Juan 10:1-42
10 “Rasunllatam qamkunata nï,* üsha corralman punkupa mana yëkur juk lädupa yëkoqqa, ladronmi y jukkunapa imantapis amälas apakoqmi.+
2 Peru punkupa yëkoqqa, üshakunata mitseqmi.+
3 Pëtaqa täpakoqpis punkuta kichapunmi,+ y üshakunapis cäsuyanmi.+ Mitsikoqqa jutimpa qayarmi üshankunata waqtaman yarqatsimun.
4 Llapan üshankuna waqtaman yarqarayämuptinnam, puntankunata ëwan. Y vozninta reqirmi üshakunaqa qepanta ëwayan.
5 Mana reqiyanqan nunataqa manam imëpis qatiyanqatsu, tsëpa rantinqa, mana reqiyanqan nunakunapa vozninta mana reqirmi qeshpir ëwakuyanqa”.
6 Jesusqa tsë igualatsikuywanmi pëkunata parlaparqan, peru ima nita munanqanta manam entiendiyarqantsu.
7 Tsëmi Jesusqa yapë kënö nirqan: “Rasunllatam qamkunata nï,* noqam üshakunapaq punku kä.+
8 Noqa tukur shamushqa kaqkunaqa, llapampis ladron y jukkunapa imantapis amälas apakoqmi kayan, peru üshakunaqa manam pëkunata wiyayashqatsu.
9 Noqam punku kä, pï nunapis üsha corralman yëkunampaq noqaman shamoqqa salvakunqam, y yëkur y yarqur këtam puëdinqa, y qewatam tarinqa.+
10 Ladronqa üshakunata suwaq, wanutseq o wañutseq y ushakätseqmi shamun.+ Peru noqaqa imëyaqpis kawëyoq kayänëkipaqmi shamurqö.
11 Noqam mas alli kaq mitsikoqqa kä,+ y mas alli kaq mitsikoqqa, üshankunata salvananrëkurmi wanunqa o wañunqa.+
12 Qellëpaq mitsipakoq nunaqa, manam rasumpa mitsikoqtsu ni üshakunapa duëñuntsu, tsëmi atoq* shamuykaqta rikëkurqa, üshakunata dejëkur qeshpir ëwakun. Tsëmi atoqqa wakinta apakun, y wakintanam wakpa këpa qarqun.
13 Qellëpaq mitsipakoqqa, qellëllapaq trabajarmi üshakunapaqqa yarpachakuntsu.
14 Noqam mas alli kaq mitsikoqqa kä. Noqaqa üshäkunata reqïmi, y üshäkunapis reqiyämanmi.+
15 Tsënöllam Teytapis reqiman, y noqapis Teytata reqï;+ y noqaqa üshakunata salvanärëkurmi wanushaq.+
16 Kë corralchö mana këkaq üshäkunapis kapamanmi;+ pëkunatapis kë corralmanmi pushamushaq, y llapankunam ninqäkunata cäsukuyanqa. Llapankunam juk grüpullana tikrayanqa, y juk mitseqyoqllam kayanqa.+
17 Vïdäta yapë chaskinäpaq vïdäta entregaptïmi+ Teytaqa kuyaman.+
18 Manam ni pï qochimantsu o qechumantsu, sinöqa kikï munarmi entregä. Entreganäpaq y yapë chaskinäpaqpis derëchuyoqmi* kä.+ Tsëta ruranäpaqqa Teytämi nimashqa”.
19 Tsënö ninqampitam, judïukunaqa+ kikinkunapura yapë acuerdutsu kayarqan.
20 Atskaqmi niyarqan: “Pëqa demoniuyoqmi, y juiciuntam oqrashqa. ¿Imanirtan pë ninqanta wiyayanki?”.
21 Wakinnam niyarqan: “Pëqa manam demoniuyoq nunanötsu parlan. Demoniuqa manam wisku o qapra nunapa nawinta alliyätsita puëdinmantsu, ¿aw?”.
