Jonas 3:1-10
3 Teyta Jehoväqa yapëmi Jonasta nirqan:+
2 “Jatun Nïnivi markaman ëwë,+ y noqa ninqaqta llapankunata willë”.
3 Tsënam Jonasqa Teyta Jehovä mandanqanta cäsukur+ Nïnivi markaman ëwarqan.+ Tsë markaqa alläpa jatunmi karqan,* tsëmi entëru markataqa kima junaqtaraq tumayaq.*
4 Jonasqa tsë markaman yëkurmi juk junaq entëru, “cuarenta junaqllachönam Nïnivi marka ushakanqa” nir willakur purirqan.
5 Tsënam Nïnivichö nunakunaqa Jonas willakunqanta creir qallëkuyarqan.+ Tsëmi ichikpis jatumpis chukru tëlata janankunaman churakuyarqan y ayunar qallëkuyarqan.
6 Nïnivi markachö gobernaqtapis willayarqanmi Jonas willakunqanta. Tsëmi gobernar täkunampita sharkur,* janan kaq shumaq röpanta* jipikur chukru tëlata jananman churakurqan, tsëpitam uchpa jananman jamakurqan.
7 Y entëru Nïnivichö kënö nir willakuyänampaqmi mandakurqan:
“Gobernaqwan carguyoq nunakunam këta mandakuyan: ama ni pï nuna, ni animal, ni wäka, ni üsha imatapis mikuyätsuntsu. Ama imatapis mikuyätsuntsu ni yakutapis upuyätsuntsu.
8 Llapan nunakuna chukru tëlakunata janankunaman churakuyätsun, y animalkunatapis chukru tëlakunata churatsiyätsun. Llapan shonqunkunawan Diosman mañakuyätsun y mana alli rurëninkunata dejayätsun, amana maqakoq kayätsunnatsu ni nuna mayinkunata wanutsiyätsunnatsu o wañutsiyätsunnatsu.
9 Tsëqa capaz rasumpa kaq Teyta Diospa cöleran pasanqa, y manana* ushakätsimäshunnatsu”.
10 Tsënam Dios Yayaqa mana alli rurëninkunata dejayanqanta rikarnin+ pëkunata llakiparqan,* y manam ushakätsirqannatsu.+
Nötakuna
^ Hebreu idiömachöqa “Diospaqqa alläpa jatun markam karqan” ninmi.
^ O capazchi “cruzayaq”.
^ Kënöpis niyanmi: ichirkur.
^ O “gobernaqpaq rurashqa röpanta”.
^ O “pësakurnin”.
^ Kënöpis niyanmi: ankuparqan; kuyaparqan.
