Jonas 2:1-10
2 Tsënam Jonasqa jatun pescädupa pachanchö këkar Diosnin Jehoväman mañakurqan.+
2 Y kënömi mañakurqan:
“Teyta Jehovä, imanö këta mana puëdir qamman qayakamuptïmi, qamqa wiyamarqëki.+
Wanunäpaqna këkar y Sepultüra* rurinchönö këkarmi, yanapëkamänëkipaq qayakamurqä.+
Y qamqa wiyamarqëkim.
3 Lamarman jitarkamaptikiqa, lamar rurinchömi rikakärirqä.
Wakpapis këpapis yakullanam laqcheqyäkurqan,+qam permitiptikim laqcheqyëkaq lamar yakupis janäpa pasarqan.+
4 ¡Mananachi rikämëta munannatsu nirqämi!
Sagrädu templuykita manana rikänäpaq kaqtam pensarqä.
5 Yaku tsaparkamaptinmi cäsi ushakarqä,+y hundikarmi qallëkurqä.
Peqäpis o umäpis lamarchö plantakunawanmi wankukaskirqan.
6 Lamar rurinchö jirkakunapa chakinyaqmi charqä,sepultürachö këkaqnönam sientikurqä.
Peru qamqa Jehovä Diosllä, sepultürapita jipimaq cuentam wanuypita o wañuypita salvamarqunki.+
7 Teyta Jehovä, wanuykarnam qamman mañakallämurqä.+
Qamqa mañakamunqätam templuykipita wiyamarqëki.+
8 Mana imapaqpis väleq santukunata adoraqkunaqa, rasumpa kuyakoq Teyta Diostam qonqëkuyan.
9 Peru noqaqa agradecikurnikim alabashqëki, y qampaqmi qarëkunata apamushaq.
Llapan äninqaqtam cumplishaq.+
Teyta Jehovä, qamllam rasumpa salvakoq Diosqa kanki”.+
10 Tsëpitanam Teyta Jehoväqa jatun pescädupa pachampita lamar kuchunman Jonasta jitatsimurqan.
