Juan 13:1-38
13 Pascua Fiesta manaraq qallaptinmi, Jesusqa musyarqanna+ nunakunapita ëwakur Teytaman kutinan hörana kanqanta.+ Tsëmi kë munduchö këkaq qateqninkunata alläpa kuyar wanunqanyaq pëkunata kuyarqan.+
2 Cenarmi këkäyarqan. Tsë hörapaqqa Jesusta traicionë munëtam+ Diabluqa Simonpa tsurin Jüdas Iscariötipa+ shonqunman churashqana karqan.
3 Tsënam Jesusqa Teyta imëkata cargunman churashqa kanqanta musyar, y Diospita shamunqanta y Diosman kutikunampaq kaqta musyar,+
4 cenëkäyanqampita sharkur, janan kaq röpanta juk läduman churëkur toällata aptarkur tseqllanman watakurqan.+
5 Tsëpitanam lavatoriuman yakuta winarkur qateqninkunapa chakinkunata yakuwan awirqan,* y tseqllanchö watarëkaq toällawan chakinkunata tsakitsir qallëkurqan.
6 Simon Pëdruman chäriptinnam, “Teytë, ¿imanötan qamqa chakïta yakuwan awimunkiman?”* nirqan.
7 Tsënam Jesusqa, “kë rurëkanqätaqa manam kanan höra entiendinkitsu, peru tsëpitaqa entiendinkim” nirqan.
8 Pëdrunam, “noqaqa manam imëpis permitishaqtsu chakïta yakuwan awimunëkita”* nirqan. Tsënö niptinnam Jesusqa, “chakikita mana awimuptïqa,+ manam noqawan juntu imatapis chaskinkitsu”* nirqan.
9 Tsënam Simon Pëdruqa nirqan: “Teytë, tsënö kaptinqa ama chakïllataqa yakuwan awimuytsu, makïtapis y peqätapis o umätapis paqëkallämuy”.
10 Jesusnam nirqan: “Bañakushqa kaqqa, limpiuna karmi chakinta yakuwan awikuyllatana* wanan.* Qamkunaqa limpium këkäyanki, peru manam llapëkitsu”.
11 Pëqa pï traicionanampaq kaqta musyarmi,+ “manam llapëkitsu limpiu këkäyanki” nirqan.
12 Qateqninkunapa chakinkunata yakuwan awir* usharirnam, janan kaq röpanta churakurir y mësaman yapë tëkur pëkunata kënö nirqan: “¿Musyayankiku imanir chakikikunata awimunqäta?
13 Qamkunaqa, Maestru y Señor nirmi reqiyämanki, y rasuntam niyanki, noqaqa tsëmi qamkunapaq kä.+
14 Tsëmi Señor y Maestru këkar chakikikunata yakuwan awimushqa* këkaptïqa,+ qamkunapis jukniki juknikikuna chakikikunata awipänakuyänëki.+
15 Qamkunawan ruranqänölla, qamkunapis rurayänëkipaqmi noqaqa yachatsiyarqoq.+
16 Rasunllatam qamkunata nï,* sirwipakoqqa manam patronnimpita mastsu ni mandamushqa kaqpis mandamoqnimpita mastsu.
17 Kananqa tsëkunata musyayankinam, y rurarqa kushishqam kayanki.+
18 Manam llapëkipaqtsu tsënö nikä; noqaqa akranqä kaqkunata reqïmi. Peru këqa pasashqa, ‘juntu mikur kayanqä nunam kananqa chikiman’+ nir qellqarëkanqan cumplikänampaqmi.+
19 Tsënö pasaptin noqapaq parlëkanqanta musyayänëkipaqmi, manaraq pasaptin kananllapitana qamkunata tsëta willëkä.*+
20 Rasunllatam qamkunata nï,* mandamunqä kaqta chaskeqqa noqatapis chaskimanmi,+ y noqata chaskimaqqa, mandamaqnïtapis chaskikanmi”.+
21 Tsëkunata nirirmi Jesusqa shonqunchö alläpa llakikur, “rasunllatam qamkunata nï,* qamkunapita juknikikunam tracionamanqa”+ nirqan.
