, Jonasqa Teyta Jehoväpita qeshpirmi Tarsis nacionman ëwakuyta decidirqan. Tsëmi Jöpi markaman urarqan, tsëchömi Tarsis nacionta ëwaq barcuta tarirqan. Pasäjinta paguëkurmi, tsë barcuwan Tarsis nacionta ëwakurqan. Tsëtaqa rurarqan Teyta Jehovä mandanqanta mana cäsukunanrëkurmi.
4 Tsënam Teyta Jehoväqa lamarchö alläpa feyupa vientutsir qallëkurqan, tsëmi fuertipa tamyaptin lamarpis feyupa laqcheqyar qallëkurqan, y barcupis cäsim ushakarqan.
5 Barcuchö trabajaqkunaqa* alläpa mantsakarmi cada ünu santunkunaman qayakur qallëkuyarqan. Barcu lasarnin mana hundikänampaqmi wakin cargakunata lamarman jitayarqan.+ Tsëyaqmi Jonasqa barcu* rurinman yëkuykur punuykarqan.
6 Tsënam barcuchö mandakoqqa* “¿imanirtaq qamqa punukuykanki? ¡Sharkur diosnikiman mañakuy! Capaz rasumpa kaq Diosqa llakipämarnintsik* salvëkamashwan”+ nirqan.
7 Tsëpitanam juknin juknin “shayämuy sortianapaq,*+ mä mëqantsikpa culpantsikshi kë mana alli pasëkämantsik” ninakuyarqan. Tsënömi Jonas culpayoq kanqanta musyayarqan.+
8 Tsëmi niyarqan: “Willayämë, ¿qampa culpëkiku kë mana allita pasëkantsik? ¿Imachötan trabajanki? ¿Mëpitataq shamunki? ¿Më nacionpitataq kanki? ¿Më markapitataq kanki?”.
9 Tsënam Jonasqa, “noqaqa hebreum kä, ciëluchö këkaq Jehovä Diostam adorä, lamarta y tsaki patsata kamaq Diosta” nirqan.
10 Tsëpitanam Jehoväta mana cäsukur ëwakuykanqanta tsë nunakunata willarqan. Tsënam nunakunaqa masraq mantsakarnin, “¿imanirtan tsëta rurarqunki?” nir tapuyarqan.
11 Lamar mas feyupa laqcheqyaqta rikarmi, “¿imatataq rurayaqman lamar calmakänampaq?” niyarqan.
12 Tsënam Jonasqa “noqapa culpämi kë mana allipa pasëkäyanki. Lamarman jitarkayämë. Tsëran lamarqa calmakärinqa” nirqan.
13 Tsënö niptimpis, tsë nunakunaqa imëkanöpam tsaki patsaman barcuta chätsita munayarqan, peru lamarqa mas peormi laqcheqyarqan, tsëmi tsaki patsaman chätsita puëdiyarqantsu.
14 Tsënam pëkunaqa kënö nirnin Jehoväman mañakuyarqan: “Jehovä Dios, qam permitiptikim kë mana allipa pasëkäyä. Ama permitïkuytsu kë nunapa culpan ushakäyänäta, y ama kë nunapa kawënimpita culpëkayämëtsu Jehovä”.
15 Tsëpitanam Jonasta pallarkur* lamarman jitarkuyarqan, tsë höram lamarqa calmarirqan.
16 Tsënam tsë nunakunaqa alläpa mantsakarnin llapan shonqunkunawan Jehoväta respetar qallëkuyarqan.+ Tsëpitanam Jehoväpaq qarëta rupatsiyarqan, y pëllatana sirwiyänampaqmi änikuyarqan.
17 Tsëpitanam, Teyta Jehovä permitiptin jatun pescädu Jonasta amurkurnin entëruta pasarkatsirqan. Jonasqa kima junaq y kima paqasmi tsë pescädupa pachanchö karqan.+
Nötakuna
^ Jonasqa, “paluma” ninanmi.
^ O “marinërukunaqa”.
^ O “bodëgayoq barcu”.
^ O “capitanqa”.
^ Kënöpis niyanmi: ankupämarnintsik; kuyapämarnintsik.
^ Rikäri “Bibliachö palabrakunata entiendinapaq” neqta.
^ Kënöpis niyanmi: joqarkur.
