Marcus 3:1-35
3 Diosta adorayänan wayimanmi yapë yëkurqan, y tsëchömi juk kaq makin wanushqa o wañushqa nuna këkarqan.+
2 Fariseukunaqa imallapitapis acusayänampaqmi, säbadu këkaptin tsë nunata alliyätsinqanta o mana alliyätsinqanta rikarëkäyarqan.
3 Tsënam Jesusqa makin wanushqa nunata, “sharkur kë chowpiman* shamuy” nirqan.
4 Tsëpitanam pëkunata kënö nirqan: “¿Ima rurëtan säbaduchöqa alli? ¿Allita rurëku o mana allita rurëku? ¿Pitapis salvëku o wanutsiku?”.+ Pëkunaqa manam imatapis niyarqantsu.
5 Tsënam lädunchö këkaqkunata alläpa cölerashqa rikëkur y rumi shonqu kayanqampita alläpa llakikur,+ tsë nunata “makikita kamämuy” nirqan. Kamarkuptinnam, makinqa sänu tikraskirqan.
6 Tsënam fariseukunaqa tsëpita ëwakur Herödispa+ yanapaqninkunawan tsë höra juntakëkur, Jesusta wanutsiyänampaq yachatsinakuyarqan.
7 Tsëpitanam Jesuswan qateqninkunaqa qochaman ëwayarqan. Tsënam, Galilëa provinciapita y Judëa provinciapita mëtsikaq nunakuna qepanta ëwayarqan.+
8 Y pë ruranqanta wiyarmi Jerusalenpita, Idumëa provinciapita, Jordan mayupa* wak tsimpampita, y Tïrupawan Sidonpa amänunkunapita mëtsika nunakuna pëman shayämurqan.
9 Tsëmi qateqninkunata nirqan mëtsika nunakuna kichkipäyaptin jamakunampaq ichikllan barcuta listuta katsiyänampaq.
10 Tsënöqa nirqan mëtsikaqta alliyätsishqa kaptin, grävi qeshyayoq kaqkuna kichkinakur-raq yatëta munayaptinmi.+
11 Pëta rikëkurqa mana alli espïritukunapis+ puntanman qonqurïkurmi fuertipa kënö niyaq: “Qamqa Diospa Tsurinmi kanki”.+
12 Tsënam Jesusqa pï kanqanta pitapis mana willayänampaq kutin kutin pëkunata nirqan.+
13 Tsëpitanam jirkaman witsarqan, y akranqan kaqkunatam qayatsirqan.+ Tsënam pëkunaqa pëman ëwayarqan.+
14 Tsëchömi döci nunakunawan juk grüputa patsätsirqan, y pëkunatam apostolkuna nir qayarqan. Pëkunam, pëwan puriyänan karqan, tiempuwannam willakoq mandanan karqan,
15 y demoniukunata qarquyänampaqmi poderta chaskiyänan karqan.+
16 Döci nunakunawan+ patsätsinqan grüpuchöqa pëkunam kayarqan: Simon, pëtam Pëdru nir jutin churarqan,+
17 Zebedeupa tsurin Santiägu, y Santiägupa wawqin Juan, pëkunapaqmi Boanerges nir jutin churarqan. Tsëqa, “räyupa tsurinkuna” ninanmi,+
18 Andres, Felïpi, Bartolomë, Mateu, Tomas, Alfeupa tsurin Santiägu, Tadeu, Cananïta* niyanqan Simon,
19 y tiempu pasariptin Jesusta traicionaq Jüdas Iscariöti.
Tsëpitanam Jesusqa juk wayiman yëkurqan,
20 y mëtsika nunakuna yapë juntakäyaptinmi ni mikuyänampaqpis tiempunkuna karqantsu.
21 Tsëta musyëkurmi kastankunaqa “löcum tikrashqa” nir apakuyänampaq asheq ëwayarqan.+
22 Jerusalenpita urämoq Ley qellqaqkunanam kënö niyaq: “Kë nunamanqa Diablum* yëkushqa, y demoniukunata gobernaq yanapaptinmi demoniukunata qarqun”.+
23 Tsëmi pëman witiyänampaq nïkur igualatsikuykunawan parlapar kënö nirqan: “¿Imanötan Satanasqa Satanasta qarqunman?
24 Mëqan gobiernuchöpis pelyar rakikarqa, mana allichömi ushayanqa.+
25 Y mëqan familiachöpis mana acuerdu karqa, mana allichömi ushayanqa.
26 Tsënöllam Satanaspis kikimpa contran kar y rakikashqa karqa tsarakuyta puëdinqatsu, y ushakëmanmi chanqa.
27 Rasumpa kaqchöqa, pillapis kallpayoq nunapa wayinman yëkur imëkanta suwëta munarqa, puntataqa tsë nunataran chakipita makipita watanan. Tsë nunata watar-ran imëkantapis apakuyta puëdinqa.
28 Noqam qamkunata nï,* nunakunapa tsurinkunaqa ima jutsata* rurayanqampitapis y ofendikuypa parlayanqampitapis perdonashqam kayanqa.
29 Peru Teyta Diospa santu espïritunta insultaqqa, manam imëpis perdonashqatsu kanqa,+ sinöqa imëpis culpayoqmi këkanqa”.+
30 Tsëtaqa nirqan, “kë nunamanqa mana alli espïritum yëkushqa” niyaptinmi.+
31 Tsëyaqnam, Jesuspa mamänin y wawqinkuna chärir waqtachö këkäyarqan,+ y Jesusta qayanampaqmi juk nunata mandayarqan.+
32 Jesuspa lädunchö jamarëkaq mëtsika nunakunam kënö niyarqan: “Rikë, mamëkiwan wawqikikunam waqtachö këkäyan, y qampaqmi tapukuyan”.+
33 Tsënam pëqa, “¿pikunatan mamänï y wawqïkuna kayan?” nir contestarqan.
34 Y lädunchö jamarëkaqkunata rikëkurmi kënö nirqan: “¡Pëkunam mamänï y wawqïkunaqa kayan!+
35 Awmi, Teyta Dios munanqanta ruraq kaqmi, wawqï, panï y mamänïqa”.+
Nötakuna
^ Kënöpis niyanmi: pullanman.
^ Kënöpis niyanmi: riupa.
^ O “Llapan Shonqunwan Imatapis Ruraq; Kushi Kushilla Imatapis Ruraq”.
^ Griëgu idiömachöqa “Belcebümi” ninmi. Tsënö nirqa, demoniukunata gobernaqpaqmi parlëkan.
^ Kënöpis niyanmi: pecäduta.
^ Kënöpis niyanmi: niyaq.