22 Tsënam qateqninkunaqa pipaq parlëkanqanta mana musyar, mantsakashqa juknin juknin rikapänakur qallëkuyarqan.+
23 Jesus kuyanqan qateqninqa,+ mësachömi Jesuspa lädunchö këkarqan.
24 Tsëmi Simon Pëdruqa peqanwan o umanwan sëñasta rurar, “¿pipaqtan parlëkan?” nir tapurqan.
25 Tsënam pëqa Jesuspa pëchun kaqman jitakëkur, “Teytë, ¿pipaqtan parlëkanki?”+ nir tapurqan.
26 Jesusnam, “pakipi tantata ushmarkatsir qaranqä kaqpaqmi”+ nir contestarqan. Y tantata ushmarkatsirmi Simon Iscariötipa tsurin Jüdasta qararqan.
27 Tsë pakipi tantata chaskiriptinllam Satanasqa Jüdasman yëkuskirqan.+ Tsënam Jesusqa, “rurëkanqëkitaqa ras o sas rurë” nirqan.
28 Mësachö tëkaqkunaqa manam mëqampis musyayarqantsu imanir tsëta ninqanta.
29 Wakinqa pensayarqan qellë cäjata Jüdas katsiptin,+ “Pascua Fiestapaq wananqantsikkunata rantiramuy” nirnin Jesus mandashqa kanqanta o waktsakunata imallatapis qaranampaq mandashqa kanqantam.
30 Jüdasqa pakipi tantata chaskirirmi jinan höra tsëpita ëwakurqan. Tsë höraqa paqasnam karqan.+
31 Jüdas yarqunqanchönam Jesusqa kënö nirqan: “Kanampitam nunakunaqa Nunapa Tsurinta+ alabayanqa, rasumpa kaqchöqa, tsëta rurarqa Teyta Diostam alabëkäyanqa.
32 Kikin Teyta Diosmi mas puëdeq këman churamanqa,+ y tsëtaqa jinan höram ruranqa.
33 Wamralläkuna, ichik masllanam qamkunawan juntu karishaq. Qamkunaqa ashiyämankim; peru judïukunata ninqänöllam qamkunatapis kanan nï,* ‘ëwanäpaq kaqmanqa, manam shamuyta puëdiyankitsu’.+
34 Kë mushoq mandamientum qamkunapaq: jukniki juknikikunam kuyanakuyänëki. Qamkunata kuyanqänöllam*+ qamkunapis jukniki juknikikuna kuyanakuyänëki.+
35 Tsënömi llapankuna musyayanqa qatimaqnïkuna kayanqëkita, jukniki juknikikuna kuyanakuyaptiki”.+
36 Simon Pëdrunam, “Teytë, ¿mëtataq ëwanki?” nir tapurqan. Tsënam Jesusqa, “noqa ëwanqämanqa manam kananqa shamuyta puëdinkitsu, peru tsëpitaqa shamunkim”+ nir contestarqan.
37 Pëdrunam, “Teytë, ¿imanirtan kananqa qepëkita shamuyta puëdïtsu? Qamrëkurqa wanurpis wanurimanmi”+ nirqan.
38 Tsënam Jesusqa nirqan: “¿Rasumpaku listu këkanki noqarëkur wanunëkipaq? Rasunllatam qamta neq, kananmi gällu manaraq cantaptin kima kuti negamanki”.+
Nötakuna
^ Kënöpis niyanmi: paqarqan; mayllarqan.
^ Kënöpis niyanmi: paqamunkiman; mayllamunkiman.
^ Kënöpis niyanmi: paqamunëkita; mayllamunëkita.
^ O “manam noqapa kaqkunapitatsu kanki”.
^ Kënöpis niyanmi: necesitan.
^ Kënöpis niyanmi: paqakïllatana; mayllakuyllatana.
^ Kënöpis niyanmi: paqar; mayllar.
^ Kënöpis niyanmi: paqamushqa; mayllamushqa.
^ Kënöpis niyanmi: niyaq.
^ Kënöpis niyanmi: willëkäyaq.
^ Kënöpis niyanmi: niyaq.
^ Kënöpis niyanmi: niyaq.
^ Kënöpis niyanmi: niyaq.
^ Kënöpis niyanmi: kuyayanqaqnöllam.