22 Tsë witsanmi, templuqa Teyta Diosllapaqna kanqanta rikätsikoq fiestata Jerusalenchö rurayaq. Tamya witsanmi karqan,
23 y Jesusqa templuchömi Salomonpa Pasadïzunchö purikarqan.+
24 Tsënam judïukunaqa lädunman juntakëkur niyarqan: “¿Imëyaqtan kënö katsiyämanki? Qam Cristu karqa, cläru nïkayämë”.
25 Tsënam Jesusqa kënö contestarqan: “Qamkunata nishqana kaptïpis, qamkunaqa manam creiyankitsu. Teytäpa jutinchö ruranqäkunam, noqapa favornï willakun.+
26 Peru mana üshäkuna karmi qamkunaqa creiyankitsu.+
27 Üshäkunaqa cäsuyämanmi; noqaqa pëkunata reqïmi, y üshäkunaqa qepätam shayämun.+
28 Noqaqa imëyaqpis kawëta tariyänampaqmi yanapä,+ tsëmi imëpis ushakäyanqatsu, y manam pï nunapis makïpitaqa apakunqatsu.+
29 Teytä entregamanqanqa imëkapitapis masmi välin, y Teytapa makinchö këkaq üshakunataqa manam ni pï apakuyta puëdinqatsu.+
30 Noqawan Teytaqa juknöllam kayä”.+
31 Tsënam judïukunaqa rumita aptarkur yapë tsampita o saqmëta munayarqan.
32 Tsënam Jesusqa nirqan: “Teyta mandamaptinmi qamkuna rikëkäyaptiki mëtsika alli rurëkunata rurarqö. ¿Mëqanta ruranqäpitataq rumiwan tsampiyämanki o saqmayämanki?”.
33 Judïukunanam niyarqan: “Manam allikunata ruranqëkipitatsu rumiwan tsampiyashqëki o saqmayashqëki, sinöqa nunalla këkar dios tukurnin, Teyta Diosta ofendir parlanqëkipitam”.+
34 Tsënam Jesusqa nirqan: “¿Manaku katsiyanqëki Leychö* kënö qellqarëkan: ‘Noqam nirqö: “Qamkunaqa dioskunam* kayanki”’+ nir?
35 Condenanqan kaqkunapaqpis dioskuna kayanqanta pë nikaptinqa, y Diospa Palabran ninqanta ni pï cambiëta mana puëdikaptinqa,+
36 ¿imanirtan Teyta akramar nunakunaman mandamashqa këkaptin, ‘Diospa Tsurinmi kä’ ninqäpita ‘Diosta ofendirmi parlanki’+ niyämanki?
37 Teytä munanqanta mana ruraptïqa, ama creiyämëtsu.
38 Peru pë munanqanta ruraptïqa, noqata mana creimarpis, ruranqäkunata rikar creiyë.+ Tsënömi Teyta noqawan juknölla kanqanta, y noqa Teytawan juknölla kanqäta imëpis musyayanki”.+
39 Tsëmi Jesusta yapë prësuyta munayarqan, peru mana prësuyänampaqmi qeshpir ëwakurqan.
40 Yapëmi Jordan mayupa wak tsimpanchö nunakunata Juan bautizar qallanqan sitiuman ëwakurqan,+ y tsëchömi quedakurqan.
41 Mëtsikaqmi pëta rikaq ëwar kënö niyarqan: “Juanqa manam ima milagrutapis rurarqantsu, peru kë nunapaq Juan ninqanqa llapampis rasumpa kaqllam kashqa”.+
42 Tsënömi tsëchö këkaq mëtsikaq nunakuna Jesusman markäkur o yärakur qallëkuyarqan.
Nötakuna
^ Kënöpis niyanmi: niyaq.
^ Kënöpis niyanmi: niyaq.
^ Griëgu idiömachöqa “löbu” ninmi. Tsë animalqa atoq niraqmi, peru mas jatunmi.
^ O “autoridäyoqmi”.
^ Tsënö nirqa, hebreu idiömachö qellqayanqan Bibliapa llapan librunkunapaqmi parlëkan.
^ O “dioskunanömi”.
