Marcus 2:1-28
2 Juk ishkë junaqkuna pasariptinmi Jesusqa yapë Capernaumman ëwarqan, y juk wayichö këkanqantam llapankuna musyaskiyarqan.+
2 Tsëmi mëtsikaq nunakuna tsë wayiman juntariyarqan, y punkuchöpis pasëpa* kichkim kayarqan. Tsënam pëqa Teyta Diospita alli noticiakunata pëkunata willar qallëkurqan.+
3 Tsënam, kuyukuyta mana puëdeq nunata chuskoq nunakuna pëman apayämurqan.+
4 Peru mëtsikaq nunakuna tsëchö kayaptinmi Jesus kaqman yëkatsita puëdiyarqantsu. Tsëmi Jesus këkanqan janampa wayipa qataraqninta kichëkur, kuyukuyta mana puëdeq nunata kirmawan shumaqlla bajatsiyarqan.
5 Pëkuna markäkoq o yärakoq kayanqanta cuentata qokurmi+ Jesusqa kuyukuyta mana puëdeq nunata, “hïju, jutsëkikunapita* perdonashqanam kanki” nirqan.+
6 Tsënam tsëchö tëkaq wakin Ley qellqaqkunaqa shonqunkunachö kënö pensayarqan:+
7 “¿Imanirtan kë nunaqa tsënö parlan? Diostam ofendikan. ¿Manaku Dioslla jutsataqa* perdonëta puëdin?”.+
8 Shonqunkunachö pensayanqanta kikinkunapura parlëkäyanqanta cuentata qokurmi, Jesusqa pëkunata kënö nirqan: “¿Imanirtan shonquykikunachö tsëkunata pensayanki?+
9 ¿Imatan mas fäcil? ¿Kuyukuyta mana puëdeq nunata, ‘jutsëkikunapita perdonashqanam kanki’ niku, o, ‘sharkur kirmëkita aparkur puri’ niku?
10 Tsënö kaptimpis, Nunapa Tsurinqa+ jutsayoqkunata* perdonanampaq carguta chaskinqanta musyayänëkipaqmi...”.+ Tsënö nikarmi kuyukuyta mana puëdeq nunata nirqan:
11 “Noqam qamta neq: sharkuy, kirmëkita aparkur wayikita ëwakuy”.
12 Tsë höram llapankuna rikëkäyaptin sharkurnin kirmanta aparkur purirna ëwakurqan. Tsënam nunakunaqa espantakur, “manam ni imëpis këtanöqa rikarquntsiktsu” nir Teyta Diosta alabayarqan.+
13 Jesusqa yapëmi qocha kuchunman ëwakurqan, y mëtsikaq nunakuna pëman shayämuptinmi llapankunata yachatsirqan.
14 Tsëpita ëwakuykarnam, impuestuta cobrayänan wayichö tëkaqta Alfeupa tsurin Levïta* rikarqan, y kënömi nirqan: “Qatimaqnï kë”. Tsënam pëqa sharkur qepanta ëwarqan.+
15 Rätuntanam Jesuswan qateqninkunaqa Levïpa wayinchö mikuykäyarqan. Mëtsikaq impuestuta cobraqkunawan y jutsasapakunawan* juntum mikuykäyarqan. Pëkunapitaqa mëtsikaqmi Jesusta qatiräyaq.+
16 Jutsasapakunawan* y impuestuta cobraqkunawan mikuykaqta rikarnam, Ley qellqaq fariseukunaqa Jesuspa qateqninkunata kënö niyarqan: “¿Impuestuta cobraqkunawan y jutsasapakunawanku pëqa mikun?”.
17 Tsëta wiyëkurnam Jesusqa nirqan: “Alli këkaqkunaqa manam doctorta wanayantsu,* peru qeshyëkaqkunam sïqa. Noqaqa manam allita ruraqkunarëkurtsu shamurqö, sinöqa jutsata* ruraqkunarëkurmi”.+
18 Juanpa qateqninkuna y fariseukunaqa imëpis ayunayaqmi. Tsëmi Jesusman shamur kënö tapuyarqan: “¿Imanirtan Juanpa qateqninkuna y fariseukunapa qateqninkunaqa ayunayan, peru qatiräshoqnikikunaqa ayunayantsu?”.+
19 Tsënam Jesusqa kënö nirqan: “Noviu pëkunawanraq këkaptinqa,+ noviupa amïgunkunaqa manam ayunayanmantsu, ¿aw? Noviu pëkunawan këkaptinqa, manam allitsu kanman pëkuna ayunayanqan.
20 Peru noviu pëkunawan manana kaptinmi sïqa,+ llakikur ayunayanqa.
21 Manam pillapis mushoq tëlawanqa janan kaq makwa röpanta remendanmantsu, pillapis tsëta ruraptinqa, mushoq tëla qentikarmi tsë makwa röpata masraq rachiskatsinqa.+
22 Tsënöllam llullu vïnutapis makwa qara porongukunamantsu winayan, pillapis tsëta rurayaptinqa, qara porongukuna pashtarmi imapaqpis väliyanmannatsu, y vïnupis jichakärinmanmi. Tsëpa rantinqa, llullu vïnutaqa mushoq qara porongumanmi winayan”.
23 Tsë witsanmi trïgu këkanqampa säbadu junaqchö Jesus pasëkarqan. Y qateqninkunaqa espïgakunata kipchurmi gränuta uchur qallëkuyarqan.+
24 Tsënam fariseukunaqa niyarqan: “¡Tsëta rikë! ¿Imanirtan säbaduchö mana ruranata rurëkäyan?”.
25 Jesusnam nirqan: “¿Manaku qamkunaqa leyiyashqanki, David y pëwan këkaqkuna mallaqäyaptin y mikuyänampaq mana kaptin David imata ruranqanta?+
26 ¿Manaku mandakoq sacerdöti Abiatarpaq+ willakunqanchö leyiyashqanki Diospa wayinman yëkur David imata ruranqanta? Pëqa sacerdötikunalla mikuyänan këkaptinmi Diospaq kaq tantata mikurqan, y pëwan këkaqkunatapis qararqan”.+
27 Tsëpitanam pëkunata kënö nirqan: “Säbadutaqa nunakunarëkurmi Dios patsätsirqan,+ peru manam säbadurëkurtsu Diosqa nunakunata kamarqan.
28 Tsëmi Nunapa Tsurinqa, säbaduchö imata rurayänampaqpis mandakuyta puëdin”.+
Nötakuna
^ Kënöpis niyanmi: jankat.
^ Kënöpis niyanmi: pecäduykikunapita.
^ Kënöpis niyanmi: pecädutaqa.
^ Kënöpis niyanmi: pecädu ruraqkunata.
^ Mateu nirpis reqiyaqmi.
^ Kënöpis niyanmi: pecädu ruraqkunawan.
^ Kënöpis niyanmi: pecädu ruraqkunawan.
^ Kënöpis niyanmi: necesitäyantsu.
^ Kënöpis niyanmi: pecäduta.
